អងគ្លេស-ឥណ្ឌា ព្រមព្រៀងគ្នាសហការលើវិស័យយុទ្ធសាស្ត្រសន្តិសុខនិងការពារជាតិ
នាយករដ្ឋមន្ត្រីអង់គ្លេស បូរីស ចនសុន បានប្រកាសថា អង់គ្លេសនិងឥណ្ឌា បានចុះកិច្ចព្រមព្រៀងសហការដៃគូទៅលើផ្អែកសន្តិសុខ និងការពារជាតិ។ សេចក្តីថ្លែងនេះ បានប្រកាសចេញពីថ្ងៃសុក្រ នៅក្នុងរដ្ឋធានីញូវដេលី ជាទីដែលនាយករដ្ឋមន្ត្រីអង់គ្លេស បំពេញទស្សនកិច្ចផ្លូវរដ្ឋចំនួនពីរថ្ងៃនៅឥណ្ឌា ។ ក្នុងផ្អែកវិនិយោគវិញ លោក បូរីស ចនសុន បានប្រកាសពីការវិនិយោគទុនថ្មីបន្ថែម ក្នុងទឹកប្រាក់១ពាន់លានលីវ្រ ប្រហែល១,២ពាន់លានអឺរ៉ូ និងដែលអាចនឹងបង្កើតការងារធ្វើ ចំនួន ១១ ០០០ ការងារ។ ចំពោះវិស័យការពារជាតិវិញ ប្រទេសទាំងពីរនឹងអភិវឌ្ឍបច្ចេកវិទ្យាសំខាន់ៗសម្រាប់ទប់ទល់នឹងការគំរាមសន្តិសុខសុវត្ថិភាព ដែល នាយករដ្ឋមន្ត្រី នរិន្ទ្រា ម៉ូឌី ថ្លែងដោយត្រេកអរថា ឥណ្ឌា បានរង់ចាំជាយូរមកហើយ។ ដោយឡែក វិស័យការងារសម្រាប់ជនជាតិឥណ្ឌាដែលធ្វើការនៅអង់គ្លេស គឺថ្នាក់ដឹកនាំទាំងពីរចង់ឲ្យមានកិច្ចព្រមព្រៀងទីផ្សារសេរីមួយ យ៉ាងយូរ នៅមុខដាច់ខែតុលាខាងមុខ។
ចុះផ្សាយនៅថ្ងៃ៖
ស្តាប់ - ០២:២៦
នាយករដ្ឋមន្ត្រីអង់គ្លេស បូរីស ចនសុន បានបញ្ជាក់ថា ប្រទេសទាំងពីរឯកភាពធ្វើការរួមគ្នាក្នុងវិស័យការពារជាតិ ដើម្បីទប់ទល់នឹងការគំរាមកំហែតាមផ្លូវ គោក ទឹក អាកាស និងលំហ ហើយនិងតាមប្រព័ន្ធព័ត៌មានវិទ្យា។ ចំពោះផ្លូវទឹក ភាគីទាំងពីរនឹងរួមគ្នាអភិវឌ្ឍប្រព័ន្ធបច្ចេកវិទ្យាទំនើបប្រើសម្រាប់យន្តហោះចម្បាំង និងសម្រាប់ចាប់មើលសញ្ញាអាសន្នគំរាមកំហែង នៅដែនសមុទ្រ។
ចំពោះឥណ្ឌា លោក ម៉ូឌី សប្បាយរីកថ្លើមប្រមាត់ ពីព្រោះថា រដ្ឋបាលក្រុងញូវដេលី ខំប្រឹងរុករកជាយូរមកហើយ សមត្ថភាពការពារជាតិផ្នែកជើងទឹក និងចង់ផ្តួចផ្តើមផលិតអាវុធ ជាស្នាដៃធ្វើនៅក្នុងស្រុកឥណ្ឌា ហើយក៏ចង់កាត់បន្ថយការពឹងបរទេស ពិសេសគឺរុស្ស៊ី។ សំណុំរឿងរុស្ស៊ី គឺរស៊ើបខ្លាំងចំពោះឥណ្ឌា ព្រោះឥណ្ឌាពឹងច្រើនផ្អែកលើការនាំចូលសព្វាវុធរុស្ស៊ី។ ញូវដេលីមានទំនាក់ទំនងចាស់វស្សាជាមួយក្រុងម៉ូស្កូ ដូច្នេះហើយ ក្នុងសង្គ្រាមឈ្លានពានរុស្ស៊ីទៅលើអ៊ុយក្រែន ឥណ្ឌាក៏មិនសូវជាហ៊ានអារកាត់ដាច់ណាត់ដែរ។ ពោលគឺឥណ្ឌាមិនថ្កោលទោសរុស្ស៊ីជាចំហ ដូចសម្ព័ន្ធមិត្តនៅបច្ចិមលោក នោះឡើយ។ ចំណែកសំណុំបញ្ហាជាមួយចិនវិញ ឥណ្ឌា គឺជាក្រុមប្រទេសសម្ព័ន្ធមិត្តជាមួយអាមេរិក ជប៉ុន និងអូស្ត្រាលី ដែលត្រូវគេចាត់ទុកថាជាក្រុមប្រទេស ប្រឆាំងនឹងចិន។
ជាជំហររបស់មហាយក្សអាស៊ីខាងត្បូង នាយករដ្ឋមន្ត្រី ឥណ្ឌា នរិន្ទ្រា ម៉ូឌី បង្ហើបថា ថ្នាក់ដឹកនាំទាំងពីរប្រទេស ពិភាក្សាគ្នាបានផ្លែផ្កាលើច្រើនចំណុច ស្តីពីការអភិវឌ្ឍតំបន់និងអន្តរជាតិ ព្រមទាំងបានមូលមាត់គ្នាយ៉ាងច្បាស់លាស់ចំពោះតំបន់ឥណ្ឌូ-ប៉ាស៊ីហ្វីក ដែលសេរី បើកចំហ បរិយាប័ន្ន និងផ្អែកលើគោលការណ៍ច្បាប់។
ក្នុងពេលមានវត្តមាននៅប្រទេសអាស៊ីដ៏ធំនេះ នាយករដ្ឋមន្ត្រី បូរីស ចនសុន មានប្រសាសន៍ថា ឥណ្ឌា ជាប្រទេសប្រជាធិបតេយ ធំជាងគេ ហើយ អង់គ្លេស ជាប្រទេសប្រជាធិបតេយ្យ ចាស់ជាងគេ។ ពីចំណែកខ្លួន លោក នរិន្ទ្រា ម៉ូឌី ចាត់ទុកទស្សនកិច្ចរបស់លោកនាយករដ្ឋមន្ត្រីអង់គ្លេសនៅរដ្ឋធានីញូវដេលី ថាជាព្រឹត្តិការណ៍ប្រវត្តិសាស្ត្រ។ ដ្បិតថា ដំណើរទស្សនកិច្ចនេះ គឺមិនចៃដន្យទេ ព្រោះត្រូវស្របពេលនឹងការប្រព្រឹត្តទៅនៃបុណ្យខួប៧៥ឆ្នាំនៃឯករាជ្យជាតិឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ