ប្រធានរដ្ឋសភាអាមេរិកទៅដល់តៃវ៉ាន់ នៅក្នុងដំណើរទស្សនកិច្ចដ៏តានតឹង
លោកស្រី ណាន់ស៊ី ប៉េឡូស៊ី ប្រធានរដ្ឋសភាអាមេរិក បានធ្វើដំណើរទៅដល់តៃវ៉ាន់ នៅយប់ថ្ងៃអង្គារ ២សីហា នៅក្នុងដំណើរទស្សនកិច្ចដ៏កម្រ ដោយលោកស្រី គឺជាប្រធានរដ្ឋសភាអាមេរិកលើកទីមួយ ដែលទៅបំពេញទស្សនកិច្ចនៅតៃវ៉ាន់ រាប់ចាប់តាំងពីឆ្នាំ១៩៩៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
លោកស្រីណាន់ស៊ី ប៉េឡូស៊ីបានធ្វើដំណើរតាមយន្តហោះពិសេសរបស់កងទ័ពអាកាសអាមេរិក ដោយហោះចេញពីទីក្រុងគូឡាឡាំពួ សំដៅទៅទិសខាងកើត ដោយហោះវាងតំបន់សមុទ្រចិនខាងត្បូង មុននឹងបត់ក្បាលទៅទិសខាងជើង សំដៅទៅចុះចតនៅក្នុងព្រលានយន្តហោះយោធាមួយ នៅក្នុងទីក្រុងតៃប៉ិ។
ដំណើរទស្សនកិច្ចនេះត្រូវបានធ្វើឡើង បើទោះបីជាមានការព្រមានខ្លាំងៗពីសំណាក់រដ្ឋាភិបាលក្រុងប៉េកាំង ហើយបើយោងតាមការផ្សាយរបស់ទូរទស្សន៍រដ្ឋចិន នៅយប់ថ្ងៃអង្គារ មុនពេលលោកស្រីណាន់ស៊ី ប៉េឡូស៊ីមកដល់តៃវ៉ាន់ យន្តហោះចម្បាំងធុនទំនើបៗរបស់ចិនបានហោះឆ្លងកាត់ច្រកសមុទ្រតៃវ៉ាន់ ក៏ប៉ុន្តែ មិនបញ្ជាក់លម្អិត អំពីទីតាំង និងពេលវេលាជាក់លាក់នៃការហោះឆ្លងកាត់នេះទេ។
នៅក្នុងសេចក្តីថ្លែងការណ៍ក្រោយពេលមកដល់តៃវ៉ាន់ លោកស្រី ណាន់ស៊ី ប៉េឡូស៊ី បានលើកឡើងថា ដំណើរទស្សនកិច្ចរបស់លោកស្រី នៅពេលនេះ វាបង្ហាញពីការគាំទ្រឥតងាករេរបស់អាមេរិកចំពោះតៃវ៉ាន់ តែវាក៏មិនមានអ្វីដែលបញ្ច្រាសពីគោលនយោបាយរបស់អាមេរិកចំពោះចិននោះដែរ គឺគោលនយោបាយ "ចិនមួយ" ដោយគ្មានការទទួលស្គាល់ឯករាជ្យរបស់តៃវ៉ាន់។
ក្រសួងការពារជាតិចិនវិញ បានចេញសេចក្តីថ្លែងការណ៍មួយ ថ្កោលទោសដំណើរទស្សនកិច្ចនេះ ហើយលើកឡើងថា កងទ័ពចិននឹងបើកធ្វើប្រតិបត្តិការយោធាមួយចំនួន ដើម្បីឆ្លើយតបនឹងដំណើរទស្សនកិច្ចនេះ។
ការប្រឈមមុខដាក់គ្នា រវាងប្រទេសមហាអំណាចទាំងពីរ នៅក្នុងសំណុំរឿងតៃវ៉ាន់នៅពេលនេះ បានធ្វើឲ្យរំជើបរំជួលទៅដល់ទីផ្សារហិរញ្ញវត្ថុ នៅស្ទើរតែគ្រប់កន្លែង ទាំងនៅអាស៊ី និងនៅអឺរ៉ុប។ ក៏ប៉ុន្តែ លោក ឆុង ចៀយ៉ាង (Chong Djia-Yiang) សាស្រ្តាចារ្យនៅសកលវិទ្យាល័យសិង្ហបុរី នៅក្នុងបទសម្ភាសន៍ជាមួយវិទ្យុបារាំងអន្តរជាតិ បានលើកឡើងថា ថ្វីដ្បិតតែបញ្ហាតានតឹង រវាងអាមេរិក និងចិន អាចនឹងត្រូវកើនឡើងខ្លាំង ក៏ប៉ុន្តែ វាទំនងជានឹងមិនឈានរហូតទៅបង្កឲ្យមានគ្រោះថ្នាក់អ្វីធ្ងន់ធ្ងរនោះទេ ដោយសារតែភាគីទាំង៣ គឺទាំងចិន អាមេរិក និងតៃវ៉ាន់ សុទ្ធតែមិនចង់ឲ្យជម្លោះរាលដាលគ្រប់គ្រងលែងបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ