សភាថៃអនុម័តនៅអំណានទីមួយ លើគម្រោងច្បាប់អនុញ្ញាតការរៀបអាពាហ៍ពិពាហ៍ រវាងអ្នកមានភេទដូចគ្នា
កាលពីថ្ងៃពុធ ទី១៥មិថុនា សភាជាន់ទាបថៃ បានអនុម័តនៅអំណានទីមួយ លើគម្រោងច្បាប់ជាច្រើន ដែលក្នុងនោះមានច្បាប់អនុញ្ញាត ការរៀបអាពាហ៍ពិពាហ៍ រវាងអ្នកមានភេទដូចគ្នា។ ក្រុមអ្នកស្រលាញ់ភេទដូចគ្នានៅថៃ បានបង្ហាញការអបអរសាទរ ថានេះជាក្តីសង្ឃឹមមួយ ខណៈដែលជាយូរយារមកហើយ ដែលនៅថៃមានការបើកចំហរច្រើន ដល់អ្នកស្រលាញ់ភេទដូចគ្នា ក៏ប៉ុន្តែពួកគេនៅតែទទួលរង នូវការរើសអើងមាក់ងាយ នៅក្នុងសង្គម។
ចុះផ្សាយនៅថ្ងៃ៖
ស្តាប់ - ០២:៣៣
សភាជាន់ទាបថៃ បានអនុម័តនៅអំណានទីមួយ លើគម្រោងច្បាប់ចំនួន៤ ដោយក្នុងនោះមាន២ ជាច្បាប់មានខ្លឹមសារ អនុញ្ញាតការរៀបអាពាហ៍ពិពាហ៍ រវាងមនុស្សមានភេទដូចគ្នា ចំណែកច្បាប់២ទៀត មានខ្លឹមសារកំណត់ ត្រឹមតែទទួលស្គាល់ “សម្ព័ន្ធរដ្ឋប្បវេណី” រវាងអ្នកមានភេទដូចគ្នា។ ជំហានបន្ទាប់ គណៈកម្មាការពិសេសរបស់សភាថៃ និងចាប់ផ្តើមនីតិវិធីអំណានទី២ចុងក្រោយ ពិនិត្យលំអិតលើខ្លឹមសារច្បាប់នីមួយៗ មុននឹងសម្រេចអនុម័តជាស្ថាព័រ ជ្រើសយកគម្រោងច្បាប់ណាមួយ។
នៅខាងមុខសភាថ្ងៃ ថ្ងៃពុធទី១៥មិថុនា ក្រុមអ្នកស្រលាញ់ភេទដូចគ្នា បានជួបជុំគ្នាស្រែកអបអរ ចំពោះដំណឹងដ៏ល្អ នេះ។ ស្ត្រីម្នាក់ឈ្មោះ Nada Chayajit ដែលជាសកម្មជនការពារសិទ្ធិអ្នកស្រលាញ់ភេទដូចគ្នា បានលើកឡើងថា ខ្លួនសប្បាយចិត្តណាស់ ជាមួយនឹងការបោះជំហានថ្មីនេះ តែទន្ទឹមនឹងនេះ ខ្លួនក៏នៅតែមានការបារម្ភដែរ ព្រោះគម្រោងច្បាប់នេះ នៅមានឧបសគ្គជាច្រើនទៀត។ ស្ត្រីជនជាតិថៃរូបនេះ អះអាងថា ថៃជាប្រទេសកាន់ពុទ្ធសាសនា ដែលសង្គម នៅប្រកាន់ប្រពៃណីបែបចាស់គំរិល និងអភិរក្សនិយមខ្លាំង។
លោក Pita LimJaroenrat ប្រធានគណបក្សប្រឆាំងថៃឈ្មោះ Move Forward ដែលជាអ្នកបានស្នើគម្រោងច្បាប់អនុញ្ញាតការរៀបអាពាហ៍ពិពាហ៍ រវាងអ្នកស្រលាញ់ភេទដូចគ្នានេះ បានថ្លែងថា ការដែលសភាបានយល់ព្រមអនុម័តនៅអំណានទីមួយ វាគឺជាក្តីសង្ឃឹមមួយធំណាស់។ នៅចំពោះមុខក្រុមសកម្មជនអ្នកស្រលាញ់ភេទដូចគ្នា លោក Pita LimJaroenrat បានបន្ថែមថា អំណេះតទៅ នយោបាយត្រូវតែអាចដោះស្រាយ ជួយឲ្យសង្គមរីកចម្រើនទៅមុខ ប្រជាពលរដ្ឋទាំងអស់ សុទ្ធតែមានចំណែក មានសិទ្ធិស្មើៗគ្នា នៅក្នុងសង្គម។
គួរបញ្ជាក់ថា ប្រសិនបើសភាថា សម្រេចអនុម័តច្បាប់អនុញ្ញាតការរៀបអាពាហ៍ពិពាហ៍ រវាងអ្នកមានភេទដូចគ្នាមែននោះ នោះថៃនឹងក្លាយជាប្រទេសដំបូងគេបង្អស់ហើយ នៅតំបន់អាស៊ីអាគ្នេយ៍។ កាលពីថ្ងៃទី៥មិថុនា នៅទីក្រុងបាងកក មានការប្រារព្ធពិធី Gay Pride យ៉ាងឱឡាឬក បំផុត បន្ទាប់ពីខកខានអស់ប្រមាណ១៥ឆ្នាំមកហើយ។ ក្រុមអ្នកស្រលាញ់ភេទដូចគ្នា បានជួបជុំគ្នាទាមទារ ឲ្យមានច្បាប់អនុញ្ញាតការរៀបអាពាហ៍ពិពាហ៍របស់ពួកគេ។
យ៉ាងណាក៏ដោយ លោក Ryan Figueiredo តំណាងអង្គការ Equal Asia ប្រចាំនៅថៃ បានលើកឡើងថា នៅមានដំណើរវែងឆ្ងាយតទៅទៀត ដើម្បីអាចកែប្រែផ្នត់គំនិត បែបចាស់គំរិល និងអភិរក្សនិយម របស់អ្នកនយោបាយ សមាជិកសភាថៃ។ លោកម្នាក់នេះ បានថ្លែងបារម្ភថា ខ្លាចតែសភាថៃ អនុម័តយកតែច្បាប់ដែលអនុញ្ញាតត្រឹមតែ “សម្ព័ន្ធរដ្ឋប្បវេណី” រវាងអ្នកស្រលាញ់ភេទដូចគ្នា។ ការទទួលស្គាល់ត្រឹម “សម្ព័ន្ធរដ្ឋប្បវេណី” គឺវាមិនផ្តល់សិទ្ធិឲ្យបានទូលំទូលាយ ដូចករណី “អាពាហ៍ពិពាហ៍” ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ