តៃវ៉ាន់ធ្វើសមយុទ្ធការពារជាតិ បន្ទាប់ពីចោទចិនថារៀបចំការឈ្លានពាន
ថៃ្ងអង្គារនេះតៃវ៉ាន់បានធ្វើសមយុទ្ធការ ការពារប្រឆាំងនឹងការវាយប្រហារ ឆ្លើយតបទៅលើការសំដែងថាមពលយោធារបស់ចិន ជាច្រើនថ្ងៃកន្លងមកនៅជុំវិញកោះរបស់ខ្លួន។ ប្រមុខការទូតរបស់តៃវ៉ាន់បានសំដែងនូវការព្រួយបារម្ភយ៉ាងខ្លាំង ហើយបានចោទប្រកាន់ចិនថា កំពុងធ្វើការររៀបចំផែនការឈ្លានពានលើដែនដីកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:១០
ហេតុការណ៍នេះបានកើតឡើងក្រោយពី ដំណើរទស្សនកិច្ចរបស់ប្រធានសភាអាមេរិក លោកស្រីណាន់ស៊ី ប៉េឡូស៊ី កាលពីសប្តាហ៍មុន។ ដោយភាពខឹងសម្បារ ប្រទេសចិនបានធ្វើសមយុទ្ធដែនអាកាស និងជើងទឹកដ៏ធំបំផុតនៅជុំវិញកោះតៃវ៉ាន់។
ការឆ្លើយតបរបស់ចិននេះគឺ ឈរលើគោលការណ៍មួយចាត់ទុកកោះតៃវ៉ាន់ថាជាផ្នែកមួយនៃទឹកដីរបស់ខ្លួន ហើយបានប្រកាសតាំងចិត្តថា នឹងយកកោះនេះមកវិញដោយវិធីសាស្រ្តណាក៏ដោយ ហេតុនេះកោះតៃវ៉ាន់តែងតែស្ថិតក្នុងភាពគ្រោះថ្នាក់នៃការឈ្លានពានរបស់ប្រទេសចិន។
ក្នុងសន្និសីទសារព័ត៌មាននៅទីក្រុងតៃប៉ិ រដ្ឋមន្ត្រីការបរទេសតៃវ៉ាន់បានចោទប្រកាន់ទីក្រុងប៉េកាំងថាបានយកដំណើរទស្សនកិច្ចនេះជាលេសតែប៉ុណ្ណោះ ដើម្បីធ្វើសកម្មភាពយោធាគំរាម ត្រៀមខ្លួនឈ្លានពានតៃវ៉ាន់។
យ៉ាងណាមិញ ការធើ្វសមយុទ្ធរបស់ តៃវ៉ាន់នេះ បើយោងតាមអ្នកនាំពាក្យកងទ័ពក្រុមទី៨ គឺមិនមែនជាការឆ្លើយតបទៅលើសកម្មភាពយោធារបស់ចិននោះឡើយ ព្រោះសមយុទ្ធនេះគឺសិ្ថតនៅក្នុង កាលវិភាគយោធាប្រចាំឆ្នាំរួចមកហើយ។
យោងតាមយោធាចិន សមយុទ្ធនៅក្បែរតៃវ៉ាន់និងបន្តដល់ថ្ងៃអង្គារនេះដោយប្រើ កងទ័ពអាកាស និងកងទ័ពជើងទឹក។ តបទៅនឹងការពង្រីកប្រតិបត្តិការយោធានេះ តៃវ៉ាន់បានធើ្វសមយុទ្ធប្រឆាំងប្រតិបត្តិការ វាយលុកឡើងគោក ហើយសហរដ្ឋអាមេរិកជឿជាក់ថា ចិននឹងមិនឆ្លើយតបលើសពីនេះទៀតឡើយ។
យោងតាមរដ្ឋមន្ត្រីការបរទេសតៃវ៉ាន់ ចិនកំពុងព្យាយាមគ្រប់គ្រងច្រកសមុទ្រ និងដែនទឹករបស់តៃវ៉ាន់ ហើយលើសពីការធ្វើសមយុទ្ធយោធានេះ ចិនក៏កំពុងព្យាយាមបំបាក់ទឹកចិត្តប្រជាជនតៃវ៉ាន់ ដោយធ្វើការវាយប្រហារតាមប្រព័ន្ធអ៊ីនធ័រនែតយុទ្ធនាការផ្សព្វផ្សាយព័ត៌មានមិនពិត និងការដាក់សម្ពាធសេដ្ឋកិច្ចផងដែរ។
ក្នុងអំឡុងពេលសមយុទ្ធនេះតៃវ៉ាន់បានបញ្ចាក់ថា ពុំទាន់មានយន្តហោះ ឬកប៉ាល់របស់ចិនណាបានចូលដែនសមុទ្ររបស់ខ្លួនឡើយ តែតាមវីឌីអូមួយថតដោយអ្នកបើកយន្ដហោះចិនកាលពីសបា្ដហ៍មុន បានអោយឃើញថា យន្តហោះចិនបានចូលជិតកោះតៃវ៉ាន់ជាខ្លាំង។ ហើយយោងតាមប្រព័ន្ធផ្សព្វផ្សាយផ្លូវការរបស់ចិន ក្នុងអំឡុងពេលសមយុទ្ធកាលពីសប្តាហ៍មុន កាំជ្រួចផ្លោងត្រូវបានបាញ់រំលងទីក្រុងតៃប៉ិផងដែរ។
សហរដ្ឋអាមេរិកក៏បានបង្ហាញភាពមិនពេញចិត្តទៅលើ ទំហំ និងកម្លាំងសមយុទ្ធរបស់ប្រទេសចិន ក៏ដូចជាការដកខ្លួនចេញពីកិច្ចពិភាក្សាសំខាន់ៗកន្លងមកដែរ ។ ប៉ុន្តែចិនកាលពីថ្ងៃចន្ទនេះបាន បញ្ចាក់ថាអាកប្បកិរិយានេះគឺឆ្លុះបញ្ចាំងពីភាពរឹងមាំ និងសមរម្យ តបទៅនឹងទង្វើរបស់អាមេរិកតែប៉ុណ្ណោះ ។ ចិនក៏បានជំរុញឱ្យ អាមេរិកធ្វើការគិតពិចារណាឡើងវិញ ហើយកែកំហុសរបស់ខ្លួនជាបន្ទាន់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ