កូរ៉េខាងជើងបាញ់សាកល្បងមីស៊ីលបាលីស្ទិកចេញពីនាវាមុជទឹក
ក្នុងរវាងតែបីថ្ងៃ កូរ៉េខាងជើងបាញ់សាកល្បងមីស៊ីលបាលីស្ទិកដល់ទៅ២លើក។ តាមកងទ័ពកូរ៉េខាងត្បូង នៅរសៀលថ្ងៃសៅរ៍នេះ កូរ៉េខាងជើងបានបាញ់សាកល្បងមីស៊ីលបាលីស្ទិក ចេញពីមូលដ្ឋានទ័ពជើងទឹកមួយនាភាគខាងកើតប្រទេស។ កូរ៉េខាងជើងបាញ់សាកល្បងមីស៊ីល នៅមួយថ្ងៃក្រោយដែលក្រសួងការបរទេសអាមេរិកអះអាងថា កូរ៉េខាងជើងកំពុងត្រៀមខ្លួន រៀបចំបាញ់សាកល្បងគ្រាប់បែកនុយក្លេអ៊ែរ ដែលកូរ៉េខាងជើងបានខកខាន ធ្វើតាំងពីឆ្នាំ ២០១៧មក។
ចុះផ្សាយនៅថ្ងៃ៖
កូរ៉េខាងជើងបានផ្គើនការដាក់ទណ្ឌកម្មរបស់អង្គការសហប្រជាជាតិ ដោយបានបង្កើនការបាញ់សាកល្បងមីស៊ីល ដល់ទៅ ១៦ដង ក្នុងរយៈពេល១ឆ្នាំ ដែលនៅក្នុងនោះមានផងដែរ មីស៊ីលបាលីស្ទិកអន្តរទ្វីប។
ជាក់ស្តែង កូរ៉េខាងជើងបានបាញ់សាកល្បងមីស៊ីលបាលីស្ទិក ជាទី២ នៅសប្តាហ៍នេះ បន្ទាប់ពីបានបាញ់សាកមីស៊ីលកាលពីថ្ងៃ ពុធ កន្លងទៅ។ តាមអគ្គបញ្ជាការដ្ឋានកងទ័ពកូរ៉េខាងត្បូង នៅថ្ងៃសៅរ៍នេះ គេចាប់បានសញ្ញាមីស៊ីលបាលីស្ទិក ចម្ងាយខ្លី ដែលកូរ៉េខាងជើងបានបាញ់ចេញពីមូលដ្ឋានទ័ពជើងទឹក នៅSinpo ភាគខាងកើតកូរ៉េខាងជើង។
ដោយសារមីស៊ីលមានប្រភពចេញពីមូលដ្ឋានទ័ពជើងទឹក គេជឿថា កូរ៉េខាងជើងអាចបាញ់សាកល្បង មីស៊ីលបាលីស្ទិក ចេញពីនាវាមុជទឹក ដែលកូរ៉េខាងជើងកំពុងសម្រួចសម្រាំងខ្លាំង ដើម្បីបង្កើនសមត្ថភាពវាយប្រហារ នៅកន្លែងឆ្ងាយៗ ពីកូរ៉េខាងជើង។
នៅក្នុងឱកាសត្រួតពលកងទ័ព ដែលដើរក្បួនព្យុហយាត្រា កាលពីថ្ងៃទី ២៥ មេសាកន្លងទៅ មេដឹកនាំកូរ៉េខាងជើង លោកគីមជុងអ៊ុន ធ្លាប់បានប្រកាសថា កូរ៉េខាងជើងនឹងប្រឹងប្រែងពន្លឿនការអភិវឌ្ឍអាវុធនុយក្លេអ៊ែរក្នុងល្បឿនដ៏លឿនបំផុត។
នៅថ្ងៃសុក្រម្សិលមិញ អាមេរិកបានប៉ាន់ប្រមាណថា ព្យុងយ៉ាងកំពុងរៀបចំបាញ់សាកល្បងអាវុធនុយក្លេអ៊ែររបស់ខ្លួនសាជាថ្មី នៅទីតាំងPunggye-ri ដែលកូរ៉េខាងជើងបានផ្អាកបិទ តាំងពីឆ្នាំ ២០១៧មក។
គួររំលឹកថា នៅប៉ុន្មានខែមុនបើកជំនួបទ្វេភាគីជាមួយ ប្រធានាធិបតីអាមេរិក កាលពីឆ្នាំ ២០១៨ របបព្យុងយ៉ាងបាននាំអ្នកកាសែតបរទេសឲ្យចូលទៅមើលពិធីបំផ្ទុះបំផ្លាញ ទីតាំង Punggye-ri ដែលកូរ៉េខាងជើងធ្លាប់ប្រើប្រាស់ជាទីតាំងបាញ់សាកល្បងគ្រាប់បែកនុយក្លេអ៊ែរ។
បើតាមអ្នកនាំពាក្យរបស់ក្រសួងការបរទេស បន្ទាប់ពីផ្អាកសកម្មភាព អស់ ៥ឆ្នាំ កូរ៉េខាងជើងនឹងអាចចាប់ផ្តើមកម្មវិធីបាញ់សាកល្បងគ្រាប់បែកនុយក្លេអ៊ែរ នាពេលឆាប់ៗខាងមុខ នៅក្នុងអំឡុងខែ ឧសភា ពោលគឺអាចនៅចំថ្ងៃដែលប្រធានាធិបតីថ្មីរបស់កូរ៉េខាងត្បូងស្បថចូលកាន់តំណែង នៅថ្ងៃទី ១០ឧសភា ឬនៅអំឡុងទស្សនកិច្ចរបស់ប្រធានាធិបតីអាមេរិកនៅកូរ៉េខាងត្បូង និងជប៉ុន ដែគ្រោងប្រព្រឹត្តទៅនៅខែឧសភានេះដែរ។
បើសិនការអះអាងរបស់អាមេរិកជារឿងពិត នោះ វាជាលើកទី ៧ ដែលកូរ៉េខាងជើងបាញ់សាកល្បងគ្រាប់បែកនុយក្លេអ៊ែរ។ អ្នកជំនាញវាយតម្លៃថា ដោយបង្កើនការសាកល្បងបាញ់មីស៊ីល និងអាចចាប់ផ្តើមសកម្មភាពសាកល្បងគ្រាប់បែកនុយក្លេអ៊ែរកូរ៉េខាងជើងចង់ដាក់សម្ពាធលើអនាគតប្រធានាធិបតីកូរ៉េខាងត្បូង លោក យុន សុខយុល ដែលធ្លាប់រិះគន់រដ្ឋាភិបាលមុនថា បរាជ័យ ក្នុងការចរចាជាមួយកូរ៉េខាងជើង។ គេរំពឹងថា នៅក្នុងជំនួបជាមួយប្រធានាធិបតី អាមេរិកនៅទីក្រុងសេអ៊ូល អនាគតប្រធានាធិបតីថ្មីរបស់កូរ៉េខាងត្បូង ដែលប្រកាន់ជំហរតឹងរ៉ឹងជាមួយកូរ៉េខាងជើង នឹងស្នើឲ្យអាមេរិកបង្កើនគ្រឿងសព្វាវុធ និងការពង្រាយទ័ពបន្ថែមនៅទឹកដីកូរ៉េខាងត្បូង នៅចំពោះមុខការគំរាមកំហែងរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ