កូរ៉េខាងជើងបន្តបាញ់សាកល្បងមីស៊ីល ប៉ុន្មានថ្ងៃក្រោយបរាជ័យការបាញ់ “មីស៊ីលយក្ស”
យោធាកូរ៉េខាងត្បូងបានចោទកូរ៉េខាងជើងថា នៅតែបន្តផ្គើនបាញ់សាកល្បងមីស៊ីលជាថ្មីម្តងទៀតនៅព្រឹកថ្ងៃអាទិត្យទី២០មីនានេះ។ រាប់ចាប់តាំងពីដើមឆ្នាំ២០២២មក កូរ៉េខាងជើងបានបាញ់សាកល្បងមីស៊ីល១១លើកហើយ បន្ទាប់ពីបានបរាជ័យការបាញ់សាកល្បងលើកទី១០ ដែលអ្នកវិភាគថា អាចជាមីស៊ីលបាលីស្ទីកអន្តរទ្វីប (ICBM) ឬ “មីស៊ីលយក្ស” ។
ចុះផ្សាយនៅថ្ងៃ៖
យោធាកូរ៉េខាងត្បូង បានគូសបញ្ជាក់ថា កូរ៉េខាងជើងបានធ្វើតេស្តសាកល្បងម៉ីសីលមួយលើកទៀតនៅព្រឹកថ្ងៃអាទិត្យទី២០មីនា ខណៈភាពតានតឹងបន្តកើតមានយ៉ាងក្តៅគគុកនៅក្នុងតំបន់។ និងដោយបន្តថាកូរ៉េខាងត្បូង កំពុងត្រៀមខ្លួននិងតាមដានយ៉ាងយកចិត្តទុកដាក់ចំពោះការអភិវឌ្ឍមីស៊ីលរបស់កូរ៉េខាងជើងដែរ។
តាមប្រភពរបស់ទីភ្នាក់ងារព័ត៌មានកូរ៉េខាងត្បូង Yonhap ដោយមិនបញ្ចេញអត្តសញ្ញាណ កូរ៉េខាងជើង បានបាញ់សាកល្បងមីស៊ីល ដែលសង្ស័យថាជាប្រភេទមីស៊ីលរយៈចម្ងាយខ្លី ចំនួន៤គ្រាប់ ចេញពីខេត្ត Pyongan នាវេលាម៉ោង៧និង២០នាទីព្រឹក (ថ្ងៃទី២០មីនា)។
ការបាញ់សាកល្បងមីស៊ីលនៅថ្ងៃអាទិត្យនេះ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីកូរ៉េខាងជើង បានធ្វើតេស្តសាកល្បងមីស៊ីលលើកទី១០របស់ខ្លួននៅពីថ្ងៃទី១៦មីនា ដែលសង្ស័យថាបានបរាជ័យ។ ការបាញ់តេស្តមីស៊ីលសាកល្បងលើកទី១០របស់កូរ៉េខាងជើងនោះ ត្រូវបានអ្នកវិភាគថា ជាប្រភេទមីស៊ីលបាលីស្ទីកអន្តរទ្វីប (ICBM) និងដែលត្រូវបានគេប្រសិទ្ធនាមថា “មីស៊ីលយក្ស”។ បើតាមការវិភាគរបស់អ្នកស្រាវជ្រាវបង្គោលនៃវិទ្យាសា្ថនឯកជន Sejong កូរ៉េខាងជើងចង់មានមីស៊ីលបាលីស្ទិកអន្តរទ្វីប ដែលអាចពាំគ្រាប់ច្រើនបែបនេះ តាំងពីយូរមកហើយ ហើយការបាញ់សាកល្បងលើកទី១០របស់កូរ៉េខាងជើងទំនងជាបាញ់សាកល្បងមីស៊ីល Hwasong-១៧។
គួរជម្រាបថា ភ្លាមៗក្រោយលេចលឺថាកូរ៉េខាងជើងនៅតែបន្តបាញ់សាកល្បងមីស៊ីលនេះ ក្រុមប្រឹក្សាសន្តិសុខជាតិកូរ៉េខាងត្បូង បានបើកកិច្ចប្រជុំបន្ទាន់មួយនិងបានហៅការត្រៀមជើងការតឹងរ៉ឹង ដើម្បីការពារសន្តិសុខជាតិ ក្នុងអំឡុងពេលអន្តរកាលនៃការផ្លាស់ប្តូរប្រធានាធិបតីថ្មី។ លោក Yoon Suk-yeol ប្រធានាធិបតីកូរ៉េខាងត្បូងដែលទើបនឹងជាប់ឆ្នោតត្រូវចូលកាន់តំណែងនៅថ្ងៃទី១០ឧសភាខាងមុខ បន្ទាប់ពីបានឈ្នះការបោះឆ្នោតកាលពីថ្ងៃទី៩មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ