តៃវ៉ាន់៖ ចិនផ្អាកទំនាក់ទំនង និងកិច្ចសហប្រតិបត្តិការមួយចំនួន ជាមួយសហរដ្ឋអាមេរិក
ទំនាក់ទំនងរវាងចិន និងអាមេរិក បានធ្លាក់ចុះទាបបំផុត បន្ទាប់ពីលោកស្រីណាន់ស៊ី ប៉េឡូស៊ី បានទៅទស្សនកិច្ចនៅកោះតៃវ៉ាន់។ ជាវិធានការប្រឆាំងនឹងទស្សនកិច្ចនេះ រដ្ឋាភិបាលចិន បានប្រកាស ផ្អាកទំនាក់ទំនង និងកិច្ចសហប្រតិបត្តិការមួយចំនួន ជាមួយសហរដ្ឋអាមេរិក ក្នុងនោះគឺមានសំណុំរឿងអាកាសធាតុ ការប្រយុទ្ធប្រឆាំងនឹងការកើនឡើងកំដៅផែនដីជាដើម។
ចុះផ្សាយនៅថ្ងៃ៖
ស្តាប់ - ០២:៤២
ក្រៅពីការធ្វើសមយុទ្ធយោធា រដ្ឋាភិបាលចិនបានប្រកាសនៅថ្ងៃសុក្រទី៥សីហាថា ខ្លួននឹងផ្អាកទំនាក់ទំនងជាមួយសហរដ្ឋអាមេរិក នៅលើសំណុំរឿងមួយចំនួន។ កិច្ចសហប្រតិបត្តិការ និងការចរចាគ្នា រវាងអាមេរិក និងចិន ពាក់ព័ន្ធនឹងកិច្ចការប្រយុទ្ធប្រឆាំង នឹងការកើនឡើងកំដៅផែនដី នឹងត្រូវផ្អាកចាប់ពីពេលនេះទៅ។ កិច្ចប្រជុំមួយឆ្នាំម្តង រវាងថ្នាក់ដឹកនាំកងទ័ពនៃប្រទេសទាំង២ ព្រមទាំងកិច្ចប្រជុំចំនួន២ស្តីពីបញ្ហាសន្តិសុខ ក៏ត្រូវបានរដ្ឋាភិបាលចិន សម្រេចលុបចោលដែរ។ បន្ថែមពីនេះទៀត ភាគីចិនអះអាងថាគេក៏នឹងផ្អាកកិច្ចសហការជាមួយអាមេរិកដែរ នៅក្នុងកិច្ចការអន្តោប្រវេសន៍ វិស័យយុត្តិធម៌ ឧក្រិដ្ឋកម្ម និងការប្រយុទ្ធប្រឆាំងការជួញដូរគ្រឿងញៀន។
គួរបញ្ជាក់ថា ទំនាក់ទំនងរវាងចិននិងអាមេរិក កំពុងតែធ្លាក់ចុះខ្លាំងបំផុត ដោយសារតែសំណុំរឿងកោះតៃវ៉ាន់។ ការព្យួរកិច្ចសហប្រតិបត្តិការ ក្នុងសំណុំរឿងអាកាសធាតុ វាគឺជារឿងមួយគួរឲ្យសោកស្តាយខ្លាំងណាស់ សំរាប់ភពផែនដីយើង ខណៈចិន និងអាមេរិក គឺជាមហាអំណាចបញ្ចេញឧស្ម័នកាបូនិក ច្រើនជាងគេបំផុត។
ក្រសួងការបរទេសចិន បានចេញលិខិតប្រកាសដំណឹងនេះ ដោយបានលើកឡើងថា នេះគឺជាវិធានការឆ្លើយតប ចំពោះអាកប្បកិរិយាបំពាន និងមើលងាយ របស់លោកស្រីណាន់ស៊ី ប៉េឡូស៊ី។ ភាគីចិនបន្ទោសថា លោកស្រីប្រធានសភាអាមេរិករូបនេះ មិនឲ្យតម្លៃដល់រដ្ឋាភិបាលចិនទាល់តែសោះ ដែលបានចចេស មិនស្តាប់ការជំទាស់របស់ចិន។ ក្រសួងការបរទេសចិន បានថ្កោលទោស ថាលោកស្រីប៉េឡូស៊ី បានលូកដៃកកូរកកាយ ក្នុងកិច្ចការផ្ទៃក្នុងរបស់ចិន ធ្វើឲ្យប៉ះពាល់ដល់អធិបតេយ្យភាពជាតិ និងបូរណភាពជាតិចិន។
ដោយមិនបានបញ្ជាក់លំអិត ក្រសួងការបរទេសចិនអះអាងថា គេនឹងដាក់ទណ្ឌកម្មទៅលើរូបលោកស្រីណាន់ស៊ី ប៉េឡូស៊ី ព្រមទាំងក្រុមគ្រួសារផង។ រីឯសមយុទ្ធយោធា គឺកងទ័ពចិន នឹងបន្តអនុវត្តរហូតដល់ថ្ងៃអាទិត្យ តាមការគ្រោងទុក។
ទាក់ទិននឹងការធ្វើសមយុទ្ធយោធារបស់ចិននេះ រដ្ឋបាលអាមេរិក បានកោះហៅឯកអគ្គរដ្ឋទូតចិនប្រចាំក្រុងវ៉ាស៊ីនតោន ឲ្យចូលទៅបំភ្លឺនៅសេតវិមាន។ លោក John Kirby អ្នកនាំពាក្យសេតវិមានបានលើកឡើងថា រដ្ឋបាលអាមេរិក បានប្រាប់ទៅភាគីចិន ថាការធ្វើសមយុទ្ធយោធានេះ ជាទង្វើគ្មានការទទួលខុសត្រូវ ព្រោះវាធ្វើឲ្យខូច ដល់ស្ថិរភាព សន្តិភាពតំបន់។
យោងតាមប្រភពពីរដ្ឋាភិបាលតៃវ៉ាន់ យ៉ាងហោចណាស់ មានយន្តហោះចម្បាំងចិនចំនួន ៦៨គ្រឿង ព្រមទាំងនាវាចម្បាំង១៣គ្រឿង បានបោះពួយឈានចូលហួសបន្ទាត់ពុះចែក ក្នុងតំបន់ច្រកសមុទ្រតៃវ៉ាន់ ដែលចែកតៃវ៉ាន់ ពីចិនដីគោក។ ភាគីជប៉ុនវិញអះអាងថា យ៉ាងហោចណាស់ មានមីស៊ីលបាលីស្ទីកចិន ចំនួន៥គ្រាប់ បានហោះរំលងពីលើតៃវ៉ាន់ ហើយបានធ្លាក់ចូលដែនទឹករបស់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ