តៃវ៉ាន់ចោទចិនថាប្រើលេសធ្វើសមយុទ្ធដើម្បីឡោមព័ទ្ធកោះ
នៅតៃវ៉ាន់ ថ្ងៃទី៦កក្កដា អ្នកទទួលខុសត្រូវជាន់ខ្ពស់កម្មវិធីផលិតមីស៊ីល របស់ក្រុងតៃប៉ិ បានស្លាប់នៅមន្ទីរពេទ្យ ព្រោះតែជំងឺគាំងបេះដូង។ អាយុ៥៧ឆ្នាំ លោក អ៊ូយ៉ាង លីស្ស៊ីង (Ouyang Li-hsing) ជាអនុប្រធានវិទ្យាស្ថានវិទ្យាសាស្ត្រនិងបច្ចេទេស ដែលទទួលបន្ទុកកិច្ចការផលិតមីស៊ីលរបស់កោះតៃវ៉ាន់។ លោកទើបតែចូលកាន់តំណែងក្នុងនៅឆ្នាំនេះតែប៉ុណ្ណោះ។ មរណភាពដោយសារគាំងបេះដូងនេះ គឺជួនចំពេលដែលកោះតៃវ៉ាន់ រងការ«ឡោមព័ទ្ធ» ដោយសារតែសមយុទ្ធយោធាដ៏ធំសម្បើមរបស់ចិនប៉េកាំង។
ចុះផ្សាយនៅថ្ងៃ៖
ស្តាប់ - ០២:៥១
ក្រុងប៉េកាំង បានបើកសមយុទ្ធយោធាទ្រង់ទ្រាយធំ ដែលគ្រោងធ្វើចំនួន៤ថ្ងៃ ចាប់ពីថ្ងៃព្រហស្បតិ៍ និងបន្តទៀតរហូតដល់ថ្ងៃអាទិត្យ។ ការបំផ្លោងពាក្យសម្តីពីក្រុងតៃប៉ិ មានជាហូរហែ តាំងពីថ្ងៃធ្វើសមយុទ្ធដំបូងមកម្ល៉េះ។ នៅសៅរ៍នេះទៀត តៃវ៉ាន់ បានចោទ ចិន ថាប្រើលេសធ្វើសមយុទ្ធដើម្បីឡោមព័ទ្ធកោះតៃវ៉ាន់។
អាជ្ញាធរតៃវ៉ាន់ ថ្ងៃសៅរ៍ទី៦កក្កដា បានអះអាងថា ចិនបន្តធ្វើសមយុទ្ធធំ ហើយហាក់ដូចជាមានលក្ខណៈសមយុទ្ធឡោមព័ទ្ធ បិទផ្លូវ បិទច្រក កោះតៃវ៉ាន់ តែម្តង។ គឺមិនធ្លាប់មានទេ ពីមុនមក។ រដ្ឋមន្ត្រីការពារជាតិតៃវ៉ាន់ បញ្ជាក់ទៀតថា យន្តហោះនិងនាវាចិន បានចូលមកកៀកកោះតៃវ៉ាន់មែនទែន និងឆ្លងផុតគំនូរបន្ទាត់ហាមឃាត់ទៅទៀត។
យោងតាមប្រភពពីអាជ្ញាធរតៃវ៉ាន់ កាលពីថ្ងៃសុក្រ មានយន្តហោះចម្បាំងចិនចំនួន ៦៨គ្រឿង ព្រមទាំងនាវាចម្បាំង១៣គ្រឿង បានបោះពួយឈានចូលហួសបន្ទាត់ពុះចែក ក្នុងតំបន់ច្រកសមុទ្រតៃវ៉ាន់ ដែលចែកតៃវ៉ាន់ ដីកោះ ពីចិនដីគោក។ ខ្សែបន្ទាត់នេះ គឺគូសកំណត់ដោយសហរដ្ឋអាមេរិក នាអំលុងពេលសម័យសង្គ្រាមត្រជាក់ ដែល ចិន មិនដែលទទួលស្គាល់ឡើយ។
សារព័ត៌មានរដ្ឋចិន ជាច្រើន និង ទូរទស្សន៍ចិន CCTV បានអះអាងថា មានមីស៊ីលចិនជាច្រើនគ្រាប់ បានហោះរំលងនិងហោះលើកោះតៃវ៉ាន់ ហើយនេះជាលើកទី១ មិនដែលធ្លាប់ឃើញពីមុនសោះ។
ភាគីពីជប៉ុន ក៏បញ្ជាក់ថា យ៉ាងហោចណាស់ មានមីស៊ីលបាលីស្ទីកចិន ចំនួន៥គ្រាប់ បានហោះរំលងពីលើតៃវ៉ាន់ ហើយបានធ្លាក់ចូលដែនទឹករបស់ជប៉ុន។
ពីចំណែកភាគីចិនប៉េកាំងវិញ ទីបញ្ជាការយោធាចិន បានប្រកាសថា បានដាក់ពង្រាយយន្តហោះចម្បាំង នាវាចម្បាំង យន្តហោះពិឃាត ហើយនិងនាវាអមដំណើរជាច្រើន ដែលចូលរួមប្រតិបត្តិការណ៍សមយុទ្ធយោធានានេះ «ទាំងថ្ងៃទាំងយប់»។
ទំហំនៃសមយុទ្ធរបស់ចិន ធំធេង ធ្វើឲ្យប្រទេសបច្ចិមលោកថ្លែងក្តីព្រួយ ហើយប្រទេសធំៗដែលមានសេដ្ឋកិច្ចជឿនលឿន G7 រួមនិងសហរដ្ឋអាមេរិក ដែលជាមិត្តរបស់តៃវ៉ាន់ផង បានថ្កោលទោសរដ្ឋអំណាចក្រុងប៉េកាំង។ រដ្ឋបាលទីក្រុងវ៉ាស៊ីនតោនថែមទាំងបានកោះហៅឯកអគ្គរដ្ឋចិនប្រចាំសហរដ្ឋអាមេរិក លោក Qin Gang ទៅសួរដេញដោល ហើយនិងអង្អុលបង្ហាញពីសកម្មភាពដែលមានគ្មានការទទួលខុសត្រូវពីសំណាក់ក្រុងប៉េកាំងថែមទៀត។
ទោះជាយ៉ាងនេះក្តី ក្រសួងការបរទេសចិន បានប្រកាសស្រេចហើយថា ចិនផ្អាកទំនាក់ទំនង និងកិច្ចសហប្រតិបត្តិការមួយចំនួនជាមួយសហរដ្ឋអាមេរិក ក្នុងនោះ គឺមានសំណុំរឿងអាកាសធាតុ និងការប្រយុទ្ធប្រឆាំងនឹងការកើនឡើងកម្តៅផែនដីជាដើម ដែលបានរដ្ឋទាំងពីរព្រមព្រៀងគ្នាកាលពីឆ្នាំទៅមិញ។
អ្នកជំនាញអាកាសធាតុ Alden Meyer នៃ E3G បានសម្តែងក្តីបារម្ភខ្លាំងចំពោះវិបត្តិអាកាសធាតុ ប្រសិនបើប្រទេសមហាសេដ្ឋកិច្ចទាំងពីរបែរខ្នងដាក់គ្នាចំពោះកិច្ចសហការពាក់ព័ន្ធនឹងវិស័យបរិស្ថានអាកាសធាតុនេះ។ អគ្គលេខាធិការអង្គការសហប្រជាជាតិ Antonio Guterres ក៏ថប់អារម្មណ៍ដែរ និងបញ្ជាក់តាមអ្នកនាំពាក្យថា គេមិនអាចដោះស្រាយបញ្ហាដោយគ្មានការចរចាគ្នាបានទេ ហើយនិងថា គ្មានកិច្ចសហការដ៏មានប្រសិទ្ធភាពអាចធ្វើទៅបាន ប្រសិនបើគ្មានការចូលរួមពីប្រទេសទាំងពីរទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ