អាមេរិកបញ្ជាក់ថាគ្មានអ្វីផ្លាស់ប្តូរក្នុងនយោបាយ “ចិនមួយ”
លោកស្រីណាន់ស៊ី ប៉េឡូស៊ី ប្រធានរដ្ឋសភាអាមេរិក បានធ្វើដំណើរទៅដល់ប្រទេសម៉ាឡេស៊ី នៅថ្ងៃអង្គារនេះ ហើយបើទោះជាលោកស្រីនៅមិនទាន់បញ្ជាក់ច្បាស់លាស់ អំពីគម្រោងទស្សនកិច្ចទៅកាន់តៃវ៉ាន់ ក៏ប៉ុន្តែ បណ្តាញសារព័ត៌មាន ទាំងនៅអាមេរិក និងនៅតៃវ៉ាន់ បាននាំគ្នាចុះផ្សាយថា លោកស្រីនឹងធ្វើដំណើរទៅកាន់តៃវ៉ាន់ នៅថ្ងៃអង្គារនេះ។
ចុះផ្សាយនៅថ្ងៃ៖
ស្តាប់ - ០១:៣៦
រដ្ឋាភិបាលក្រុងប៉េកាំង តាមរយៈអ្នកនាំពាក្យក្រសួងការបរទេស បានព្រមានសារជាថ្មីម្តងទៀត នៅថ្ងៃអង្គារនេះថា អាមេរិកគឺជាអ្នកទទួលខុសត្រូវ និងជាអ្នកត្រូវរងនូវផលវិបាក ប្រសិនបើលោកស្រីប៉េឡូស៊ីទៅតៃវ៉ាន់។
រុស្ស៊ីវិញ តាមរយៈអ្នកនាំពាក្យវិមានក្រេមឡាំង បានថ្កោលទោសគម្រោងដំណើរទស្សនកិច្ចរបស់លោកស្រី ណាន់ស៊ី ប៉េឡូស៊ី ដោយចាត់ទុកថាជាការបង្ករហេតុ ហើយថា អាមេរិកកំពុងតែបង្កឲ្យមានអស្ថិរភាពនៅលើពិភពលោក។
ពីវ៉ាស៊ីងតោនវិញ លោកចន ខឺប៊ី (John Kirby) មន្ត្រីអ្នកនាំពាក្យក្រុមប្រឹក្សាសន្តិសុខជាតិអាមេរិក បានបញ្ជាក់ថា ការសម្រេចទៅ ឬមិនទៅបំពេញទស្សនកិច្ចនៅតៃវ៉ាន់ គឺជាសិទ្ធិរបស់ប្រធានរដ្ឋសភា ដែលជាអំណាចមួយដាច់ដោយឡែកពីរដ្ឋាភិបាលអាមេរិក ហើយថា នយោបាយ “ចិនមួយ” របស់អាមេរិក មិនមានអ្វីផ្លាស់ប្តូរនោះទេ។
លោកចន ខឺប៊ី បានលើកឡើងថា៖
"គ្មានអ្វីផ្លាស់ប្តូរនោះទេ នៅក្នុងនយោបាយ “ចិនមួយ” របស់អាមេរិក ដែលមានកំណត់ច្បាស់លាស់ ទាំងនៅក្នុងច្បាប់ស្តីពីទំនាក់ទំនងជាមួយតៃវ៉ាន់ និងនៅក្នុងសេចក្តីថ្លែងការណ៍រួមរវាងអាមេរិកនិងចិន។
យើងបានបញ្ជាក់ម្តងហើយម្តងទៀតថា អាមេរិកប្រឆាំងនឹងការកែប្រែជាឯកតោភាគី ទៅលើស្ថានភាពបច្ចុប្បន្ន ទោះជាដោយភាគីណាក៏ដោយ។ យើងបានបញ្ជាក់ថា អាមេរិកមិនគាំទ្រការប្រកាសឯករាជ្យដោយតៃវ៉ាន់ ហើយអាមេរិកចង់ឲ្យជម្លោះ រវាងចិន និងតៃវ៉ាន់ ត្រូវដោះស្រាយដោយសន្តិវិធី។
អាមេរិកធ្លាប់បានបញ្ជាក់រឿងនេះប្រាប់ទៅចិនជាច្រើនដងរួចមកហើយ ប្រាប់ដោយផ្ទាល់ទៅកាន់មេដឹកនាំកំពូលៗ រាប់ទាំងនៅក្នុងកិច្ចសន្ទនាតាមទូរសព្ទលើកចុងក្រោយ កាលពីសប្តាហ៍មុន រវាងលោកប្រធានាធិបតីចូ បៃដិន និងលោកប្រធានាធិបតីស៊ី ជីនពីង ក៏ដូចជា នៅក្នុងកិច្ចសន្ទនាជាច្រើនផ្សេងទៀត រវាងមន្រ្តីជាន់ខ្ពស់អាមេរិក និងមន្រ្តីជាន់ខ្ពស់ចិន។
និយាយជារួម គឺគ្មានហេតុផលណាមួយ ដែលរដ្ឋាភិបាលក្រុងប៉េកាំងត្រូវយកដំណើរទស្សនកិច្ច ដែលមិនមានអីផ្លាស់ប្តូរសោះទៅលើនយោបាយអាមេរិកចំពោះតៃវ៉ាន់ មកធ្វើជាបញ្ហាជម្លោះ ឬក៏យកមកធ្វើជាលេស ដើម្បីបង្កើនសកម្មភាពយោធា នៅក្នុង ឬជុំវិញច្រកសមុទ្រតៃវ៉ាន់នោះទេ។
ក៏ប៉ុន្តែ យើងឃើញថា កាលពីចុងសប្តាហ៍កន្លងទៅនេះ ហើយតាំងពីមុនពេលដែលលោកស្រីប៉េឡូស៊ី ទៅដល់តំបន់អាស៊ីផង ចិនបានធ្វើសមយុទ្ធបាញ់គ្រាប់ពិត ហើយចិនទំនងជាកំពុងតែត្រៀមធ្វើសកម្មភាពជាច្រើនផ្សេងទៀត នៅក្នុងរយៈពេលប៉ុន្មានថ្ងៃខាងមុខ ហើយប្រហែលជាបន្តធ្វើនៅក្នុងរយៈពេលវែងតទៅមុខទៀត។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ