ចិន និង ថៃ ធ្វើសមយុទ្ធយោធារួមគ្នា រយៈពេលជាង១០ថ្ងៃ
នៅថ្ងៃអាទិត្យ ទី១៤ ចិននិងថៃ ចាប់ផ្តើមសមយុទ្ធយោធារួមគ្នា នៅប៉ែកឥសាននៃប្រទេសថៃ។ នេះគឺសមយុទ្ធលើកទី១ បន្ទាប់ពីអាក់ខានផ្អាកធ្វើ ជាច្រើនខែឆ្នាំមក ព្រោះតែជំងឺកូវីដ១៩។ សមយុទ្ធចាប់ផ្តើមជាថ្មីនៅរដូវក្តៅនេះ គឺផ្តើមរៀបចំធ្វើ ចាប់ពីថ្ងៃទី១៤ រហូតដល់២៥ សីហា។ សមយុទ្ធ រយៈពេល១១ថ្ងៃជាប់គ្នានេះ មានវត្ថុបំណងពង្រឹងទំនាក់ទំនងនិងការយោគយល់គ្នា រវាងមហាយក្សចិននិងរាជអាណាចក្រថៃ។ នេះបើតាមយោងតាមសេចក្តីប្រកាសរបស់ប្រធានអាកាសចរណ៍ថៃ និងជាអ្នកនាំពាក្យ នៃរាជកងទ័ពជើងអាកាសថៃ លោក Prapas Sornchaidee។
ចុះផ្សាយនៅថ្ងៃ៖
ស្តាប់ - ០២:៤៣
សមយុទ្ធរួម រវាងថៃនិងចិន ចាប់ធ្វើជារៀងរាល់ឆ្នាំ តាំងពីឆ្នាំ២០១៥រហូតមក និងដែលទើបនឹងផ្អាកនៅពេលផ្ទុះមេរោគកូវីដ១៩។ ក្រសួងការពារជាតិចិន ប្រកាសក្នុងសប្តាហ៍នេះថា ចិនបញ្ជូនយន្តហោះចម្បាំង យន្តហោះទម្លាក់គ្រាប់បែក និងយន្តហោះឈ្លបយកការណ៍ ដើម្បីចូលរួមសមយុទ្ធជាមួយថៃ។ បើតាមក្រសួងការពារជាតិចិនដដែល សមយុទ្ធរួមគ្នាជាមួយថៃ ក៏មានដែរការហ្វឹកហាត់សង្គ្រោះតាមផ្លូវអាកាស ការប្រហារផ្លូវពីលើមេឃទៅចំណុចគោលដៅនៅលើដី ហើយនិងដាក់ពង្រាយកទ័ពជាច្រើនក្រុមផង។
សមយុទ្ធថៃ-ចិន ត្រូវប្រទេសទាំងពីរឲ្យឈ្មោះថា «ការវាយប្រហារឥន្ទ្រី»។ នេះអាចមានន័យយ៉ាងហោចពីរ គឺ១ ការវាយប្រហារផ្លូវអាកាស ហើយទី២ គឺទំនងជាអាចសំដៅទៅនិមិត្តសញ្ញាតំណាងជាតិរបស់សហរដ្ឋអាមេរិក ដែលមានសត្វឥន្ទ្រីត្រដាងស្លាប នោះផង ក៏អាចថាបាន។
សហរដ្ឋអាមេរិក ពីចំណែកខ្លួន បានថ្លែងក្តីព្រួយបារម្ភពីការបង្កើនវត្តមានចិននៅក្នុងតំបន់។ អាមេរិកខ្លួនឯង ក៏បានផ្តើមសមយុទ្ធយោធារួមគ្នាជាមួយ កងទ័ពឥណ្ឌូនេស៊ី ដែលទើបតែចប់ថ្មីៗនេះ។
ទិដ្ឋភាពមួយបែបទៀត ថៃ គឺជាសម្ព័ន្ធមួយដៃគូរបស់សហរដ្ឋអាមេរិក តែ ថៃ ក៏បង្កើនចំណងទាក់ទងស្អិតខ្លាំងមួយចិន និងកាន់តែខ្លាំងឡើងនៅក្នុងអាណត្តិរបស់នាយករដ្ឋមន្ត្រី ឧត្តមសេនីយ ប្រាយុទ្ធ ចាន់អូចារ ដែលធ្វើរដ្ឋប្រហារឡើងកាន់អំណាចតាំងពីឆ្នាំ២០១៤។
ជាច្រើនឆ្នាំមកហើយ ដែលមហាយក្សចិននិងថៃបានពង្រឹងទំនាក់ទំនងទ្វេភាគី ហើយ ថៃបានព្យាយាមទិញសម្ភារៈសឹកសង្គ្រាមពីចិន បន្ទាប់ពីបានចុះកិច្ចព្រមព្រៀងយោគយល់គ្នាមួយ នៅឆ្នាំ២០១៧។ នៅឆ្នាំ២០២០ ថៃបានគ្រោងទិញនាវាមុជទឹករបស់ចិន ចំនួន២គ្រឿង ក្នុងតម្លៃទឹកប្រាក់ ៧២៤លានដុល្លារ។ ការទិញដូរនេះត្រូវពន្យារពេល ដោយត្រូវរកការរិះគន់មិនសូវល្អពីសំណាក់ប្រជារាស្ត្រថៃ។
ទោះជាម្តេចក្តី នាវាមុជចិន ប្រភេទស៊ីប្រេងម៉ាស៊ូត អាចគ្រោងនឹងបញ្ចូនទៅស្រុកថៃ នៅឆ្នាំ២០២៤។ ថៃជាប្រទេសដំបូងៗទី១នៅអាស៊ីអាគ្នេយ៍ ជាមួយនឹងស្រីលង្កា ដែលទិញគ្រឿងសព្វាវុធពីចិន។ កងទ័ពជើងទឹកថៃ ប្រកាសដែរថា បើបាននាវាមុជទឹកចិនមក នឹងបានជាប្រយោជន៍ដើម្បីការពារចំពោះអំពើឈ្លានពាននៅឈូងសមុទ្រសៀម ហើយនិងរក្សាសន្តិសុខសុវត្ថិភាពក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ