នាវាចម្បាំង២របស់អាមេរិក ធ្វើដំណើរឆ្លងកាត់ច្រកសមុទ្រតៃវ៉ាន់ ខណៈចិនប្រឹងតាមដាន
ថ្ងៃអាទិត្យទី២៨សីហានេះ នាវាចម្បាំងរបស់អាមេរិក ចំនួន២គ្រឿង កំពុងធ្វើដំណើរឆ្លងកាត់ច្រកសមុទ្រតៃវ៉ាន់ ដែលខណ្ឌចែក ចិនដីគោក និងកោះតៃវ៉ាន់។ ក្រសួងការពារជាតិអាមេរិក អះអាងថា ការធ្វើដំណើរចល័តរបស់នាវាចម្បាំងនេះ គឺដើម្បីបង្ហាញពីការសន្យារបស់សហរដ្ឋអាមេរិក ក្នុងការការពារស្ថិរភាព ក៏ដូចជាសន្តិសុខ នៃតំបន់នេះ ដែលជាច្រកឆ្លងកាត់នៃនាវាដឹកទំនិញ ដោយគោរពទៅតាមច្បាប់អន្តរជាតិ ជាធរមាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
យោងតាមកងបញ្ជាការជើងទឹកលេខ៧ របស់អាមេរិក បានឲ្យដឹងថា នាវា២គ្រឿងប្រភេទនាវាបាញ់មីស៊ីល លំដាប់ Ticonderoga មួយឈ្មោះ USS Antietam មួយទៀតឈ្មោះ USS Chancellorsville កំពុងតែធ្វើដំណើរឆ្លងកាត់ច្រកសមុទ្រហ្វ័រម៉ូស ឬច្រកសមុទ្រតៃវ៉ាន់។ ប្រភពដដែលនេះ អះអាងថា ប្រតិបត្តិការនេះ គឺជាប្រតិបត្តិការសាមញ្ញ នៅក្នុងដែនទឹកដែលជាតំបន់ ដែលត្រូវបានការពារដោយច្បាប់អន្តរជាតិ លើសេរីភាពក្នុងការធ្វើដំណើរតាមនាវា ក៏ដូចជាការហោះហើរ។
ចំណែក អគ្គបញ្ជាការដ្ឋានកងទ័ពជើងទឹកអាមេរិក បានចេញលិខិតប្រកាសមួយ ដោយបានលើកឡើងថា ដំណើរឆ្លងកាត់របស់នាវាចម្បាំងអាមេរិកទាំង២គ្រឿង នៅច្រកសមុទ្រតៃវ៉ាន់នេះ គឺជាការបង្ហាញវត្តមានរបស់សហរដ្ឋអាមេរិក ដែលគោរពការសន្យា និងការប្តេជ្ញាចិត្ត ក្នុងការការពាររក្សាស្ថិរភាព ព្រមទាំងសន្តិសុខនៃតំបន់នេះ។ តំបន់ឥណ្ឌូប៉ាស៊ីហ្វិក ដែលអាមេរិក ចង់ការពារឲ្យស្ថិតនៅជាតំបន់សេរី និងបើកចំហរជានិច្ច។
ពីខាងភាគីចិនវិញ លោក Shi Yie អ្នកនាំពាក្យអគ្គបញ្ជាការដ្ឋានកងទ័ពចិន ទទួលបន្ទុកតំបន់ខាងកើត បានឲ្យដឹងថា កងទ័ពចិនកំពុងតែតាមដានសង្កេតគ្រប់សកម្មភាព និងអាកប្បកិរិយារបស់នាវាចម្បាំងអាមេរិក ដែលកំពុងតែឆ្លងកាត់ច្រកសមុទ្រតៃវ៉ាន់។ លោកបានបញ្ជាក់ថា កងទ័ពចិនបានទទួលបញ្ជា ឲ្យឈរប្រុងប្រៀងជើងជាប្រចាំ ដើម្បីឆ្លើយតបវិញក្នុងករណី មានការបង្កបញ្ហារករឿងណាមួយ។
ដោយឡែក ក្រសួងការពារជាតិតៃវ៉ាន់ បានចេញលិខិតប្រកាសខ្លីមួយ ដោយគ្រាន់តែបានបញ្ជាក់ថា នាវាចម្បាំង២គ្រឿង នៃកងទ័ពជើងទឹកអាមេរិក បានឆ្លងកាត់ច្រកសមុទ្រតៃវ៉ាន់ ពីជើងទៅត្បូង ហើយកងទ័ពតៃវ៉ាន់ទាំងផ្លូវទឹក និងផ្លូវអាកាស បានតាមដានការធ្វើដំណើរនេះ ដែលបានប្រព្រឹត្តិដោយរលូនប្រក្រតី។
គួរបញ្ជាក់ថា កងបញ្ជការកងទ័ពជើងទឹកលេខ៧ របស់អាមេរិក ដែលមានមូលដ្ឋានឈរជើង នៅភាគខាងត្បូងជប៉ុន គឺជាកម្លាំងវត្តមានដ៏សំខាន់បំផុត របស់កងទ័ពអាមេរិក ប្រចាំនៅតំបន់អាស៊ីប៉ាស៊ីហ្វិក។ តំបន់នេះ បាននិងកំពុងតែឆ្លងកាត់ភាពតានតឹងខ្លាំងបំផុត រវាងចិន និងអាមេរិក បន្ទាប់ពីលោកស្រីប្រធានរដ្ឋសភាអាមេរិក បានទៅទស្សនកិច្ចនៅកោះតៃវ៉ាន់ នៅដើមខែសីហានេះ។ ក្រោយទស្សនកិច្ចដ៏ចម្រូងចម្រាសនេះ ចិនបានធ្វើសមយុទ្ធយោធាទ្រង់ទ្រាយធំមិនធ្លាប់មាន ហាត់សមការឡោមព័ទ្ធកោះតៃវ៉ាន់ និងបានបាញ់មីស៊ីលជាច្រើនគ្រាប់ ធ្លាក់ចូលដែនទឹករបស់ជប៉ុនថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ