តុលាការធម្មនុញ្ញថៃ សម្រេចព្យួរតំណែងលោកប្រាយុទ្ធ ចាន់អូចា
តើជីវិតនយោបាយ របស់លោកប្រាយុទ្ធ ចាន់អូចា ក្នុងនាមជានាយករដ្ឋមន្ត្រីថៃ កំពុងតែជួយគ្រោះថ្នាក់ឬ? ក្រុមគណបក្សប្រឆាំងថៃ បានទាមទារទៅតុលាការធម្មនុញ្ញថៃ ឲ្យបញ្ចប់អាណត្តិរបស់លោកប្រាយុទ្ធ ចាន់អូចា ព្រោះថាលោក បានកាន់មុខតំណែងជានាយករដ្ឋមន្ត្រី គ្រប់រយៈពេល៨ឆ្នាំហើយ ដែលជារយៈពេលអតិបរមា កំណត់ដោយរដ្ឋធម្មនុញ្ញឆ្នាំ២០១៧។ នៅថ្ងៃពុធ ទី២៤សីហា តុលាការធម្មនុញ្ញថៃ បានសម្រេចព្យួរលោកប្រាយុទ្ធ ចាន់អូចា ពីមុខតំណែងនាយករដ្ឋមន្ត្រីជាបណ្តោះអាសន្នសិន ដើម្បីរងចាំការសម្រេចសេចក្តីជាផ្លូវការ។
ចុះផ្សាយនៅថ្ងៃ៖
ស្តាប់ - ០២:៥៤
តាមរយៈសេចក្តីថ្លែងការណ៍ តុលាការធម្មនុញ្ញបានឲ្យដឹងថា ចៅក្រមបានសម្រេចជាឯកច្ឆន្ទ ទទួលយកបណ្តឹងជំទាស់នឹងការបន្តកាន់តំណែងរបស់លោកប្រាយុទ្ធ ចាន់អូចា ដោយលើកឡើង ពីការកំណត់អាណត្តិនាយករដ្ឋមន្រ្តីត្រឹម ៨ឆ្នាំ ដែលមានចែងនៅក្នុងរដ្ឋធម្មនុញ្ញ។ ក្នុងពេលជាមួយគ្នា តុលាការក៏បានសម្រេចផងដែរ ក្នុងសំឡេងភាគច្រើន ៥ ទល់នឹង ៤ ព្យួរតំណែងលោកប្រាយុទ្ធ ចាន់អូចា ជាបណ្តោះអាសន្ន រហូតដល់មានការសម្រេចសេចក្តីជាចុងក្រោយ។
ក្នុងអំឡុងពេលនេះ លោកប្រាយុទ្ធ ចាន់អូចា នៅតែបន្តមុខងារជារដ្ឋមន្ត្រីក្រសួងការពារជាតិជាធម្មតា ចំណែកលោកឧបនាយករដ្ឋមន្ត្រី ប្រាវីត វង់ស៊ូវ៉ាន នឹងឡើងមកធ្វើជានាយករដ្ឋមន្ត្រីបណ្ដោះអាសន្ន។ គួរបញ្ជាក់ដែរថា ចាប់ពីថ្ងៃពុធនេះទៅ តុលាការធម្មនុញ្ញថៃ ចាប់ផ្តើមពិភាក្សាវែកញែក ទាក់ទិននឹងសំណួរដែលចោទថា តើ លោកប្រាយុទ្ធ ចាន់អូចា បានកាន់មុខតំណែងនាយករដ្ឋមន្ត្រី គ្រប់៨ឆ្នាំហើយឬយ៉ាងណា? រយៈពេល៨ឆ្នាំ គឺជារយៈពេលអតិបរមា កំណត់ដោយរដ្ឋធម្មនុញ្ញឆ្នាំ២០១៧។
យ៉ាងណាក៏ដោយ ថ្វីបើការសម្រេចព្យួរលោកប្រាយុទ្ធ ចាន់អូចា ពីមុខតំណែងនាយករដ្ឋមន្ត្រីនៅពេលនេះ បានបង្កឲ្យមានភ្ញាក់ផ្អើលមែន តែអ្នកវិភាគមួយចំនួនធំ បានអះអាងថា គេមិនជឿថា តុលាការធម្មនុញ្ញថៃ នឹងសម្រេចសេចក្តី បិទបញ្ចប់ជាស្ថាពរនូវអាណត្តិនាយករដ្ឋមន្ត្រី របស់លោកប្រាយុទ្ធ ចាន់អូចានោះទេ។ ឆ្លើយប្រាប់អ្នកយកព័ត៌មានបារាំង AFP លោក ធីទីណាន់ ភង់សុទ្ធីរ៉ាក់ សាស្ត្រាចារ្យវិទ្យាសាស្ត្រនយោបាយ នៅសកលវិទ្យាល័យជូឡាឡុងកន បានលើកឡើងថា បើយើងក្រឡេកមើលបទពិសោធន៍ ៨ឆ្នាំមកនេះ គឺស្ថាប័នកំពូលថៃ តែងតែសម្រេចអនុម័ត កាន់ជើងលោកប្រាយុទ្ធ ចាន់អូចា ជានិច្ច។ ហើយលោកប្រាយុទ្ធ ចាន់អូចា តែងតែបានឆ្លងផុតគ្រោះកាច ដែលបានបោកបក់ គំរាមជីវិតនយោបាយរបស់លោកជានិច្ច ជាក់ស្តែងចលនាបាតុកម្មធំនៅឆ្នាំ២០២០ ដែលបានរលាយអស់ឥទ្ធិពលទៅវិញ។
លោក ធីទីណាន់ ភង់សុទ្ធីរ៉ាក់ អះអាងថា មួយវិញទៀត មានការបកស្រាយច្រើនសណ្ឋាន ទាក់ទិននឹងមាត្រា ដែលកំណត់រយៈពេលកាន់តំណែងនាយករដ្ឋមន្ត្រី មិនឲ្យលើស៨ឆ្នាំ។ ថ្វីបើលោកប្រាយុទ្ធចាន់ អូចា ចាប់ផ្តើមធ្វើជានាយករដ្ឋមន្ត្រី ក្រោយការធ្វើរដ្ឋប្រហារឆ្នាំ២០១៤មែន តែការបកស្រាយខ្លះលើកឡើងថា មាត្រាកំណត់រយៈពេល៨ឆ្នាំនេះ គឺចាប់មានសុពលភាព ក្រោយរដ្ឋធម្មនុញ្ញចូលជាធរមាន ពោលគឺនៅឆ្នាំ២០១៧។ ការបកស្រាយខ្លះ ហ៊ានដល់ទៅអះអាងថា ចំណុចចាប់ផ្តើម នៃការកាន់មុខតំណែងនាយករដ្ឋមន្ត្រីជាផ្លូវការ របស់លោកប្រាយុទ្ធ ចាន់អូចា គឺនៅឆ្នាំ២០១៩ ក្រោយលោកបានឈ្នះឆ្នោតដោយស្របច្បាប់។
គួរកត់សំគាល់ដែរថា នៅព្រឹកថ្ងៃពុធនេះ នៅជុំវិញវិមានរដ្ឋាភិបាលថៃក្នុងក្រុងបាងកក គេឃើញសមត្ថកិច្ចថៃ បានយកកុងទឺន័រជាច្រើនគ្រឿងមកដាក់បាំង ការពារសន្តិសុខ ខណៈក្រុមបាតករ បានចាប់ផ្តើមប្រមូលផ្តុំគ្នា ធ្វើបាតុកម្មទាមទារឲ្យលោកប្រាយុទ្ធ ចាន់អូចា ចុះចេញពីតំណែង។ កាលៈទេសៈពេលនេះ អាចនឹងធ្វើឲ្យប្រែប្រួលដល់បរិបទនយោបាយថៃ ខណៈការបោះឆ្នោតសភាអាណត្តិថ្មី នឹងមកដល់នៅខែមីនា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ