ស្រីលង្កា៖ នាយករដ្ឋមន្ត្រីថ្មីបានទទួលការគាំទ្រពីបក្សប្រឆាំង ដើម្បីបង្កើត “រដ្ឋាភិបាលដោះស្រាយវិបត្តិសេដ្ឋកិច្ច”
ស្រីលង្កាកំពុងស្ថិតនៅជាប់គាំង ក្នុងវិបត្តិនយោបាយ នៅក្នុងបរិបទវិបត្តិសេដ្ឋកិច្ចដ៏ធ្ងន់ធ្ងរបំផុត។ កាលពីចុងសប្តាហ៍កន្លងទៅ លោកនាយករដ្ឋមន្ត្រីថ្មី រ៉ានីល វីក្រេមេស៊ីងហ្កេ បានព្យាយាមប្រមូលគណបក្សប្រឆាំងទាំងអស់ ឲ្យចូលរួមដើម្បីបង្កើតរដ្ឋាភិបាលចម្រុះ តែបក្សប្រឆាំងបានប្រកែកមិនចូលរួមទេ ព្រមទាំងបានទាមទារឲ្យលោក ប្រធានាធិបតី ហ្គោតាបាយ៉ា រ៉ាចាប៉ាកសេ ចុះចេញពីតំណែង។ តែយ៉ាងណា នៅថ្ងៃចន្ទទី១៦ឧសភា ក្រុមគណបក្សប្រឆាំងធំៗ បានប្តូរចិត្ត មកគាំទ្រការបង្កើតរដ្ឋាភិបាលថ្មី ដើម្បីដោះស្រាយវិបត្តិសេដ្ឋកិច្ច ដែលកំពុងតែបន្ទាន់បំផុត។
ចុះផ្សាយនៅថ្ងៃ៖
ស្តាប់ - ០២:៣៧
ការស្បថចូលកាន់តំណែងជាផ្លូវការ របស់រដ្ឋាភិបាលថ្មីស្រីលង្កា ដែលគ្រោងធ្វើនៅថ្ងៃចន្ទ ទី១៦ឧសភា បានលើកទៅធ្វើនៅថ្ងៃក្រោយវិញ ដោយសារពេលនេះ ក្រសួងសំខាន់ៗនៅមិនទាន់អាចរកមនុស្សមកដាក់បានទេ។ លោកនាយករដ្ឋមន្ត្រី រ៉ានីល វីក្រេមេស៊ីងហ្កេ កំពុងតែព្យាយាមបញ្ចុះបញ្ចូល ឲ្យមានការចូលរួមទូលំទូលាយ ពីបក្សនយោបាយទាំងអស់ ដើម្បីបិទបញ្ចប់វិបត្តិនយោបាយ និងឈានទៅដោះស្រាយវិបត្តិសេដ្ឋកិច្ច ដែលស្រីលង្កាកំពុងតែឆ្លងកាត់នាពេលនេះ។
គណបក្ស Samagi Jana Balawegaya ដែលជាបក្សប្រឆាំងធំជាងគេ បានប្រកាសថាខ្លួនគាំទ្រយ៉ាងពេញទំហឹង ចំពោះការប្រឹងប្រែងដោយសុទិដ្ឋិនិយម របស់លោកនាយករដ្ឋមន្ត្រីថ្មី ដើម្បីបង្កើតរដ្ឋាភិបាលដោះស្រាយវិបត្តិសេដ្ឋកិច្ច។ តែយ៉ាងណា គណបក្សនេះ នឹងមិនចូលរួមនៅក្នុងរដ្ឋាភិបាលចម្រុះទេ។ ក្នុងន័យនេះ គណបក្សប្រឆាំងដ៏ធំនេះ ហាក់បានបោះបង់ចោលការទាមទាររបស់ខ្លួនហើយ ដែលពីមុនមក បានទាមទារឲ្យលោកហ្គោតាបាយ៉ា រ៉ាចាប៉ាក់សេ ត្រូវតែចុះចេញពីកៅអីប្រធានាធិបតី ពុំនោះទេគេនឹងបន្តធ្វើបាតុកម្មជាមួយប្រជាជន។
ដោយឡែក គណបក្សប្រឆាំងមួយទៀតឈ្មោះ Sri Lanka Freedom Party SLFP ក៏បានបោះបង់ចោលការទាមទារដែរ ហើយបានប្តូរចិត្តចូលរួម នៅក្នុងរដ្ឋាភិបាលចម្រុះ ដឹកនាំដោយលោក រ៉ានីល វីក្រេមេស៊ីងហ្កេ។ លោក ម៉ៃធ្រីប៉ាឡា ស៊ីរីសេណា ប្រធានបក្សនេះ បានសរសេរលិខិតផ្ញើទៅលោកនាយករដ្ឋមន្ត្រីថ្មីថា បក្សលោកសម្រេចគាំទ្រចំពោះការសម្រេចទាំងឡាយ របស់រដ្ឋាភិបាលថ្មី ដែលត្រឹមត្រូវ ដើម្បីដោះស្រាយវិបត្តិសេដ្ឋកិច្ច និងសម្រួលការលំបាករបស់ប្រជាជន។
គួរកត់សំគាល់ថា គិតមកត្រឹមពេលនេះ មានតែក្រសួង៤ប៉ុណ្ណោះ ដែលមានរដ្ឋមន្ត្រី ចំណែកក្រសួងសំខាន់ៗដូចជាក្រសួងសេដ្ឋកិច្ចហិរញ្ញវត្ថុជាដើម នៅពុំទាន់មានរដ្ឋមន្ត្រីទេ។ តាមការឲ្យដឹង លោកនាយករដ្ឋមន្ត្រីស្រីលង្កា ចង់ទុកជម្រើសសំខាន់ៗ យកទៅចរចាជាមួយមូលនិធិរូបិយវត្ថុអន្តរជាតិ ដើម្បីទទួលបាននូវការធានាជួយផ្នែកហិរញ្ញវត្ថុ។
សូមបញ្ជាក់ថា ស្រីលង្កាកំពុងឆ្លងកាត់វិបត្តិសេដ្ឋកិច្ច គ្មានទំនិញប្រើប្រាស់ គ្មានប្រាក់ដុល្លារក្នុងធានាគារកណ្តាល។ ក្រៅពីគ្មានប្រាក់សងបំណុលបរទេស រដ្ឋាភិបាលស្រីលង្កា កំពុងតែព្យាយាមរកប្រាក់ ជំនួយបន្ថែម ដើម្បីអាចដោះស្រាយការចំណាយ និងទិញទំនិញប្រើប្រាស់ក្នុងស្រុក សម្រាប់ប្រជាជន។ កាលពីថ្ងៃអាទិត្យ លោកនាយករដ្ឋមន្ត្រី រ៉ានីល វីក្រេមេស៊ីងហ្កេ បានទាក់ទងនិយាយជាមួយ ស្ថាប័នហិរញ្ញវត្ថុអន្តរជាតិ ដូចជាធនាគារពិភពលោក ធនាគារអភិវឌ្ឍន៍អាស៊ី ដើម្បីទទួលបានវិធានការជួយជាបន្ទាន់ ឲ្យស្រីលង្កាអាចមានលទ្ធភាពទិញទំនិញចាំបាច់មួយចំនួន ដូចជាថ្នាំពេទ្យ ប្រេងឥន្ធនៈ ជីកសិកម្ម និងស្បៀងអាហារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ