សកម្មជនប្រជាធិបតេយ្យថៃរងការឈ្លបពីកម្មវិធី Pegasus
សកម្មជនប្រជាធិបតេយ្យថៃ ដែលមានពាក់ព័ន្ធនឹងបាតុកម្មប្រឆាំងនឹងរដ្ឋាភិបាលថៃកាលពីឆ្នាំ២០២០ និង២០២១ ចំនួនជាង២០នាក់ បានក្លាយជាផ្ទាំងស៊ីបរបស់កម្មវិធីឈ្លបការណ៍ប៉េហ្កាហ្ស៊ូស Pegasus ដ៏ចម្រូងចម្រាស។ នេះបើតាមការគូសបញ្ជាក់របស់អង្គការការពារសិទ្ធិមនុស្ស នៅក្នុងប្រទេសថៃ ក្នុងថ្ងៃទី ១៨កក្កដា ២០២២។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងរបាយការណ៍ iLaw សហនិពន្ធជាមួយDigitalReach និង Citizen Lab កម្មវិធីPagasus បានហែកចូលទូរស័ព្ទរបស់សកម្មជនប្រជាធិបតេយ្យចំនួន២៤នាក់ ដែលជាតំណាងបាតុករដ៏លេចធ្លោខ្លាំង ព្រមទាំងមេធាវីបីរូប និងបុគ្គលិកធ្វើការឱ្យអង្គការក្រៅរដ្ឋាភិបាលចំនួនបីនាក់ផ្សេងទៀត ដើម្បីឈ្លបយកការណ៍សម្ងាត់ នៅរវាងពីថ្ងៃទី ២១ តុលា ២០២០ ដល់ថ្ងៃទី ១៩វិច្ឆិកា២០២១។ ពោលគឺក្នុងអំឡុងពេលដែលប្រទេសថៃមានភាពពុះកញ្ជ្រោលនយោបាយខ្លាំង។ ក្រោមការផ្តួចផ្តើមរបស់និស្សិត បាតុកររាប់ពាន់នាក់បាននាំគ្នាចុះថ្នល់កណ្តាលក្រុងបាងកកទាមទារឱ្យនាយករដ្ឋមន្ត្រី លោក ប្រាយុទ្ធចាន់អូចា ចុះចេញពីតំណែង និងទាមទារធ្វើកំណែទម្រង់ស៊ីជម្រៅរបបរាជានិយម ដ៏មានអំណាច។ ប៉ុន្តែចលនាតវ៉ា ចុះខ្សោយជាលំដាប់ទៅវិញ ដោយហេតុតែវិបត្តិកូវីដផង និងដោយហេតុតែ មានការចាប់ខ្លួនមេដឹកនាំចលនាបាតុកម្មគ្រាក់ៗអស់ជាច្រើនផង។
ថ្វីបើគេនៅពុំទាន់ដឹងថាតើនរណាជាអ្នកបញ្ជាកម្មវិធីនេះ ជាផ្លូវការមែន តែរដ្ឋាភិបាលថៃប្រាកដជាបានទទួលប្រយោជន៍ច្រើនពីប្រតិបត្តិការឈ្លបនេះ។ នេះបើតាមអង្គការក្រៅរដ្ឋាភិបាលមូលដ្ឋាន។ អង្គការការពារសិទ្ធិមនុស្ស Amnesty International បានអំពាវនាវភ្លាមឱ្យតុលាការថៃបើកអង្កេតស៊ីជម្រៅភ្លាម។
អភិវឌ្ឍដោយក្រុមហ៊ុនបច្ចេកវិទ្យាអ៊ីស្រាអែល NSO Group រួមជាមួយក្រសួងការពារជាតិអ៊ីស្រាអែល កម្មវិធីPegasus ដែលអាចបញ្ជាឱ្យបើកកាមេរ៉ា និងមីក្រូ របស់ទូរស័ព្ទដៃ ពីចម្ងាយ ត្រូវបានមេដឹកនាំជាច្រើនប្រើសម្រាប់លួចស្តាប់ យកការណ៍សម្ងាត់ អ្នកកាសែតឬ ក្រុមប្រឆាំង និងប្រជាពលរដ្ឋឯង រហូតបានក្លាយជារឿងអាស្រូវឈ្លបការណ៍ដ៏ធំមួយកាលពីឆ្នាំទៅ។
បើតាមក្រុមសារព័ត៌មានអង្កេតអន្តរជាតិចំនួន១៧បណ្តាញ មានអ្នកកាសែតយ៉ាងហោច១៨០នាក់ អ្នកនយោបាយស្ត្រីបុរសយ៉ាងហោច៦០០នាក់ សកម្មជនសិទ្ធិមនុស្ស៨៥នាក់ ឬប្រធានក្រុមហ៊ុនសហគ្រាសនៅលើពិភពលោកចំនួន៦៥រូប ជាប់តាមដានពីកម្មវិធី Pagasus។ បារាំងព្រមទាំងបណ្តាប្រទេសជាច្រើនទៀតនៅលើលោករាប់ទាំងសហរដ្ឋអាមេរិកផង បានតវ៉ានិងដាក់បណ្តឹងប្រឆាំងនឹងក្រុមហ៊ុនNSO តាមផ្លូវតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ