អាមេរិកនិងតៃវ៉ាន់ ផ្តើមជជែកគ្នាពីពាណិជ្ជកម្មទ្វេភាគី ដែលបានបង្កឲ្យចិនខឹងក្រោធ
ថ្ងៃពុធទី១មិថុនា សហរដ្ឋអាមេរក និង តៃវ៉ាន់ បានចាប់ផ្តើមការជជែកពិភាក្សាពីការផ្លាស់ប្តូរពាណិជ្ជកម្មជាមួយគ្នា។ ទង្វើនេះ ធ្វើឲ្យ រដ្ឋបាលក្រុងប៉េកាំង ខឹងក្រោធ និងបានប្រតិកម្មព្រមានដាស់តឿន ទាំងអាមេរិកនិងទាំងតៃវ៉ាន់ កុំឲ្យបង្កហេតុ និងប្រាប់ អាមេរិក ជាថ្មី ឲ្យត្រូវគោរពតាមអ្វីដែលខ្លួនទទួលស្គាល់ជាផ្លូវការ គឺ«គោលការណ៍ចិនតែមួយ»។
ចុះផ្សាយនៅថ្ងៃ៖
ស្តាប់ - ០២:៤១
មន្ត្រីជាន់ខ្ពស់សហរដ្ឋអាមេរិក ទទួលបន្ទុកកិច្ចការពាណិជ្ជកម្ម លោកស្រី Sarah Bianchi បានជួបប្រាស្រ័យជាមួយអ្នកតំណាងតៃវ៉ាន់ John Deng ប្រចាំនៅក្រុងវ៉ាស៊ីនតោន ព្រមទាំងបានអះអាងថា ភាគីទាំងពីរបានសម្រេចចាប់ផ្តើមពិគ្រោះគ្នា ជុំវិញការអភិវឌ្ឍរបៀបទាក់ទងស៊ីជម្រៅក្នុងវិស័យសេដ្ឋកិច្ចពាណិជ្ជកម្ម។ នៅក្នុងន័យនេះ មន្ត្រីជាន់ខ្ពស់សហរដ្ឋអាមេរិក គូសបង្ហាញទៀតថា កម្មវត្ថុនៃគំនិតផ្តួចផ្តើមផ្នែកជំនួញទ្វេភាគីនេះ នឹងបង្កការងាយស្រួលដល់ជំនួញជួញដូរផ្នែកកសិកម្ម, ជួយប្រយុទ្ធប្រឆាំងអំពើពុករលួយ បង្កើនតម្លាភាព ហើយក៏ជួយជ្រោមជ្រែងគ្នាក្នុងវិស័យបរិស្ថាននិងសកម្មភាពអាកាសធាតុទៀតផង។ តាមប្រភពដដែល, ជំនួបទី១ ដែលត្រូវជជែកគ្នាលម្អិត ជាផ្លូវការ តែម្តង គឺនឹងត្រូវធ្វើឡើងក្នុងពេលឆាប់ៗ ក្នុងខែមិថុនានេះ ទៀតផង រវាងសហរដ្ឋអាមេរិក និងការិយាល័យតំណាងតៃវ៉ាន់ ទទួលបន្ទុកសេដ្ឋកិច្ចវប្បធម៌ក្រុងតៃប៉ិ ប្រចាំក្រុងវ៉ាស៊ីនតោន ហើយនិងវិទ្យាស្ថានអាមេរិកនៅតៃវ៉ាន់។
គំនិតផ្តួចផ្តើមក្នុងការធ្វើជំនួញពាណិជ្ជកម្មទ្វេភាគី អាមេរិក-តៃវ៉ាន់នេះ គឺត្រូវបង្កើតឡើងដើម្បីជាការឆ្លើយតបតាមឆុតឆាប់ ទៅនឹងគឃ្លើនរបស់ចិន។ ចិនបានបញ្ជូនយន្តហោះចម្បាំងដ៏ច្រើន ប្រមាណ៣០គ្រឿង ទៅហោះរំលោភចូលតំបន់ការពារដែនអាកាសរបស់តៃវ៉ាន់ កាលពីដើមសប្តាហ៍។ តាមអ្នកវិភាគ ការណ៍ដែលចិនបង្ហោះបង្ហើរយន្តហោះចម្បាំងនេះ ក៏ជាការបង្ហាញសាច់ដុំ តទល់នឹងសេចក្តីប្រកាសពីគម្រោងដៃគូសេដ្ឋកិច្ចនៅតំបន់ឥណ្ឌូ-ប៉ាស៊ីហ្វិក របស់ប្រធានាធិបតីអាមេរិក លោក ចូ បៃដិន ក្នុងដំណើរទស្សនកិច្ចនៅអាស៊ី កាលពីថ្ងៃទី២៣ឧសភា ។ គម្រោងដៃគូសេដ្ឋកិច្ចនៅតំបន់ឥណ្ឌូ-ប៉ាស៊ីហ្វិក ផ្តួចផ្តើមពីសហរដ្ឋអាមេរិក ឥណ្ឌា អូស្ត្រាលី និង ជប៉ុន គឺមានចំណែកមួយផ្នែកធំដើម្បីទប់ទល់ឥទ្ធិពលចិន។ សហរដ្ឋអាមេរិក ក៏ថែមទាំងគិតថាចង់ឲ្យតៃវ៉ាន់ចូលរួមក្នុងគម្រោងនេះដែរ នៅថ្ងៃអនាគត។
ចំពោះក្រុងប៉េកាំង តាមរយៈរដ្ឋមន្ត្រីការបរទេស គឺបានសម្តែងក្តីខឹងក្រោធ ហើយបានរិះគន់ត្រង់ៗតែម្តងថា របបក្រុងវ៉ាស៊ីនតោន ចេះតែបង្កហេតុរកគន្លឺះប្រឆាំងនឹងចិន ដោយសំអាងលេសក្នុងនាមប្រជាធិបតេយ្យនិងលំហសេរីភាព។ ប្រមុខការទូតចិន លោក វ៉ាង យី ចាត់ទុកថាគម្រោងការអាមេរិកនិងតៃវ៉ាន់នេះ គឺ បរាជ័យធ្លាក់ទឹកហើយ។ រដ្ឋមន្ត្រីការបរទេសចិន ថែមទាំងបាន ដាស់តឿនក្រើនរំឮក សហរដ្ឋអាមេរិក ជាថ្មីថែមទៀត ឲ្យអនុវត្តឲ្យខ្ជាប់តាមអ្វីដែលខ្លួនបានទទួលស្គាល់ជាផ្លូវការរហូតមក នោះគឺ«គោលការណ៍ចិនតែមួយ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ