អាមេរិក ពង្រឹងទំនាក់ទំនងកាន់តែខ្លាំង ជាមួយក្រុងតៃប៉ិ ក្រោយពេល ចិនសមយុទ្ធយោធា
នៅពេលឆាប់ៗខាងមុខនេះ កងទ័ពសហរដ្ឋអាមេរិក កងនាវានិងយន្តហោះចម្បាំងអាមេរិក នឹងធ្វើដំណើរឆ្លងកាត់ទៅកាន់សមុទ្រតៃវ៉ាន់ ជាទីដែល មហាយក្សចិន ធ្វើសមយុទ្ធដ៏ធំសម្បើមនៅសប្តាហ៍មុន។ នេះគឺជាការឲ្យដឹងរបស់មន្ត្រីជាន់ខ្ពស់សេតវិមានប្រធានាធិបតីសហរដ្ឋអាមេរិក និងដែលបញ្ជាក់ទៀតថា សហរដ្ឋអាមេរិក នឹងបន្តពង្រឹងទំនាក់ទំនងសេដ្ឋកិច្ចនិងពាណិជ្ជកម្មជាមួយក្រុងតៃប៉ិ ឲ្យកាន់តែខ្លាំងថែមទៀត។
ចុះផ្សាយនៅថ្ងៃ៖
ស្តាប់ - ០២:១០
ជាថ្មីម្តងទៀត រដ្ឋបាលសហរដ្ឋអាមេរិក បានរិះគន់ថ្កោលទោស ចិន ដែលធ្វើសមយុទ្ធនៅក្បែរកោះតៃវ៉ាន់ ដោយបានចោទថានេះការញុះញង់បង្កហេតុ ហើយនាំឲ្យរង្គោះរង្គើរដល់ស្ថិរភាពសន្តិភាពនៅតៃវ៉ាន់ និងក្នុងតំបន់។ នេះជាការបញ្ជាក់របស់ លោក Kurt Campbell អ្នកទីប្រឹក្សាប្រចាំតំបន់ឥណ្ឌូប៉ាស៊ីហ្វិក របស់លោកប្រធានាធិបតី ចូ បៃឌិន។
មន្ត្រីជាន់ខ្ពស់រូបនេះ សង្កត់ធ្ងន់ថា សហរដ្ឋអាមេរិកនៅតែបន្តធ្វើនាវាចរណ៍ ហោះហើរ និង សហការតាមផ្លូវសមុទ្រ តាមដែលច្បាប់អន្តរជាតិអនុញ្ញាត។ ហើយទន្ទឹមនឹងគ្នានេះ រដ្ឋបាលក្រុងវ៉ាស៊ីនតោន និងក្រុងតៃប៉ិ នឹងបង្កើនមហិច្ចតាពាណិជ្ជកម្មជាមួយគ្នាឲ្យកាន់តែច្រើននិងខ្លាំងក្លាជាងមុនទៅទៀត ដែលគម្រោងពាណិជ្ជកម្មទ្វេភាគី នឹងប្រកាសឲ្យដឹងនៅពេលដ៏ខ្លីខាងមុខ។
ពីចំណែកខ្លួន រដ្ឋបាលទីក្រុងតៃប៉ិ បានថ្លែងអំណរគុណដ៏ជ្រាលជ្រៅនិងដ៏ស្មោះស្មគ្រ ចំពោះសហរដ្ឋអាមេរិក ជាសម្ព័ន្ធមិត្តចាក់ទឹកមិនលេច ព្រមទាំងគូសបញ្ជាក់ថា សកម្មភាពរបស់សហរដ្ឋអាមេរិក បង្ហាញជាក់ច្បាស់ពីការខិតខំប្រឹងក្នុងការជួយធានាសន្តិសុខសុវត្ថិភាពនៅកោះតៃវ៉ាន់ និងរក្សាសន្តិភាពនៅក្នុងតំបន់ផង។ នេះជាខ្លឹមសារនៅក្នុងសេចក្តីថ្លែងការណ៍មួយរបស់ តៃវ៉ាន់។
នៅក្នុងបរិបទដែលមហាយក្សចិនដំឡើងសាច់ដុំ តាមរយៈការធ្វើសមយុទ្ធយោធាដ៏ធំសម្បើមនៅជាប់កោះតៃវ៉ាន់និងដែលធ្វើច្រើនថ្ងៃជាងការគ្រោងទុក, សហរដ្ឋសហរដ្ឋអាមេរិកនិងសម្ព័ន្ធ វិញ បានដំឡើងសម្តីនិងសកម្មភាពវិញដែរ។ នៅថ្ងៃសុក្រ សហរដ្ឋអាមេរិក បានធ្វើសមយុទ្ធយោធា ជាមួយឥណ្ឌូនេស៊ី ដែលមានទាហាន ប្រមាណ៤ ពាន់នាក់។ សមយុទ្ធនេះ ក៏មានទាហានអូស្ត្រាលី និងសិង្ហបុរីចូលរួមផង។ ក្នុងនេះ ក៏មានប្រទេសជាមិត្តផ្សេងទៀត ចូលរួមសង្កេតការណ៍ដែរ តួយ៉ាង បារាំង អង់គ្លេស កូរ៉េខាងត្បូង ឥណ្ឌា ម៉ាឡេស៊ី ជាដើម។ ទោះជាម្តេចក្តី អគ្គមេបញ្ជាការកងទ័ពឥណ្ឌូនេស៊ី Andika Perkasa លើកឡើងថា សមយុទ្ធរួមច្រើនភាគីនេះ បានគ្រោងទុកយូរហើយ តាំងពីមុនពេលផ្ទុះភាពតានតឹងរវាង អាមេរិក ចិន និងតៃវ៉ាន់ មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ