ចិនធ្វើបាតុកម្មដ៏កម្រមួយប្រឆាំងអំណាចមូលដ្ឋានពុករលួយ
ដោយហេតុតែធនាគារជួបបញ្ហាមិនអនុញ្ញាតឱ្យអតិថិជនដកលុយបាន ពលរដ្ឋចិនជាច្រើននាក់បាននាំគ្នាធ្វើបាតុកម្មនៅថ្ងៃអាទិត្យទី ១០កក្កដា២០២២នៅខេត្តហេណាន់ ប្រឆាំងនឹងអាជ្ញាធរមូលដ្ឋានតែម្តង ពីបទពុករលួយ។ នេះជាបាតុកម្មដ៏កម្របំផុតនៅក្នុងប្រទេសចិន។
ចុះផ្សាយនៅថ្ងៃ៖
ស្តាប់ - ០២:១៦
វិបត្តិសេដ្ឋកិច្ចបន្ថយល្បឿនបានជំរុញឱ្យធនាគារចំនួន៤ នៅខេត្តហេណាន់ ជួបការលំបាក និង បង្កកលុយមិនឱ្យអតិថិជនបើកយកប្រាក់ទេ តាំងពីពាក់កណ្តាលខែមេសាមក។ ស្ថានភាពបែបនេះ បានធ្វើឱ្យពលរដ្ឋចិនរាប់ពាន់នាក់ជាប់កុនលុយមិនអាចដកប្រាក់សន្សំមកចាយវាយបាន និង ហ៊ានប្រថុយចុះធ្វើបាតុកម្មរប៉េះរបោះ តាំងពីពេលនោះមក ហើយក្លាយជាបាតុកម្មទ្រង់ទ្រាយធំ នៅថ្ងៃអាទិត្យទី ១០កក្កដា២០២២នេះ។
ក្នុងចំនួនដល់ទៅជាច្រើនពាន់នាក់ ប្រជាជនចិនបាននាំគ្នាធ្វើបាតុកម្មនៅមុខទីស្នាក់ការធនាគារកណ្តាលរបស់ចិន នៅZhengzhou រដ្ឋធានីរបស់ខេត្តហេណាន់។ នេះបើតាមប្រភពព័ត៌មានផ្តល់បាតុករជាច្រើននាក់ដែលសុំឱ្យភ្នាក់ងារសារព័ត៌មានបារាំងមិនបញ្ចេញឈ្មោះ។ នៅក្នុងរូបភាពវីដេអូដែលAFP មិនអាចផ្ទៀងផ្ទាត់ដោយឯករាជ្យបាន គេ ឃើញបាតុកររងការបង្ក្រាប ដោយវាយដំ ឱ្យរងរបួស យ៉ាងសាហាវបំផុត ពីសំណាក់ភ្នាក់ងារស៊ីវិល។
អាជ្ញាធរមូលដ្ឋានមិនធ្វើអត្ថាធិប្បាយអ្វីទាំងអស់ទាក់ទងនឹងបាតុកម្ម ប៉ុន្តែបានប្រកាសចាប់ខ្លួនក្រុមជនខិលខូចដែលធ្វើសកម្មភាពហិរញ្ញវត្ថុ។
នៅក្នុងប្រទេសចិន ដែលប្រកាន់អំណាចផ្តាច់ការ ដើម្បីរក្សាស្ថិរភាពសង្គម បាតុកម្មជាករណីក៏កម្របំផុត ព្រោះអាជ្ញាធរតែងបង្ក្រាបនិងបំបែក មុនចលនាកកើតចេញជារូបរាងទៅទៀត។ ប៉ុន្តែដោយអស់សង្ឃឹមខ្លាំងពេក បើទោះបីជាត្រូវប្រឈមនឹងការចាប់ខ្លួន និងការតាមចាប់ខ្លួនក៏ដោយ ក៏ប្រជាជនចិនខ្លះនៅតែហ៊ានចុះថ្នល់ បរិហារអំពីពុករលួយនិងការឃុបឃិតរបស់អាជ្ញាធរមូលដ្ឋាន។ គេសង្ស័យថា អាជ្ញាធរមូលដ្ឋាន ទំនងជាបានលួចកែបណ្ណសុខភាពកូវីដរបស់បាតុករខ្លះឱ្យមានព៌ណក្រហម ពណ៌ជាប់បម្រាមមិនអាចដើរហើរបាន។ ដើម្បីអាចមានសិទ្ធិចូលមជ្ឈមណ្ឌលពាណិជ្ជកម្ម អាគារធំៗ ផ្សារទំនើប ឬទីសាធារណៈទាំងឡាយ និងធ្វើដំណើរតាមមធ្យោបាយដឹកជញ្ជូនសាធារណៈនានា ពេលរដ្ឋចិនត្រូវបង្ហាញបណ្ណសុខភាពកូវីដ។ ពលរដ្ឋព្រមប្រើបណ្ណនេះដោយពេញចិត្ត ប៉ុន្តែអាជ្ញាធរចិនទំនងឆ្លៀតតាមដានមនុស្សតាមរយៈបណ្ណនេះផង។
ក្រៅអំពីធនាគារទាំងបួននៅហេណាន់ ស្ថាប័នធនាគារចិន នៅទីផ្សេងៗក្នុងប្រទេស ក៏កំពុងមានស្ថានភាពហិរញ្ញវត្ថុផុយស្រួយខ្លាំងដែរ។ នេះបើតាមអ្នកវិភាគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ