ឥណ្ឌាហ៊ានទិញប្រេងរបស់រុស្ស៊ី ធ្វើឲ្យអាមេរិកសង្កៀតធ្មេញ
បច្ចុប្បន្ននេះ រុស្ស៊ីកំពុងរងទណ្ឌកម្មសេដ្ឋកិច្ច ពីសំណាក់ក្រុមប្រទេសលោកខាងលិច ដែលធ្វើឲ្យរុស្ស៊ី មានការលំបាក មិនអាចលក់ប្រេងបានដោយងាយស្រួលឡើយ។ តែយ៉ាងណា ជាមួយនឹងតម្លៃដែលរុស្ស៊ីឡៃឡុងបញ្ចុះថោក ឥណ្ឌាបានសម្រេចចិត្តទិញប្រេងរុស្ស៊ី ដល់ទៅ៥លានធុងបារីល។ បើទោះបី វាជាសិទ្ធិរបស់ឥណ្ឌាមែន តែដំណឹងនេះ បានធ្វើឲ្យសហរដ្ឋអាមេរិក សង្កៀតធ្មេញខឹងឥណ្ឌាមិនតិចទេ។ ជាងនេះទៀត ឥណ្ឌាក៏មិនបានប្រកាសជំហរ ថ្កោលទោសរុស្ស៊ី ដែលធ្វើសង្គ្រាមឈ្លានពានអ៊ុយក្រែនដែរ។
ចុះផ្សាយនៅថ្ងៃ៖
ស្តាប់ - ០២:៣៣
គិតចាប់ពីដើមខែមីនានេះមក ឥណ្ឌាបានទិញប្រេងឆៅពីរុស្ស៊ី ចំនួន ៣៦ម៉ឺនធុងបារីល រួចហើយ។ បើប្រៀបធៀបក្នុងរយៈពេលដូចគ្នានៅឆ្នាំ២០២១ គឺចំនួនប្រេងដែលឥណ្ឌាទិញពីរុស្ស៊ីបានកើនមួយគុណជា៤។ ជាសរុប នៅសប្តាហ៍នេះ ក្រុមហ៊ុន Indian Oil Corporation និង Hindustan Petroleum Corporation បានកក់ប្រេងរុស្ស៊ីទុក ចំនួនដល់ទៅ៥លានធុងបារីល។ តម្លៃដែលរុស្ស៊ីលក់ចេញ គឺថោកខ្លាំងណាស់ គឺត្រឹមតែ២៥ដុល្លារប៉ុណ្ណោះ ក្នុងមួយធុងបារីស ខណៈតម្លៃលើទីផ្សារ គឺជាង១០០ដុល្លារឯណោះ។
គួរបញ្ជាក់ថា តម្លៃប្រេងលើទីផ្សារអន្តរជាតិ បានឡើងថ្លៃខ្លាំងណាស់ បន្ទាប់ពីក្រុមប្រទេសលោកខាងលិច បានដាក់ទណ្ឌកម្មសេដ្ឋកិច្ចលើរុស្ស៊ី។ រុស្ស៊ីគឺជាប្រទេសនាំប្រេងចេញ ធំជាងគេលំដាប់ទី២។ តម្លៃប្រេងឥន្ធនៈឡើងថ្លៃ កំពុងតែធ្វើឲ្យរដ្ឋាភិបាលឥណ្ឌាប្រឈម និងការរិះគន់តវ៉ាខ្លាំងណាស់ នាពេលបច្ចុប្បន្ននេះ។
ដោយឡែក លោកស្រី Lydia Powell អ្នកជំនាញថាមពល នៅ Observer Research Foundation នៅក្រុងញូដេលី បានលើកឡើងថា ឥណ្ឌាទិញប្រេងរុស្ស៊ីនាពេលនេះ គឺវាជាកាយវិការនយោបាយ ច្រើនជាងការឆក់ឱកាស ដែលប្រេងរុស្ស៊ីមានតម្លៃថោកខ្លាំង។ ជាការពិត តម្លៃប្រេងលើទីផ្សារបានឡើងថ្លៃខ្លាំង ធ្វើឲ្យប៉ះពាល់ជញ្ជីងពាណិជ្ជកម្មរបស់ឥណ្ឌាមែន តែ២០ឆ្នាំកន្លងមកនេះ ឥណ្ឌាទិញប្រេងភាគច្រើនតែពីប្រទេសដើមបូព៌ាប៉ុណ្ណោះ។ យ៉ាងណាមិញ ភាគច្រើន នៃរោងចក្រចំរាញ់ប្រេងនៅឥណ្ឌា គឺមិនអាចចំរាញ់ប្រភេទប្រេងឆៅរបស់រុស្ស៊ីឡើយ។ ដូច្នេះ ការដែលឥណ្ឌា សម្រេចទិញប្រេងរុស្ស៊ីនាពេលនេះ គឺវាកាយវិការដែលឥណ្ឌាចង់ជួយរុស្ស៊ី ព្រោះថាឥណ្ឌា ក៏ពឹងខ្លាំងណាស់ដែរ ទៅលើគ្រឿងសព្វាវុធរបស់រុស្ស៊ី។
គួរកត់សំគាល់ថា បន្ទាប់ពីរុស្ស៊ីបានធ្វើសង្គ្រាមឈ្លានពានអ៊ុយក្រែន ឥណ្ឌាបានបដិសេធមិនថ្កោលទោសរុស្ស៊ី ហើយបានបោះឆ្នោតអនុប្បវាទ លើសេចក្តីសម្រេចចិត្តរបស់អង្គការសហប្រជាជាតិ ដែលថ្កោលទោសរុស្ស៊ី ថែមទៀតផង។ មិនត្រឹមតែប៉ុណ្ណោះ ឥណ្ឌាបានបដិសេធ មិនចូលរួមនៅក្នុងទណ្ឌកម្ម ដែលក្រុមប្រទេសលោកខាងលិខ ដាក់ទៅលើរុស្ស៊ីទេ ដោយអះអាងថាវាជាសិទ្ធិខ្លួន ក្នុងការបន្តធ្វើពាណិជ្ជកម្មជាមួយរុស្ស៊ី។
ទោះយ៉ាងណា លោកស្រី ជែន សាគី អ្នកនាំពាក្យសេតវិមាន បានលើកឡើងថា ការដែលឥណ្ឌាទិញប្រេងរុស្ស៊ី គឺវាមិនបានបំពានអ្វីនឹងទណ្ឌកម្មរបស់អាមេរិកមែន។ ក៏ប៉ុន្តែអាមេរិក សូមរំលឹកប្រាក់ឥណ្ឌាថា ប្រវត្តិសាស្ត្រនឹងចារិកទុក ចងចាំជានិច្ច ថាឥណ្ឌាបានឈរនៅខាងណា នៅក្នុងរឿងរ៉ាងសង្គ្រាមនៅអ៊ុយក្រែននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ