លោកបៃដិនថាអាមេរិកនឹងចូលជួយតៃវ៉ាន់បើចិនឈ្លានពាន
នៅថ្ងៃចន្ទនេះ នៅក្នុងអំឡុងដំណើរទស្សនកិច្ចនៅក្នុងប្រទេសជប៉ុន លោកចូ បៃដិន បានប្រកាសឲ្យដឹង អំពីការបង្កើតដៃគូពាណិជ្ជកម្មអាស៊ីប៉ាស៊ីហ្វិក ជាមួយប្រទេសចំនួន ១៣ ដែលគេសំឡឹងឃើញថាជាដៃគូពាណិជ្ជកម្មបង្កើតឡើង ដើម្បីប្រជែងជាមួយចិន។ ក្នុងពេលជាមួយគ្នា លោកប្រធានាធិបតីអាមេរិកក៏បានលើកឡើងផងដែរ អាមេរិកនឹងចូលជួយតៃវ៉ាន់ប្រសិនបើមានការឈ្លានពានពីសំណាក់ចិន។
ចុះផ្សាយនៅថ្ងៃ៖
ការប្រកាសសន្យាចូលជួយតៃវ៉ាន់ទល់នឹងការឈ្លានពានពីសំណាក់ចិន អាចរាប់ថាជាការបង្ហាញជំហរដ៏តឹងរ៉ឹងបំផុតមួយរបស់លោកបៃដិន ពីព្រោះថា តាំងពីដើមរៀងមក ទាក់ទងនឹងរឿងជួយការពារតៃវ៉ាន់នេះ អាមេរិកតែងតែប្រកាន់យកនូវជំហរមិនច្បាស់លាស់ ដោយចេតនា ទៅតាមយុទ្ធសាស្រ្តដែលហៅជាភាសាអង់គ្លេសថា « Strategic ambiguity »។ ម្ខាង អាមេរិកមិនចង់ឲ្យចិនមើលឃើញថា អាមេរិកប្រាកដជាមិនចូលជួយតៃវ៉ាន់ ដើម្បីកុំឲ្យចិនបានចិត្តចូលឈ្លានពានតៃវ៉ាន់ ចំណែកម្ខាងទៀត អាមេរិកក៏មិនចង់ធានាច្បាស់លាស់ថានឹងចូលជួយតៃវ៉ាន់ ដើម្បីកុំឲ្យមេដឹកនាំតៃវ៉ាន់បានចិត្ត ប្រកាសឯករាជ្យ ហើយនាំឲ្យផ្ទុះសង្រ្គាម។
នៅក្នុងអំឡុងសន្និសីទសារព័ត៌មានរួមគ្នាជាមួយនាយករដ្ឋមន្រ្តីជប៉ុន នៅក្នុងទីក្រុងតូក្យូ នៅថ្ងៃចន្ទនេះ លោកចូ បៃដិន បានបញ្ជាក់សាជាថ្មីថា អាមេរិកនៅតែប្រកាន់យកនូវនយោបាយ “ចិនមួយ” ដដែល ដោយមិនមានអ្វីផ្លាស់ប្តូរនោះទេ ពោលគឺ អាមេរិកនៅតែទទួលស្គាល់ថា រដ្ឋាភិបាលក្រុងប៉េកាំង គឺជារដ្ឋាភិបាលស្របច្បាប់តែមួយគត់ ដែលតំណាងឲ្យប្រទេសចិនទាំងមូល ក៏ប៉ុន្តែ ក្នុងពេលជាមួយគ្នា លោកបៃដិនក៏បានលើកឡើងផងដែរថា ការច្បាមយកតៃវ៉ាន់ដោយប្រើកម្លាំងទ័ព គឺជារឿងមិនត្រឹមត្រូវ ដែលអាចនឹងបង្កនូវផលវិបាកខាងផ្នែកសន្តិសុខ នៅក្នុងតំបន់ទាំងមូល ហើយបង្កើតជាបញ្ហាដូចអ្វីដែលកើតឡើង នៅក្នុងសង្រ្គាមអ៊ុយក្រែនបច្ចុប្បន្ន។
លោកបៃដិនក៏បានព្រមានផងដែរថាចិនកំពុងតែរុញបញ្ហាតៃវ៉ាន់នេះឲ្យធ្លាក់ចូលក្នុងស្ថានភាពដ៏គ្រោះថ្នាក់រួចទៅហើយនៅក្នុងពេលបច្ចុប្បន្ននេះ តាមរយៈការបញ្ជូនយន្តហោះចម្បាំងឲ្យទៅហោះក្បែរដែនអាកាសតៃវ៉ាន់ ព្រមទាំងសកម្មភាពយោធាមួយចំនួនផ្សេងទៀត។
ពីប៉េកាំងឯណោះវិញ ចិនបានឆ្លើយតបមកវិញភ្លាមៗ ដោយមន្រ្តីអ្នកនាំពាក្យក្រសួងការបរទេសចិនលើកឡើងថា គេមិនត្រូវមើលស្រាលនោះទេ ចំពោះភាពប្តូរផ្តាច់ និងសមត្ថភាពរបស់ចិនក្នុងការការពារអធិបតេយ្យ និងបូរណភាពទឹកដីរបស់ខ្លួន ហើយថា ចិនទាមទារដោយទទូចឲ្យអាមេរិកធ្វើយ៉ាងណាចៀសវាងកុំបង្ហាញសញ្ញាលើកទឹកចិត្តចំពោះចលនាឯករាជ្យនិយមនៅតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ