មន្ត្រីការទូតអាមេរិក លើកឡើងថាថ្ងៃទី១៥មេសា កូរ៉េខាងជើងអាចនឹងសាកអាវុធនុយក្លេអ៊ែរធុនធំ
មន្ត្រីក្រសួងការបរទេសអាមេរិក ទទួលបន្ទុកកិច្ចការកូរ៉េខាងជើង បានលើកឡើងថា កូរ៉េខាងជើង មិនខ្វក់យកចិត្តទុកដាក់ នឹងការប្រឹងប្រែងរកផ្លូវចរចា ដែលអាមេរិកបានព្យាយាមនោះទេ។ ផ្ទុយទៅវិញ របបផ្តាច់ការនេះ កំពុងតែត្រៀមសាកអាវុធនុយក្លេអ៊ែរធុនធំ ថ្មីមួយទៀត នៅរវាងពាក់កណ្តាលខែមេសានេះ។ យោងតាមអ្នកជំនាញនេះ កូរ៉េខាងជើង អាចនឹងយកថ្ងៃទី១៥មេសា ដែលជាថ្ងៃខួបគម្រប់១១០ឆ្នាំ នៃកំណើតរបស់ គីម អ៊ីលស៊ុង ធ្វើជាថ្ងៃបង្ហាញ បង្អួតសមត្ថភាពអាវុធនុយក្លេអ៊ែររបស់ខ្លួន។
ចុះផ្សាយនៅថ្ងៃ៖
លោក ស៊ុង គីម មន្ត្រីក្រសួងការបរទេសអាេមរិក ទទួលបន្ទុកសំណុំរឿងកូរ៉េខាងជើង បានលើកឡើងថា កូរ៉េខាងជើង កំពុងត្រៀមធ្វើតេស្តសាកល្បងអាវុធនុយក្លេអ៊ែរធុនធំមួយ នៅថ្ងៃទី១៥មេសាខាងមុខ។ ថ្ងៃ១៥មេសា ជាថ្ងៃខួបគម្រប់១១០ឆ្នាំ របស់បិតារបបផ្តាច់ការកូរ៉េខាងជើង គីម អ៊ីលស៊ុង។
គួររំលឹកថា កូរ៉េខាងជើងបានធ្វើតេស្តបាញ់អាវុធនុយក្លេអ៊ែរ តាំងតែពីឆ្នាំ២០០៦មក រហូតដល់ឆ្នាំ២០១៧ មុននឹងផ្អាក ដើម្បីបើកផ្លូវចរចាជាមួយរដ្ឋាភិបាលលោកដូណាល់ ត្រាំ។ ក៏ប៉ុន្តែមួយរយៈចុងក្រោយនេះ ក្រសួងការបរទេសអាមេរិកអះអាងថា កូរ៉េខាងជើង បានបង្ហាញជំហរ មិនស្តាប់ មិនខ្វល់ ចំពោះការបោះដៃហុចពីអាមេរិក ដើម្បីចរចាទេ។ ផ្ទុយទៅវិញ កូរ៉េខាងជើងបានធ្វើតេស្តបាញ់បង្ហោះអាវុធកាន់តែញឹក នោះដើមឆ្នាំ២០២២នេះ។
លោក ស៊ុង គីម បានប្រាប់អ្នកកាសែតថា កូរ៉េខាងជើង មិនព្រមឆ្លើយអ្វីទាំងអស់ ចំពោះសារដែលភាគីអាមេរិកបានផ្ញើទៅ ដើម្បីហៅឲ្យជួបចរចាគ្នា ដោយគ្មានកំណត់លក្ខខណ្ឌបឋមនោះទេ។ នេះគឺជារឿងមួយគួរឲ្យសោកស្តាយខ្លាំងណាស់។ បានបន្ថែមថា ជាងនេះទៀត ទាំងចិន ទាំងរុស្ស៊ី គ្មាននរណាចូលរួមជួយ ដើម្បីជំរុញឲ្យកូរ៉េខាងជើងងាកមករកផ្លូវចរចា ជាមួយអាមេរិកឡើុយ។
គួរបញ្ជាក់ថា គិតចាប់ពីលោកចូ បៃដិន បានចូលកាន់អំណាច កូរ៉េខាងជើង បានសាកល្បងមីស៊ីល ចំនួន១៣លើក ក្នុងនោះមានគឺមានអាវុធមីស៊ីលបាលីស្ទីក ដែលអាចបំពាក់ក្បាលគ្រាប់នុយក្លេអ៊ែរថែមទៀតផង។ លោកប្រធានាធិបតីថ្មីរបស់កូរ៉េខាងត្បូង ធ្លាប់បានអះអាងថា ចង់បើកការវាយប្រហារលើកូរ៉េខាងជើងឲ្យបានមុន ដើម្បីផ្តួលរំលំរបបផ្តាច់ការនេះ។ ក៏ប៉ុន្តែ កាលពីថ្ងៃអង្គារ គីម យ៉ូជុង ប្អូនស្រីរបស់គីម ជុងអ៊ុន បានប្រកាសគំរាមថា កូរ៉េខាងជើង នឹងប្រើអាវុធនុយក្លេអ៊ែរ ដើម្បីកម្ទេចកងទ័ពកូរ៉េខាងត្បូង ប្រសិនបើកូរ៉េខាងត្បូង ហ៊ានតែបើកការវាយប្រហារមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ