ប៉ាគីស្ថាន៖នាយករដ្ឋមន្រ្តីរួចផុតពីញត្តិដកសេចក្តីទុកចិត្ត ហើយប្រធានាធិបតីរំលាយសភា
នៅក្នុងប្រទេសប៉ាគីស្ថាន នាយករដ្ឋមន្រ្តីលោកអ៊ីមរ៉ាន់ ខាន់បានរួចផុតពីញត្តិដកសេចក្តីទុកចិត្តរបស់ក្រុមគណបក្សប្រឆាំងនៅក្នុងសភា។ ចំណែកប្រធានាធិបតីលោកអាហ្វៀរ អាល់វីបានប្រកាសរំលាយសភាតាមសំណើរបស់លោកអ៊ីមរ៉ាន់ ខាន់។ គួរបញ្ជាក់ថា ញត្តិដកសេចក្តីទុកចិត្តរបស់ក្រុមគណបក្សប្រឆាំងបានធ្វើឡើង ក្រោយពីគណបក្សកាន់អំណាចរបស់លោកអ៊ីមរ៉ាន់ ខាន់បានបាត់បង់សំឡេងភាគច្រើននៅក្នុងសភា។ ក្រុមគណបក្សប្រឆាំងបានចោទនាយករដ្ឋមន្រ្តីពីបទគ្រប់គ្រងសេដ្ឋកិច្ចមិនបានល្អ និងមានភាពឆ្គងនៅក្នុងនយោបាយការបរទេស។
ចុះផ្សាយនៅថ្ងៃ៖
ស្តាប់ - ០២:២៣
ការរួចផុតពីញត្តិដកសេចក្តីទុកចិត្តរបស់លោកអ៊ីមរ៉ាន់ ខាន់មិនមែនដោយសារសភាបោះឆ្នោតប្រឆាំងទេ តែមកពីអនុប្រធានសភាលោកកាស៊ីម ស៊ូរីមិនបានដាក់ញត្តិដកសេចក្តីទុកចិត្តនោះឲ្យសភាបោះឆ្នោត។ លោកកាស៊ីម ស៊ូរីដែលជាមនុស្សជំនិតម្នាក់របស់លោកអ៊ីមរ៉ាន់ ខាន់បានយល់ឃើញថា ញត្តិដកសេចក្តីទុកចិត្តស្នើឡើងដោយក្រុមគណបក្សប្រឆាំងផ្ទុយនឹងច្បាប់រដ្ឋធម្មនុញ្ញ និងបានផ្ចុងផ្តើមឡើងដោយក្រុមមហាអំណាចបរទេស។ នៅប៉ុន្មាននាទីក្រោយរួចផុតពីញត្តិដកសេចក្តីទុកចិត្ត លោកអ៊ីមរ៉ាន់ ខាន់បានថ្លែងតាមកញ្ចក់ទូរទស្សន៍ដោយស្នើប្រធានាធិបតីលោកអាហ្វៀរ អាល់វីឲ្យរំលាយសភា និងរៀបចំបោះឆ្នោតសភាមុនអាណត្តិ។
សំណើត្រូវបានប្រធានាធិបតីយល់ព្រមដោយគ្មានរារែក។ ការរំលាយសភានេះនឹងតម្រូវឲ្យមានការរៀបចំបោះឆ្នោតសភាមុនអាណត្តិក្នុងរយៈពេល ៩០ថ្ងៃខាងមុខ។ គួរបញ្ជាក់ថានាសប្តាហ៍កន្លងទៅ គណបក្សកាន់អំណាចរបស់លោកអ៊ីមរ៉ាន់ ខាន់បានបាត់បង់សំឡេងភាគច្រើននៅសភាដោយមានគណបក្សដៃគូមួយបានប្រកាសថា មានអ្នកតំណាងរាស្រ្តរបស់ខ្លួនចំនួន ៧រូបនឹងបោះឆ្នោតជាមួយក្រុមប្រឆាំង។ ទន្ទឹមគ្នានេះ មានអ្នកតំណាងរាស្រ្តជាង ១២នាក់របស់គណបក្សកាន់អំណាចបានរត់ទៅចុះចូលជាមួយគណបក្សប្រឆាំង។
លោកអ៊ីមរ៉ាន់ ខាន់ធ្លាប់បានចោទក្រុមប្រឆាំងជាចោរ កំសាក និងប្រើគ្រប់ឧបាយកលដើម្បីប្រឆាំងលោក។ ទន្ទឹមគ្នានេះ លោកអ៊ីមរ៉ាន់ ខាន់បានចោទអាមេរិកពីបទលូកដៃកកូរកកាយរឿងផ្ទៃក្នុងរបស់ប៉ាគីស្ថាន។ តាមកាសែតក្នុងស្រុក លោកអ៊ីមរ៉ាន់ ខាន់បានទទួលរបាយការណ៍មួយពីឯកអគ្គរដ្ឋទូតប៉ាគីស្ថានប្រចាំក្រុងវ៉ាស៊ីនតោន។ នៅក្នុងរបាយការណ៍នោះ មន្រ្តីជាន់ខ្ពស់អាមេរិកម្នាក់បានប្រាប់រូបឯកអគ្គរដ្ឋទូតប៉ាគីស្ថានថា ទំនាក់ទំនងរវាងអាមេរិក និងប៉ាគីស្ថាននឹងប្រសើរឡើង បើលោកអ៊ីមរ៉ាន់ ខាន់ចុះចេញពីតំណែង។ តែរដ្ឋបាលអាមេរិកបានបដិសេធលើសម្តីនេះ។
តាមលោកអ៊ីមរ៉ាន់ ខាន់ អាមេរិកមិនសប្បាយចិត្តដែលឃើញលោកមានជំហរមិនដូចអាមេរិកទាក់ទងនឹងរុស្ស៊ី និងចិន។ ដោយឡែក អ្នកវិភាគខ្លះបានមើលឃើញថា លោកអ៊ីមរ៉ាន់ ខាន់ក៏បានបាត់បង់ការគាំទ្រពីកងទ័ពដែលជាតួអង្គសំខាន់នៅក្នុងនយោបាយប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ