ស្រីលង្កាមាននាយករដ្ឋមន្ត្រីថ្មី តែមិនទាន់អាចដោះស្រាយវិបត្តិនយោបាយបាន
វិបត្តិនយោបាយនៅស្រីលង្កា នៅតែបន្តជាប់គាំង បើទោះជាមាននាយករដ្ឋមន្ត្រីថ្មី។ លោក រ៉ានីល វីក្រេម៉េស៊ីង្ហ (Ranil Wickremesingh) បានឡើងមកជំនួសលោក ម៉ាហ៊ីនដា រ៉ាចាប៉ាកសេ ដែលបានលាចុះពីតំណែង បន្ទាប់ពីមានបាតុកម្មហិង្សាតវ៉ានៅទូទាំងប្រទេស។ តែយ៉ាងណា លោកនាយករដ្ឋមន្ត្រីថ្មី នៅមិនទាន់អាចរៀបចំរដ្ឋាភិបាលចម្រុះបានទេ ដោយសារតែក្រុមបក្សប្រឆាំង មិនព្រមចូលរួម ហើយថែមទាំងបានទាមទារ ឲ្យរៀបចំការបោះឆ្នោតមុនអាណត្តិ ដើម្បីបង្កើតរដ្ឋាភិបាលដោយស្របច្បាប់។
ចុះផ្សាយនៅថ្ងៃ៖
ស្តាប់ - ០៣:១៣
លោក រ៉ានីល វីក្រេម៉េសស៊ីង្ហ អាយុ៧៣ឆ្នាំ ត្រូវបានគេជ្រើសរើស ឲ្យមកធ្វើជានាយករដ្ឋមន្ត្រីថ្មី របស់ស្រីលង្ការ ដែលកំពុងតែពើបប្រទះនឹងវិបត្តិនយោបាយ យ៉ាងក្តៅគគុក។ លោកនាយករដ្ឋមន្ត្រីថ្មី បានប្រកាសថា លោកចង់រៀបចំប្រទេស ឲ្យវិលត្រលប់ទៅរកការរីកចម្រើន ឲ្យប្រជាជនមានបាយហូប មួយថ្ងៃ៣ពេល និងឲ្យយុវជនមានពន្លឺសង្ឃឹមទៅថ្ងៃអនាគត។
គួររំលឹកថា លោករ៉ានីល វីក្រម៉េស៊ីង្ហ ធ្លាប់បានកាន់តំណែងនាយករដ្ឋមន្ត្រីស្រីលង្កា ចំនួន៥ដងមកហើយ គិតតាំងពីឆ្នាំ១៩៩៣មក។ លោកត្រូវគេស្គាល់ថា ជាមនុស្សមានទំនោរទៅបស្ចឹមលោក ហើយនិយមការដោះដូរពាណិជ្ជកម្មសេរី។ តែលើកនេះ វត្តមានរបស់លោក ហាក់មិនត្រូវបានគេស្វាគមន៍ប៉ុន្មានទេ ដោយការរៀបចំរដ្ឋាភិបាលចម្រុះ ដើម្បីឈានទៅបិទបញ្ចប់វិបត្តិ នៅតែមិនអាចធ្វើទៅបាន។ ក្រុមគណបក្សប្រឆាំងធំៗទាំង៣ បានបដិសេធ មិនចូលរួមនៅក្នុងរដ្ឋាភិបាលចម្រុះថ្មីនេះទេ។
លោក Harsha de Silva មេដឹកនាំធំម្នាក់ របស់គណបក្ស Samagi Jana Balawegaya SJB ដែលជាបក្សប្រឆាំងធំជាងគេនោះ បានលើកឡើងថា ប្រជាជនមិនត្រូវការ ការស៊ីសស៊ុះគ្នា សម្រុះសម្រួលគ្នាដើម្បីបែងចែងអំណាចនោះទេ។ តែប្រជាជនត្រូវការការដឹកនាំតាមប្រព័ន្ធថ្មី ដើម្បីអនាគតស្រុកទេស។ មេបក្សប្រឆាំងរូបនេះ បានបន្ថែមថា លោកនឹងបន្តចូលរួម តស៊ូជាមួយប្រជាជនដើម្បីធ្វើយ៉ាងណា ទម្លាក់លោក ហ្គោតាបាយ៉ា រ៉ាចាប៉ាកសេ ពីកៅអីប្រធានាធិបតីឲ្យបាន។ គណបក្សសម្ព័ន្ធជាតិតាមូល បានលើកឡើងថា រដ្ឋាភិបាលថ្មីដែលគេកំពុងព្យាយាមរៀបចំនេះ គឺគ្មានភាពស្របច្បាប់ទេ។
គួរបញ្ជាក់ថា ស្រីលង្កាកំពុងឆ្លងកាត់វិបត្តិសេដ្ឋកិច្ចដ៏ធ្ងន់ធ្ងរបំផុត។ បញ្ហាគ្មានទំនិញចាំបាច់ ព្រមជាមួយតម្លៃឡើងកប់ពពក បានរុញច្រានឲ្យប្រជាជនចេញធ្វើបាតុកម្ម ឈានក្លាយជាអំពើហិង្សាទូទាំងប្រទេស។ ក្នុងសប្តាហ៍កន្លងទៅ មានមនុស្សយ៉ាងហោច៩នាក់ស្លាប់ និងរបួសប្រមាណជាង២០០នាក់ ដោយការបង្រ្កាបរបស់សមត្ថកិច្ច។ ជាមួយនឹងបំណុលក្រៅប្រទេស ចំនួនប្រមាណជាង៥ម៉ឺនលានដុល្លារ ស្រីលង្កាត្រូវបានគេប្រកាស ថាមិនអាចសងបំណុលបាន កាលពីថ្ងៃទី១២មេសា។ មូលនិធិរូបិយវត្ថុអន្តរជាតិ កំពុងតែត្រូវពិចារណា ជួយសម្រួល និងផ្តល់ប្រាក់ខ្លះមកជួយស្រីលង្កា។ បច្ចុប្បន្ន ប្រទេសនេះ ត្រូវការប្រាក់ចំនួន ៨៥លានដុល្លារជាប្រចាំថ្ងៃ ដើម្បីអាចចំណាយទិញទំនិញចាំបាច់។
នៅចំពោះមុខអ្នកកាសែត លោក Anura Dissanayake មេដឹកនាំគណបក្សប្រឆាំងមួយទៀត ឈ្មោះសមរភូមិរំដោះប្រជាជន JVP បានលើកឡើងថា គេមិនអាចដោះស្រាយវិបត្តិសេដ្ឋកិច្ច ជាមួយនឹងរដ្ឋាភិបាលខុសច្បាប់បានទេ។ លោកម្នាក់នេះ បានអំពាវនាវឲ្យរៀបចំ ការបោះឆ្នោតមុនអាណត្តិ ដើម្បីបង្កើតរដ្ឋាភិបាលដោយស្របច្បាប់។តាមធម្មតាការបោះឆ្នោតសភាអាណត្តិថ្មី គឺត្រូវធ្វើនៅឆ្នាំ២០២៥។ តែយ៉ាងណា ជាមួយនឹងវិបត្តិសេដ្ឋកិច្ច ខ្វះទំនិញគ្រប់សព្វសារពើបែបនេះ គេពិបាកសង្ឃឹមណាស់ ថាស្រីលង្កា អាចមានលទ្ធភាពរៀបចំការបោះឆ្នោតមុនអាណត្តិ ព្រោះសូម្បីតែក្រដាស ដើម្បីបោះពុម្ពធ្វើបញ្ជីឈ្មោះអ្នកបោះឆ្នោត និងសន្លឹកឆ្នោត ក៏គ្មានផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ