ឥណ្ឌា និងប៉ាគីស្ថាន កំពុងរងរលកកម្តៅក្តៅហួតហែងជ្រុល ខុសរដូវ
រលកកម្តៅ ក្តៅហួតហែងខ្លាំង ហួសកំណត់ត្រា កំពុងគ្របដណ្តប់លើប្រទេសឥណ្ឌានិងប៉ាគីស្ថាន។ សីតុណ្ហភាពបានឡើងហួសមធ្យមភាគប្រចាំរដូវ ដោយទែរម៉ូម៉ែត្រចង្អុលដល់ ៤០ ទៅ៤៥អង្សា។ បាតុភូតក្តៅខុសប្រក្រតីនេះ ជាតំណាងក្តីព្រួយបារម្ភខ្លាំង ព្រោះរដូវក្តៅមិនទាន់ចាប់ផ្តើមផង។
ចុះផ្សាយនៅថ្ងៃ៖
ស្តាប់ - ០១:៥៨
រដូវផ្ការីកមិនទាន់ចប់ផង រដូវរាំងស្ងួតបានចូលមកដល់ទៅហើយ។ សីតុណ្ហភាព ឡើងខ្ពស់មិនធ្លាប់មានគិតចាប់តាំងពីឆ្នាំ១៩៤៦មក ៖ ៤០អង្សា កាលពីខែមីនា- ៤៥អង្សា នៅខែមេសា និងដល់ទៅ៤៦អង្សានៅថ្ងៃព្រហស្បតិ៍ទី ២៨មេសា នៅក្រុងញូវដេលី។ នេះបើតាមការព្យាកររបស់ភ្នាក់ងារឧតុនិយមឥណ្ឌា ដែលចេញអនុសាសន៍ឱ្យប្រជាពលរដ្ឋទន់ខ្សោយកុំចេញក្រៅផ្ទះ។ សម្រាប់អ្នកជំនាញ អាកាសធាតុក្តៅហួតហែងខ្លាំងនេះ ជាប្រភពនាំឱ្យមានអគ្គីភ័យជាច្រើន មានជាអាទិ៍អគ្គីភ័យនៅកន្លែងចាក់សំរាមរបស់រដ្ឋធានី ដែលឆាបឆេះឡើងតាំងពីបីថ្ងៃ និងដែលពុំទាន់អាចពន្លត់បាននៅឡើយផង។
នៅប្រទេសប៉ាគីស្ថាន អាជ្ញាធរបានប្រកាសអាសន្ន ក្តៅហួតហែងខ្លាំងតែម្តង ព្រោះសីតុណ្ហភាពបានឡើងហួសកំរិតមធ្យម ដល់៦ទៅ៨អង្សានៅភាគត្បូងប្រទេស និង៥ទៅ៧អង្សានៅភាគខាងជើង។ នេះបើតាមការពន្យល់របស់ទីប្រឹក្សាវិទ្យាសាស្ត្រនៃអង្គការអាកាសធាតុពិភពលោក។
ក្រៅពីពិបាកទ្រាំនឹងកម្តៅ អាកាសធាតុក្តៅហួតហែងខ្លាំង មុនរដូវ ជាតំណាងក្តីព្រួយបារម្ភខ្លាំង ខ្លាចតែរដូវវស្សាមូសុង ដែលនឹងនាំមកនូវភាពសើម ដែលនឹងចាប់ផ្តើមនៅពីរខែទៀតខាងមុខ មិនអាចជួយបញ្ចុះកម្តៅសីតុណ្ហភាពបាន។ បើគ្មានភ្លៀង ភាពសើមបូកនឹងសីតុណ្ហភាពក្តៅខ្លាំង នឹងធ្វើមនុស្ស សត្វមានជីវិតពិបាករស់ខ្លាំងណាស់។
ថ្វីបើពេលនេះ វាហាក់ដូចជាឆាប់បន្តិចក្នុងភ្ជាប់បាតុភូតក្តៅខ្លាំងមុនរដូវនៅឥណ្ឌានិងប៉ាគីស្ថាន ទៅនឹងការប្រែប្រួលអាកាសធាតុមែន តែហេតុការណ៍ជាក់ស្តែងនេះ ត្រូវគ្នានឹងអ្វីក្រុម អ្នកជំនាញអាកាសធាតុរបស់អង្គការសហប្រជាជាតិបានព្យាករណាស់។ នៅក្នុងរបាយការណ៍ចេញផ្សាយកាលពីខែកុម្ភៈ២០២២ អ្នកវិទ្យាសាស្ត្របានព្រមានថា បាតុភូតជំនួប ក្តៅ និងសើម ដែលនឹងធ្វើឱ្យអាស៊ីខាងត្បូង ក្លាយជាតំបន់រស់លែងកើត នឹងមានលេចឡើងកាន់តែញឹកញាប់ នាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ