ចិនចេញ “សៀវភៅស” រៀបរាប់ពីផែនការយុទ្ធសាស្ត្រ ដើម្បីបង្រួមបង្រួមជាមួយតៃវ៉ាន់
នៅថ្ងៃពុធទី១០សីហា រដ្ឋាភិបាលចិន បានចេញផ្សាយ “សៀវភៅស” ដែលរៀបរាប់ពីផែនការយុទ្ធសាស្ត្រ ដែលចិនចង់អនុវត្ត ដើម្បីធ្វើឲ្យតៃវ៉ាន់ ងាកមកបង្រួមបង្រួមជាមួយមហាគ្រួសារចិនតែមួយ ដោយសន្តិវិធី។ ជាផែនការដែលចិននឹងផ្តល់អាទិភាព ដល់ការធ្វើសមាហរណ្ណកម្មសេដ្ឋកិច្ចឲ្យបានទូលំទូលាយ។ តែទន្ទឹមគ្នានេះ ចិនអះអាងថា នឹងមិនបោះបង់ចោលជម្រើសប្រើកម្លាំងទេ ប្រសិនបើក្រុមផ្តាច់ខ្លួនទាមទារឯករាជ្យនៅតែរឹងទទឹង។
ចុះផ្សាយនៅថ្ងៃ៖
ស្តាប់ - ០២:៣៧
ការិយាល័យកិច្ចតៃវ៉ាន់ ដែលជាអង្គភាពមួយនៃរដ្ឋាភិបាលចិន បានចេញផ្សាយ “សៀវភៅស” រៀបរាប់លំអិត អំពីផែនការ ដែលចិននឹងអនុវត្ត ដើម្បីក្តោបក្តាប់យកកោះតៃវ៉ាន់ ឲ្យមករួមរស់ក្នុងមហាគ្រួសារចិនឡើងវិញ។ ជាផែនការ ដែលរដ្ឋាភិបាលចិន អះអាងថា នឹងធ្វើដោយសន្តិវិធី តាមរយៈវិធានការសេដ្ឋកិច្ចពាណិជ្ជកម្ម និងវប្បធម៌។
ចិននឹងបង្កើត ឲ្យមានចំណងសហប្រតិបត្តិការ និងការធ្វើសមាហរណ្ណកម្មសេដ្ឋកិច្ច ឲ្យបានធំទូលំទូលាយជាមួយតៃវ៉ាន់ ដើម្បីចែករំលែកការរីកចម្រើនធូរធាដល់តៃវ៉ាន់។ ទន្ទឹមគ្នានេះ ចិននឹងរៀបចំពង្រឹង ទំនាក់ទំនងវប្បធម៌ ផ្នែកសន្តិសុខសង្គម និងវិស័យសុខាភិបាលជាដើម។ ឯកសារនេះ បានបន្ថែមថា នៅពេលណាប្រទេសជាតិចិនរឹងមាំ មានឯកភាព នោះជនរួមជាតិចិន ដែលរស់នៅតៃវ៉ាន់ នឹងកាន់តែមានកម្លាំង មានទំនុកចិត្ត មានសុខសុវត្ថិភាព ហើយកាន់តែត្រូវគេគោរពនៅលើឆាកអន្តរជាតិថែមទៀត។
ដោយឡែក “សៀវភៅស” របស់រដ្ឋាភិបាលចិននេះ បានបញ្ជាក់ផងដែរថា ចិននឹងមិនទុកផ្លូវដើរ ឲ្យក្រុមចលនាបំបែកទឹកដី ដែលចង់ប្រកាសឯករាជ្យកោះតៃវ៉ាន់បានជាដាច់ខាត។ រដ្ឋាភិបាលចិន នៅតែអាចសម្រេច ប្រើកម្លាំង ដែលជាជម្រើសចុងក្រោយ ដើម្បីបោសសំអាត សកម្មភាពរបស់ក្រុមបំបែកទឹកដី និងក្រុមកម្លាំងក្រៅប្រទេស ប្រសិនបើក្រុមទាំងនេះ ហ៊ានតែឈានជើងដើរហួសគំនូសក្រហម។
គួរបញ្ជាក់ថា នេះជាលើកទី២ហើយ ដែលចិនបោះផ្សាយសៀវភៅស ស្តីពីគោលនយោបាយអនុវត្តជាមួយកោះតៃវ៉ាន់ ដែលលើកទី១ ធ្វើនៅឆ្នាំ២០០០។ គួរកត់សំគាល់ថា នៅលើកនេះ “សៀវភៅស” របស់ចិនហាក់មានខ្លឹមសារ ប្រៀបបីដូចជាការបោះដៃទៅឲ្យតៃវ៉ាន់ចាប់ ដោយសន្តិវិធី។ ក៏ប៉ុន្តែបើតៃវ៉ាន់នៅតែរឹងទទឹង នោះចិនរក្សាជម្រើសប្រើកម្លាំង ដើម្បីគ្រប់គ្រងតៃវ៉ាន់។
គួរបញ្ជាក់ដែរថា ចាប់តាំងពីឆ្នាំ១៩៨០មក តៃវ៉ាន់បានងាកឆ្ងាយពីចិនកាន់តែខ្លាំង ដោយបានដើរឆ្ពោះទៅកាន់របបនយោបាយប្រជាធិបតេយ្យសេរី។ ប្រជាជនតៃវ៉ាន់ទាំង២៣លាននាក់ ជាពិសេសក្នុងចំនោមយុវជនជំនាន់ក្រោយៗ បានកសាង និងពង្រឹងអត្តសញ្ញាណរបស់ពួកគេកាន់តែច្បាស់ ខុសពីអត្តសញ្ញាណរបស់ជនជាតិចិនដីគោក ដែលស្ថិតក្រោមនឹមរបបផ្តាច់ការកុម្មុយនីស្ត។ ទំនោរប្រជាធិបតេយ្យ និយមសិទ្ធិសេរីភាពនេះ ត្រូវបានជំរុញកាន់តែខ្លាំងក្រោយការឡើងកាន់អំណាច របស់លោកស្រី ឆៃ អ៊ីងវេន នៅឆ្នាំ២០១៦។ យ៉ាងណាមិញ គណបក្សរបស់លោកស្រីឆៃ អ៊ីងវេន ត្រូវបានរដ្ឋាភិបាលចិន ចាត់ទុកថាជា “ចលនានយោបាយបំបែកទឹកដី” ហើយដែលចិនត្រូវតែប្រយុទ្ធកំចាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ