អង្គការសុខភាពពិភពលោក សម្រេចបដិសេធមិនឲ្យតៃវ៉ាន់ចូលរួមក្នុងមហាសន្និបាត
ថ្ងៃច័ន្ទទី២៣ឧសភា តៃវ៉ាន់ ត្រូវបដិសេធមិនឲ្យចូលរួមជជែកពិភាក្សានៅក្នុងមហាសន្និបាត ប្រចាំឆ្នាំ របស់អង្គការសុខភាពពិភពលោក។ បើទោះបីជាមានប្រទេសច្រើនរួមទាំងអង់គ្លេសនិងសហរដ្ឋអាមេរិក បានយល់ព្រមក៏ដោយ តែការបដិសេធមិនឲ្យតៃវ៉ាន់ចូលរួម នេះគឺត្រូវគេមើលឃើញថា ជាការសម្រេចចិត្តដោយទទួលរងឥទ្ធិពលរបស់មហាយក្សចិន ។ មហាសន្និបាត ប្រចាំឆ្នាំ របស់អង្កការសុខភាពពិភពលោក គឺជាវេទិកាកិច្ចប្រជុំដ៏សំខាន់មួយដែលត្រូវរៀបចំសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:២៣
សំណើដាក់បញ្ចូល តៃវ៉ាន់ ជាអ្នកសង្កេការណ៍របស់មហាសន្និបាត អង្គការសុខភាពពិភពលោក និងដែលបានគាំទ្រពីសំណាក់ប្រទេសចំនួន១៣ គឺមិនត្រូវបានសម្រេច ដាក់ក្នុងរបៀបវរៈផ្លូវការទេ។ នេះជាការប្រកាសរបស់លោក Ahmed Robleh Abdilleh ប្រធានមហាសន្និបាត អង្គការសុខភាពពិភពលោក និងជារដ្ឋមន្ត្រីសុខាភិបាល ប្រទេសDjibouti។
ភ្លាមៗ តៃវ៉ាន់ អះអាងថា ការសម្រេចចិត្តបែបនេះ គឺបានបំផ្លាញដល់កិច្ចខិតខំប្រឹងប្រែងរបស់ខ្លួន នាកន្លងមក ក្នុងការជួយជ្រោមជ្រែងទប់ទល់វិបត្តិកូវីដ និងការចូលរួមប្រជុំជាច្រើនសន្ធឹកជាមួយអ្នកជំនាញរបស់អង្គការសហប្រជាជាតិ។
ជាអ្នកគាំទ្របេក្ខភាពតៃវ៉ាន់មួយដែរ អ្នកតំណាងប្រទេស Eswatini នៅអាហ្វ្រិក យល់ថា ការចូលរួមរបស់តៃវ៉ាន់ នៅក្នុងមហាសន្និបាតអង្គការសុខភាពពិភពលោក គឺជារឿងសុខាភិបាលសុទ្ធសាធ និងមិនពាក់ព័ន្ធនឹងនយោបាយទេ។
ប្រតិកម្មមានជាហូរហែពីសំណាក់អាមេរិកនិងអង់គ្លេស ជាមិត្តនឹងតៃវ៉ាន់។ ក្នុងសេចក្តីថ្លែងការណ៍ ប្រមុខការទូតសហរដ្ឋអាមេរិក Antony Blinken មានប្រសាសន៍ថា ក្នុងបរិបទនៃការគំរាមកំហែងដោយវិបត្តិសុខភាពសកល គឺយើងទទួលស្គាល់ពីសហប្រតិបត្តិការអន្តរជាតិជាមួយគ្រប់ភាគី នេះគឺជាកិច្ចការសំខាន់ចាំបាច់ ហើយការអញ្ជើញតៃវ៉ាន់ឲ្យចូលរួម ក៏ជាការបង្ហាញថា អង្គការសុខភាពពិភពលោក មិនទុកនរណាម្នាក់ឲ្យនៅដាច់ដោយឡែកពីគេដែរ។ ទន្ទឹមនឹងគ្នានេះ លោក Loyce Pace ប្រេសិតពិសេសរបស់សហរដ្ឋអាមេរិក ប្រចាំមហាសន្និបាត បានចាត់ទុកថា តៃវ៉ាន់ជាដៃគូសហការដ៏ចាំបាច់សម្រាប់កសាងសុខភាពពិភពលោកមួយប្រសើរ ហើយសហរដ្ឋអាមេរិកសោកស្តាយជាទីបំផុត ដែលគេបានផាត់តៃវ៉ាន់ចេញពីតួនាទីអ្នកសង្កេតការណ៍នៅក្នុងមហាសន្និបាត។
រីឯ រដ្ឋមន្ត្រីសុខាភិបាលអង់គ្លេស Sajid Javid ក៏សម្តែងក្តីសោកស្តាយដែរ ដោយប្រកាសថា ដូចជាគ្មានហេតុផលវិបត្តិសុខភាពណាធំដុំ ដែលត្រូវបដិសេធមិនឲ្យតៃវ៉ាន់ចូលរួមជាអ្នកសង្កេតការណ៍ទាល់តែសោះ។
សូមជ្រាបថា តៃវ៉ាន់ នៅក្រៅអង្គការសុខភាពពិភពលោក តាំងពីឆ្នាំ១៩៧២មក ហើយទើបតែត្រូវអនុញ្ញាតឲ្យចូលរួមជាអ្នកសង្កេតការណ៍ក្នុងមហាសន្និបាន បានប៉ុន្មានឆ្នាំប៉ុណ្ណោះ ពោលគឺនៅចន្លោះឆ្នាំ២០០៩ ដល់២០១៦ នៅគ្រាដែលទំនាក់ទំនងរវាងក្រុងប៉េកាំងនិងកោះតៃវ៉ាន់ មិនសូវតានតឹងខ្លាំងដូចសព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ