ជប៉ុន និងកូរ៉េខាងត្បូងចង់ផ្តល់សន្ទុះឡើងវិញនូវទំនាក់ទំនងដែលបំពុលដោយរឿងអតីតកាល
នៅក្នុងប្រទេសជប៉ុន នាយករដ្ឋមន្រ្តីលោកហ៊្វូមីអូ គីស្ហ៊ីដាបាននិយាយប្រាប់គណៈប្រតិភូកូរ៉េខាងត្បូងនៅក្រុងតូក្យូនាថ្ងៃអង្គារ ទី២៦ មេសានេះថា ជប៉ុន និងកូរ៉េខាងត្បូងមិនអាចអនុញ្ញាតឲ្យបាត់បង់ពេលវេលាដើម្បីបង្កើនទំនាក់ទំនងរវាងគ្នាបានទេ។ គួររម្លឹកថា ជប៉ុន និងកូរ៉េខាងត្បូងដែលជាសម្ព័ន្ធមិត្តជាមួយអាមេរិកដូចគ្នាកំពុងបន្តមានទំនាក់ទំនងរកាំរកូសដោយសារតែសំណុំរឿងអតីតកាលសល់ពីសម័យសង្រ្គាមលោកលើកទី២។
ចុះផ្សាយនៅថ្ងៃ៖
ស្តាប់ - ០២:១១
គឺប្រធានាធិបតីកូរ៉េខាងត្បូងជាប់ឆ្នោតថ្មីថ្មោងលោកយូន ស៊ុកយោលដែលបានបញ្ជូនគណៈប្រតិភូកូរ៉េខាងត្បូងទៅកាន់ប្រទេសជប៉ុន។ គោលដៅ គឺដើម្បីផ្តល់សន្ទុះឡើងវិញនូវទំនាក់ទំនងរវាងប្រទេសទាំងពីរក្នុងនាមជាប្រទេសប្រជាធិបតេយ្យ ជាប្រទេសមានសេដ្ឋកិច្ចសេរី និងជាប្រទេសដែលមានសម្ព័ន្ធមិត្តអាមេរិករួមដូចគ្នា។ « ដោយសំឡឹងឃើញពីការគំរាមកំហែងសព្វថ្ងៃលើសណ្តាប់ធ្នាប់អន្តរជាតិ វាជាពេលវេលាដែលកិច្ចសហប្រតិបត្តិការយុទ្ធសាស្ត្រក្លាយជារឿងចាំបាច់ជាងពេលណាៗទាំងអស់ » នេះជាសំណេរនៅក្នុងសេចក្តីប្រកាសព័ត៌មានរបស់ក្រសួងការបរទេសជប៉ុន។
យោងតាមបណ្តាញសារព័ត៌មានជប៉ុន គណៈប្រតិភូកូរ៉េខាងត្បូងបានប្រគល់ឲ្យនាយករដ្ឋមន្រ្តីជប៉ុនលោកហ៊្វូមីអូ គីស្ហ៊ីដានូវសំបុត្រមួយច្បាប់របស់ប្រធានាធិបតីកូរ៉េខាងត្បូងជាប់ឆ្នោតថ្មីលោកយូន ស៊ុកយោល។ តែគេមិនដឹងពីខ្លឹមសារនៅក្នុងសំបុត្រនោះទេ។ គួរបញ្ជាក់ថាក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងការទូត និងពាណិជ្ជកម្មរវាងជប៉ុន និងកូរ៉េខាងត្បូងបានស្គាល់ភាពតានតឹងខ្លាំង។ ភាពតានតឹងនេះកើនរឹតតែខ្លាំងនៅក្រោមអំណាចប្រធានាធិបតីកូរ៉េខាងត្បូងលោកមូន ចែអ៊ីនដែលមិនដែលបានទៅបំពេញទស្សនកិច្ចនៅជប៉ុន ហើយក៏មិនដែលទទួលនាយករដ្ឋមន្រ្តីជប៉ុនលើទឹកដីកូរ៉េខាងត្បូងដែរ។
តាមអ្នកជំនាញលោក Daniel Sneider រដ្ឋបាលកូរ៉េខាងត្បូងថ្មីរបស់ប្រធានាធិបតីលោកយូន ស៊ុកយោលដែលនឹងចូលកាន់តំណែងនៅថ្ងៃទី១០ ឧសភាខាងមុខចង់បង្កើនទំនាក់ទំនងជាមួយជប៉ុន។ តែលោក Sneider បានរម្លឹកថា ក្រុងសេអ៊ូលមានការប្រយ័ត្នប្រយែងដោយមិនព្យាយាមដាក់សំណុំរឿងទាំងអស់លើតុដើម្បីជជែកភ្លាមៗទេ ពិសេសសំណុំរឿងអតីតកាលដ៏រសើប និងចម្រូងចម្រាសដែលពិបាកដោះស្រាយ។ សំណុំរឿងអតីតកាលដែលលោក Sneider ចង់និយាយ គឺការដែលទាហានជប៉ុនបានបង្ខំឲ្យស្រ្តីកូរ៉េបម្រើផ្លូវភេទក្នុងសម័យសង្រ្គាមលោកលើកទី២ ដែលឧបទ្វីបកូរ៉េបានស្ថិតក្រោមអាណានិគមនិយមជប៉ុនពីឆ្នាំ ១៩១០ ដល់ឆ្នាំ ១៩៤៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ