រុស្ស៊ីដំឡើងសំឡេង នៅក្រោយស្រីលង្កាចាប់ឃាត់យន្តហោះដឹកអ្នកដំណើររបស់ខ្លួន
រុស្ស៊ីចាប់ថ្នាំងថ្នាក់នឹងស្រីលង្កាដែលចាប់ឃាត់យន្តហោះដឹកអ្នកដំណើររបស់ក្រុមហ៊ុនរុស្ស៊ី។ មួយថ្ងៃក្រោយ ក្រសួងការបរទេសរុស្ស៊ីកោះហៅអ្នកតំណាងស្រីលង្កាប្រចាំក្រុងម៉ូស្គូ អ្នកទទួលខុសត្រូវរបស់ព្រលានយន្តហោះដ៏សំខាន់មួយរបស់ស្រីលង្កាបានចេញមុខ មកបកស្រាយកាលពីថ្ងៃសៅរ៍ថា ការសម្រេចចាប់ឃាត់ទុកយន្តហោះរបស់ក្រុមហ៊ុនរុស្ស៊ី នៅស្រីលង្កាគ្មានជាប់ពាក់ព័ន្ធនឹងរឿងនយោបាយ ហើយក៏គ្មានរដ្ឋាភិបាលនៅពីក្រោយដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
យន្តហោះAirbus A330 របស់ក្រុមហ៊ុនដឹកអ្នកដំណើររុស្ស៊ី Aeroflot ត្រូវបានអាជ្ញាធរអាកាសចរណ៍ស៊ីវិលស្រីលង្កាចាប់ឃាត់ទុក នៅព្រលានយន្តហោះ អន្តរជាតិ Bandaranaike ភាគខាងជើងរដ្ឋធានីកូឡុំបូ តាំងពីថ្ងៃព្រហស្បតិ៍ទី ២មិថុនា។ នៅថ្ងៃសុក្រ ក្រសួងការបរទេសរុស្ស៊ីបានកោះហៅឯកអគ្គរដ្ឋទូតស្រីលង្កាប្រចាំក្រុងម៉ូស្គូ ដើម្បីតវ៉ាប្រឆាំងនឹងការសម្រេចចិត្តគ្មានហេតុផលរបស់ស្រីលង្កា។ នេះបើតាមការចុះផ្សាយរបស់ទីភ្នាក់ងារព័ត៌មានរុស្ស៊ី TASS។
ប៉ុន្តែ នៅថ្ងៃសៅរ៍ ទាំងមន្រ្តីអាកាសចរណ៍ស៊ីវិល ស្រីលង្កាបានចេញសេចក្តីថ្លែងការណ៍បកស្រាយថា ការចាប់ឃាត់យន្តហោះAirbus A330 របស់ក្រុមហ៊ុនដឹកអ្នកដំណើររុស្ស៊ីមានជាប់ទាក់ទងនឹងជម្លោះពាណិជ្ជកម្មសុទ្ធសាធ និងថា វាមិនគួរក្លាយជាប្រភពវិវាទរវាងរដ្ឋទាំងពីរ។ អ្នកទទួលខុសត្រូវព្រលានយន្តហោះស្រីលង្កាបានបញ្ជាក់បន្ថែមថា រដ្ឋាភិបាលក្រុងកូឡុំបូ មិនបានស្ថិតនៅពីក្រោយការសម្រេចចាប់ឃាត់យន្តហោះរុស្ស៊ីនោះទេ។
បើតាមសេចក្តីថ្លែងការណ៍របស់ព្រលានយន្តហោះស្រីលង្កា អាជ្ញាធរសម្រេចឃាត់ទុកយន្តហោះដឹកអ្នកដំណើររបស់រុស្ស៊ី ទៅតាមការសម្រេចរបស់តុលាការពាណិជ្ជកម្មក្រុងកូឡុំប៊ូ ដែលបានទទួលពាក្យបណ្តឹងតវ៉ាពីក្រុមហ៊ុនឯកជនមួយរបស់អៀរឡង់។
នៅថ្ងៃសៅរ៍ ទីភ្នាក់ងារព័ត៌មានរុស្ស៊ីTASSបានចុះផ្សាយថា នៅក្រោយហេតុការណ៍ចាប់ឃាត់យន្តហោះរបស់ខ្លួន ក្រុមហ៊ុនហោះហើររបស់រុស្ស៊ី Aeroflot បានសម្រេចផ្អាករាល់ជើងហោះហើរជាមួយប្រទេសស្រីលង្កា។ ប៉ុន្តែ ក្រុមហ៊ុនបានធានាបញ្ជូនយន្តហោះទៅដឹកយកអ្នកដំណើរទាំងប៉ុន្មាន ដែលបានទិញសំបុត្ររួចហើយ និងកំពុងនៅជាប់គាំង នៅស្រីលង្កា។ ដោយសារការចាប់ឃាត់ភ្លាមៗ អ្នកដំណើរ១៩១នាក់ និងបុគ្គលិកលើយន្តហោះរុស្ស៊ី ១៣នាក់ ត្រូវគេបញ្ជូនឲ្យស្នាក់នៅបណ្តោះអាសន្ននៅសណ្ឋាគារក្បែរព្រលានយន្តហោះ ក្នុងពេលរង់ចាំការសម្រេចស្តីពីជោគវាសនារបស់យន្តហោះរុស្ស៊ី។
នៅក្រោយ ក្រុមប្រទេសលោកខាងលិចដាក់ទណ្ឌកម្មសេដ្ឋកិច្ច ដោយសាររុស្ស៊ី ចូលធ្វើសង្រ្គាមឈ្លានពានអ៊ុយក្រែន អាជ្ញាធរអាកាសចរណ៍ស៊ីវិលរុស្ស៊ី ធ្លាប់បានអំពាវនាវឲ្យក្រុមហ៊ុនរុស្ស៊ីទាំងអស់ដែលជួលយន្តហោះរបស់ក្រុមហ៊ុនអឺរ៉ុប ឲ្យផ្អាកការហោះហើរទៅបរទេសដើម្បីជៀសវាងការចាប់ឃាត់ទុកយន្តហោះ។ ក្រុមហ៊ុនAeroflot ផ្ទាល់ធ្លាប់បានផ្អាកការហោះហើរអន្តរជាតិនៅខែ មីនា ប៉ុន្តែ បានចាប់ផ្តើមដំណើរការឡើងវិញ ទៅស្រីលង្កា នៅខែមេសាកន្លងទៅ។
រហូតមកដល់ថ្ងៃសៅរ៍យ គេនៅមិនទាន់ដឹងថា តើការចាប់ឃាត់ទុកយន្តហោះរបស់ក្រុមហ៊ុនដឹកអ្នកដំណើររុស្ស៊ី មានជាប់ពាក់ព័ន្ធនឹងការដាក់ទណ្ឌកម្មសេដ្ឋកិច្ចទៅលើរុស្ស៊ីយ៉ាងណានោះទេ។ សវនការស្តីពីការដោះលែងយន្តហោះដឹកអ្នកដំណើររុស្ស៊ី នឹងត្រូវតុលាការស្រីលង្កាបើកជំនុំជម្រះ នៅថ្ងៃពុធទី៨មិថុនា សប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ