សមាជិកព្រឹទ្ធសភាអាមេរិកទៅបំពេញទស្សនកិច្ចនៅតៃវ៉ាន់ទោះមានការព្រមានពីចិន
សមាជិកព្រឹទ្ធសភាអាមេរិកមួយក្រុមបានធ្វើដំណើរទៅដល់តៃវ៉ាន់ នៅថ្ងៃព្រហស្បតិ៍ នៅក្នុងដំណើរទស្សនកិច្ចរយៈពេលពីរថ្ងៃ ដែលស្ថានតំណាងអាមេរិកប្រចាំទីក្រុងតៃប៉ិបានឲ្យដឹងថា ដើម្បីជជែកអំពីទំនាក់ទំនងទ្វេភាគី អាមេរិក-តៃវ៉ាន់ ក៏ដូចជា អំពីបញ្ហាសន្តិសុខ នៅក្នុងតំបន់។ ដំណើរទស្សនកិច្ចដែលទទួលនូវការព្រមានពីសំណាក់រដ្ឋាភិបាលក្រុងប៉េកាំងថានឹងចាត់វិធានការតបវិញធ្ងន់ធ្ងរ។
ចុះផ្សាយនៅថ្ងៃ៖
គណៈប្រតិភូសមាជិកព្រឹទ្ធសភាអាមេរិក ដែលទៅបំពេញទស្សនកិច្ច នៅតៃវ៉ាន់នៅពេលនេះ ដឹកនាំដោយឥស្សរជនពីររូប គឺលោក Lindsey Graham សមាជិកព្រឹទ្ធសភាមកពីគណបក្សសាធារណរដ្ឋ ដែលគេស្គាល់ជាទូទៅថាជាអ្នកដែលតែងតែប្រកាន់នូវជំហរតឹងរ៉ឹងចំពោះចិន និងលោក Bob Menendez មកពីគណបក្សប្រជាធិបតេយ្យ និងជាប្រធានគណៈកម្មការទំនាក់ទំនងអន្តរជាតិរបស់ព្រឹទ្ធសភា។
យោងតាមក្រសួងការបរទេសតៃវ៉ាន់ នៅក្នុងអំឡុងដំណើរទស្សនកិច្ចពីរថ្ងៃនេះ គណៈប្រតិភូព្រឹទ្ធសភាអាមេរិកនឹងចូលជួបលោកស្រីប្រធានាធិបតី សៃ អ៊ីងវេន ហើយក៏នឹងជួបផងដែរជាមួយរដ្ឋមន្រ្តីក្រសួងការបរទេស និងមន្រ្តីក្រសួងការពារជាតិតៃវ៉ាន់។
តាំងពីមុនពេលដែលគណៈប្រតិភូព្រឹទ្ធសភាអាមេរិកទៅដល់តៃវ៉ាន់ រដ្ឋាភិបាលចិន តាមរយៈអ្នកនាំពាក្យក្រសួងការបរទេស បានព្រមានទុកជាមុនរួចជាស្រេចថា ដំណើរទស្សនកិច្ចនេះ គឺជាការនាំទៅរកគន្លងផ្លូវមួយដ៏គ្រោះថ្នាក់ ហើយថា ចិននឹងចាត់វិធានការយ៉ាងខ្លាំងក្លាតបមកវិញ ដើម្បីធ្វើយ៉ាងណាធានានូវអធិបតេយភាព និងបូរណភាពទឹកដីរបស់ខ្លួន។
គួរបញ្ជាក់ថា នៅថ្ងៃព្រហស្បតិ៍នេះដែរ នៅពេលដែលគណៈប្រតិភូព្រឹទ្ធសភាអាមេរិកធ្វើដំណើរទៅដល់តៃវ៉ាន់ គណៈប្រតិភូសភាមួយផ្សេងទៀត មកពីស៊ុយអែត ក៏កំពុងតែបំពេញទស្សនកិច្ច នៅតៃវ៉ាន់នោះដែរ ដោយសមាជិកសភាមួយរូបនៅក្នុងចំណោមគណៈប្រតិភូស៊ុយអែតនោះបានប្រាប់អ្នកសារព័ត៌មានថា គោលដៅចម្បងនៃដំណើរទស្សនកិច្ចរបស់ពួកគេ គឺចង់បង្ហាញអំពីការគាំទ្ររបស់អឺរ៉ុបចំពោះតៃវ៉ាន់។
គេសង្កេតឃើញថា ចាប់តាំងពីផ្ទុះសង្គ្រាមនៅអ៊ុយក្រែនមក ទាំងតៃវ៉ាន់ផ្ទាល់ខ្លួនឯង និងទាំងប្រទេសដែលគាំទ្រតៃវ៉ាន់ នាំគ្នាបារម្ភខ្លាចចិនដើរតាមគន្លងរបស់រុស្ស៊ី ហើយលើកទ័ពចូលឈ្លានពាន យកតៃវ៉ាន់មកដាក់បញ្ចូលក្នុងទឹកដីចិនវិញ។ តៃវ៉ាន់ដែលស្ថិតក្រោមការគ្រប់គ្រងដោយរបបនយោបាយដាច់ដោយឡែកពីចិន ប្រៀបបាននឹងរដ្ឋឯករាជ្យមួយអស់រយៈពេលជាច្រើនទសវត្សរ៍មកហើយ ក៏ប៉ុន្តែ ចិននៅតែចាត់ទុកថាជាដែនដីមួយរបស់ខ្លួន ដោយមេដឹកនាំចិន តែងតែបានសន្យាថានឹងយកតៃវ៉ាន់នេះមកដាក់ក្រោមការគ្រប់គ្រងរបស់ចិនវិញឲ្យបាននៅថ្ងៃណាមួយ ហើយអាចនឹងធ្វើដោយប្រើកម្លាំងទ័ព ប្រសិនបើចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ