កូរ៉េខាងជើងបាញ់សាកមីស៊ីលបាលីស្ទីកមួយគ្រាប់ មួយសប្តាហ៍មុនប្រធានាធិបតីថ្មីកូរ៉េខាងត្បូងចូលកាន់តំណែង
កាលពីថ្ងៃទី២៥មេសាកន្លងទៅ មេដឹកនាំផ្តាច់ការកូរ៉េខាងជើង គីម ជុងអ៊ុន បានប្រកាសថា នឹងពន្លឿនការអភិវឌ្ឍន៍សមត្ថភាពអាវុធនុយក្លេអ៊ែរ ឲ្យបានសម្រេចជោគជ័យ។ ស្រាប់តែនៅថ្ងៃពុធ ទី៤ឧសភានេះ យោងតាមការបញ្ជាក់ឲ្យដឹងពីកងទ័ពកូរ៉េខាងត្បូង គឺរបបផ្តាច់ការកូរ៉េខាងជើង បានបាញ់សាកល្បងមីស៊ីលបាលីស្ទីកមួយគ្រាប់ទៀត ដែលតាមការសង្ស័យ គឺជាមីស៊ីលឆ្លងទ្វីប អាចផ្ទុកក្បាលគ្រាប់នុយក្លេអ៊ែរ។ គួរកត់សំគាល់ថា ការបាញ់មីស៊ីលបាលីស្ទីករបស់កូរ៉េខាងជើងនេះ គឺបានធ្វើឡើងប្រមាណ១សប្តាហ៍ មុនពេលប្រធានាធិបតីថ្មីរបស់កូរ៉េខាងត្បូង ចូលកាន់អំណាចជាផ្លូវការ។
ចុះផ្សាយនៅថ្ងៃ៖
ស្តាប់ - ០៣:០៥
យោងតាមអគ្គបញ្ជាការដ្ឋានកងទ័ពកូរ៉េខាងត្បូង នៅថ្ងៃពុធទី៤មេសា វេលាម៉ោង១២ថ្ងៃត្រង់ កូរ៉េខាងជើងបានបាញ់សាកល្បងមីស៊ីលបាលីស្ទីកមួយគ្រាប់ ចេញព្រលាយន្តហោះ Sunan ស្ថិតនៅខាងជើងក្រុងព្យុងយ៉ាង។ ប្រភពដដែលអះអាងថា មីស៊ីលបាលីស្ទីក នេះបានហោះបានចំងាយ ៤៧០គីឡូម៉ែត្រ ឡើងដល់កំពស់ ៧៨០គីឡូម៉ែត្រ មុននឹងធ្លាក់មកវិញ នៅក្នុងសមុទ្រជប៉ុន។ អគ្គបញ្ជាការដ្ឋានកងទ័ពកូរ៉េខាងត្បូង បានចាត់ទុកការបាញ់សាកល្បងនេះ ថាជាការបំពានយ៉ាងព្រហើនបំផុតរបស់កូរ៉េខាងជើង មកលើសេចក្តីសម្រេចចិត្តរួមនៃអង្គការសហប្រជាជាតិ។
លោក Makoto Oniki រដ្ឋមន្ត្រីការពារជាតិជប៉ុន បានបញ្ជាក់ថា មីស៊ីលបាលីស្ទីករបស់កូរ៉េខាងជើង បានធ្លាក់នៅក្រៅដែនសមុទ្រតំបន់សេដ្ឋកិច្ចផ្តាច់មុខរបស់ជប៉ុន។ លោកបានបន្ថែមថា ការបាញ់សាកល្បងអាវុធមីស៊ីល ម្តងហើយម្តងទៀតរបស់កូរ៉េខាងជើងនេះ គឺវាជាការគំរាមមកលើសន្តិភាព និងស្ថិរភាពរបស់ជប៉ុន ក៏ដូចជាតំបន់ទាំងមូល។
គួររំលឹកថា គិតចាប់ពីដើមឆ្នាំនេះមក កូរ៉េខាងជើងបានបាញ់បង្ហោះសាកល្បងមីស៊ីល ចំនួន១៤លើកហើយ។ កាលពីថ្ងៃទី២៥មេសា នៅក្នុងកម្មវិធីព្យុហយាត្រាកងទ័ព មេដឹកនាំផ្តាច់ការកូរ៉េខាងជើង គីម ជុងអ៊ុន បានប្រកាសថា នឹងប្រឹងប្រែងពន្លឿនការអភិវឌ្ឃន៍អាវុធនុយក្លេអ៊ែរ ទាំងគុណភាពនិងទាំងរយៈចំងាយរត់ ព្រោះអាវុធនុយក្លេអ៊ែរ គឺជានិម្មិតរូបនៃកម្លាំងរបស់កូរ៉េខាងជើង។ ក្រោយមក គីម ជុនអ៊ុន បានទទួលស្គាល់ទៀតថា អាវុធនុយក្លេអ៊ែរ គឺជាពោងសង្គ្រោះ ធានាការពារសន្តិសុខរបស់កូរ៉េខាងជើង ព្រមទាំងបានគំរាម ថាខ្លួនអាចសម្រេចបើកការវាយប្រហារមុន ដើម្បីជាការបង្ការការពារខ្លួន ថែមទៀតផង។
គួរកត់សំគាល់ដែរថា នៅប្រមាណមួយសប្តាហ៍ទៀត លោក Yoon Suk Yeol ប្រធានាធិបតីថ្មីរបស់កូរ៉េខាងត្បូង នឹងស្បថចូលកាន់អំណាចជាផ្លូវការ។ មេដឹកនាំកូរ៉េខាងត្បូងរូបនេះ ត្រូវគេដឹងថាមានគោលជំហររឹងរូសបំផុត ព្រមទាំងធ្លាប់បានអះអាងថា “ចង់វាយសំពងមេដឹកនាំកូរ៉េខាងជើង ដែលជាក្មេងឈ្លើយ ឲ្យស្គាល់ថ្នាំខ្លាំងម្តង”។
គួរបញ្ជាក់ដែរថា ការចរចាស្តីពីនុយក្លេអ៊ែរកូរ៉េខាងជើង បាននៅជាប់គាំងលែងទៅមុខ ប្រមាណជិត៣ឆ្នាំមកហើយ។ នៅចុងខែឧសភានេះ លោកចូ បៃដិន នឹងធ្វើដំណើរទៅកូរ៉េខាងត្បូង។ យោងតាមលោក Hong Min អ្នកជំនាញនៅវិទ្យាស្ថានដើម្បីការបង្រួបបង្រួមជាតិកូរ៉េ ការបាញ់មីស៊ីលបាលីស្ទីកកាន់តែញឹកញាប់របស់កូរ៉េខាងជើងនេះ គឺជាសញ្ញាប្រាប់ទៅប្រធានាធិបតីថ្មីរបស់កូរ៉េខាងត្បូង ថាខ្លួនមិនទទួលយកលក្ខខណ្ឌដែលទាមទារ ឲ្យកូរ៉េខាងជើងបោះបង់ចោលកម្មវិធីនុយក្លេអ៊ែរសិន មុននឹងបើកការចរចាសន្តិភាព។
ដោយឡែក យោងតាម លោក Cheong Seong-Chang អ្នកជំនាញនៅវិទ្យាស្ថាន Sejong គឺកូរ៉េខាងជើងធ្វើតេស្តមីស៊ីលកាន់តែញឹកញាប់នេះ ក៏ដោយសារតែដឹង ថាអង្គការសហប្រជាជាតិមិនអាចធ្វើអ្វីបានទេ ព្រោះមានរុស្ស៊ីជាអ្នកបោះឆ្នោតវ៉េតូ។ ដោយដឹងថាសហគមអន្តរជាតិ គិតបារម្ភតែបញ្ហាសង្គ្រាមនៅអ៊ុយក្រែន កូរ៉េខាងជើងឆក់ឱកាស ដើម្បីបាញ់សាកល្បងអាវុធ ឲ្យបានច្រើនបំផុត ហើយឈានទៅពង្រឹងសមត្ថភាពអាវុធឲ្យកាន់តែលឿន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ