អតីតនាយករដ្ឋមន្រ្តីជប៉ុន លោកស្ហ៊ីនហ្សូ អាបេទទួលមរណភាពនៅក្រោយត្រូវខ្មាន់កាំភ្លើងបាញ់សម្លាប់
អតីតនាយករដ្ឋមន្រ្តីជប៉ុនបានទទួលមរណភាព នៅមន្ទីរពេទ្យ នៅបន្ទាប់ពីលោកត្រូវខ្មាន់កាំភ្លើងបាញ់សម្លាប់ នៅព្រឹកថ្ងៃសុក្រទី ៨ កក្កដា ២០២២ នៅក្នុងពេលលោកកំពុងធ្វើយុទ្ធនាការឃោសនាបោះឆ្នោត នៅទីក្រុងណារ៉ា ភាគខាងលិចប្រទេសជប៉ុន។
ចុះផ្សាយនៅថ្ងៃ៖
ស្តាប់ - ០២:០៧
នៅវេលាម៉ោង ១១កន្លះព្រឹក ត្រូវនឹងម៉ោង ៩កន្លះព្រឹក ម៉ោងនៅកម្ពុជា គេលឺស្នូរកំភ្លើង២គ្រាប់បានផ្ទុះឡើង នៅក្នុងបរិវេណជិតស្ថានីយរថភ្លើងYamatosaidaiji ជាទីដែលអតីតនាយករដ្ឋមន្ត្រីជប៉ុន លោក ស៊្ហីនហ្សូ អាបេ កំពុងជួយឃោសនាឲ្យបេក្ខជនគណបក្សរបស់លោក គឺគណបក្សប្រជាធិបតេយ្យសេរី សម្រាប់ការបោះឆ្នោត សភាជាន់ខ្ពស់ជប៉ុន នៅថ្ងៃអាទិត្យ។
សាក្សីនៅកន្លែងកើតហេតុបាននិយាយប្រាប់ទីភ្នាក់ងារព័ត៌មានជប៉ុនថា នៅពេលលោកអាបេកំពុងថ្លែងសុន្ទករថា មានបុរសម្នាក់បានដើរមកឈរពីក្រោយលោកអាបេ។ តាមសាក្សីខាងលើ គ្រាប់កាំភ្លើងទីមួយ មានសំឡេងដូចជាកាំភ្លើងលេង ប៉ុន្តែ នៅក្រោយសំឡេងគ្រាប់កាំភ្លើងទី២ដែលលឺខ្លាំង និងឃើញបែកផ្កាភ្លើង និងផ្សែង គេឃើញមនុស្សនៅជុំវិញ លោកអាបេ ចាប់ផ្តើមហ៊ុំព័ទ្ធ និងធ្វើចលនាបេះដូងឲ្យលោកអាបេ។
រូបភាពនៅកន្លែងកើតហេតុបានបង្ហាញលោកអាបេ ស្តូកស្តឹងនៅលើថ្នល់កៅស៊ូ ដោយមានអាវពណ៌សប្រឡាក់ឈាម។ ទីភ្នាក់ងារគ្រប់គ្រងអគ្គិភ័យនិងគ្រោះមហន្តរាយដែលបានទៅដល់កន្លែងកើតហេតុភ្លាមៗ បានអះអាងថា អតីតនាយករដ្ឋមន្រ្តីជប៉ុន លោកអាបេ បានរងរបួសធ្ងន់ ដោយគ្រាប់កាំភ្លើង នៅត្រង់ក ខាងស្តាំ និងមានឈាមហូរចេញច្រើនពីផ្នែកទ្រូងខាងឆ្វេង។ គេនៅមិនច្បាស់ថា តើលោកអាបេបានរងគ្រាប់កាំភ្លើងតែមួយគ្រាប់ ដែលបានរត់ទៅកន្លែងផ្សេង ឬយ៉ាងណា។
តាមមន្រ្តីសង្រ្គោះបន្ទាន់ជប៉ុន ចង្វាក់បេះដូងរបស់លោកអាបេបានឈប់ដំណើរការទៅហើយ នៅពេលលោកត្រូវគេដឹកតាមឧទ្ធម្ភាគចក្រ ទៅកាន់មន្ទីរពេទ្យ Nara Medical University ក្នុងទីក្រុងកាស៊ីហារា។
នៅក្នុងសន្និសីទកាសែត វេជ្ជបណ្ឌិតម្នាក់របស់មន្ទីរពេទ្យ បាននិយាយថា លោកស៊្ហីនហ្សូ អាបេមានឈាមហូរច្រើន និងគ្មានសញ្ញានៅមានជីវិតទេ នៅពេលគេដឹកលោកចូលមន្ទីរពេទ្យ។
ក្នុងវ័យ ៦៧ ឆ្នាំ អតីតនាយករដ្ឋមន្រ្តីដ៏លេចធ្លោរបស់ជប៉ុន លោកស្ហ៊ីនហ្សូ អាបេ បានទទួលមរណភាព នៅថ្ងៃទី ៨ កក្កដា ឆ្នាំ ២០២២។ ក្នុងប្រវត្តិសាស្រ្តជប៉ុន ចាប់តាំងពីឆ្នាំ ១៩៣០ នេះជាលើកទី១ ដែលមាននាយករដ្ឋមន្រ្តី ឬអតីតនាយករដ្ឋមន្រ្តីត្រូវគេធ្វើឃាត សម្លាប់យ៉ាងដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ