ស្លាប់យ៉ាងហោច១០០០នាក់ ដោយគ្រោះទឹកជំនន់ដ៏ធ្ងន់ធ្ងរបំផុត នៅភាគខាងត្បូងប៉ាគីស្ថាន
ភាគខាងត្បូងប៉ាគីស្ថាន កំពុងតែរងគ្រោះដោយទឹកជំនន់ ដ៏ធ្ងន់ធ្ងរបំផុត ជាច្រើនថ្ងៃមកនេះ។ នៅថ្ងៃអាទិត្យនេះ យោងតាមការព្យាករណ៍ឧតុនិយម ទឹកជំនន់នៅតាមដងទន្លេ នឹងជន់ឡើងបន្ថែមទៀត ជាមួយចរន្តទឹកហូរកួចត្របាញ់ ដោយសារភ្លៀងធ្លាក់យ៉ាងគំហុកនៅតំបន់ភ្នំ។ គិតមកត្រឹមពេលនេះ យោងតាមតួលេខចុងក្រោយ របស់អាជ្ញាធរប៉ាគីស្ថាន គឺមានជនរងគ្រោះស្លាប់ប្រមាណជាង១ពាន់នាក់ហើយ។
ចុះផ្សាយនៅថ្ងៃ៖
ស្តាប់ - ០២:៣៦
ទឹកទន្លេអ៊ីនឌុស (Indus) ដែលហូរកាត់ប៉ាគីស្ថានពីជើងទៅត្បូង បានជន់ឡើងខ្លាំងជាច្រើនថ្ងៃមកហើយ បន្ទាប់ពីមានភ្លៀងធ្លាក់យ៉ាងគំហុក ព្រមទាំងការរលាយទឹកកក នៅតំបន់ជួរភ្នំហិម៉ាល័យ ដោយសារតែសីតុណ្ហភាពក្តៅខ្លាំង។ ក្រុង Sukkur ស្ថិតក្នុង Sindh នៅភាគខាងត្បូងប៉ាគីស្ថាន គឺជាតំបន់រងគ្រោះធ្ងន់ធ្ងរបំផុត ដោយសារគ្រោះទឹកជំនន់នេះ។
ជាមួយនឹងកម្លាំងទឹកហូរ ប្រមាណ ៦សែនម៉ែត្រគូបក្នុងមួយវិនាទី អាជ្ញាធរបានបើកចំហរទ្វារទំនប់ ដើម្បីចៀសវៀងកុំឲ្យទំនប់បាក់ ដែលតាមធម្មតាវាមានតួនាទីគ្រប់គ្រងលំហូរទឹក។ អាជ្ញាធរខេត្ត Sindh បានលើកឡើងថា ក្នុងរវាងប៉ុន្មានថ្ងៃខាងមុខ ទឹកទន្លេនឹងឡើងកំពស់បន្ថែមទៀត ធ្វើឲ្យជនលិចផ្ទះសំបែងភូមិឋានរបស់ប្រជាពលរដ្ឋ ជាច្រើនលាននាក់។
តួលេខចុងក្រោយ ផ្សាយកាលពីរសៀលថ្ងៃអាទិត្យទី ២៨សីហា ដោយអាជ្ញាធរជាតិគ្រប់គ្រងគ្រោះមហន្តរាយប៉ាគីស្ថាន គឺមានមនុស្សស្លាប់ចំនួន ១០៣៣នាក់ ដែលក្នុងនោះ មាន១១៩នាក់ នៅក្នុងរយៈពេល២៤ម៉ោងចុងក្រោយ ដែលទឹកជនហូរខ្លាំង។ យ៉ាងហោចណាស់ ប្រជាជនប៉ាគីស្ថានចំនួន៧លាននាក់ ក្នុងចំណោម៣៣លាននាក់ ដែលកំពុងតែរងគ្រោះដោយគ្រោះទឹកជំនន់នេះ។
យោងតាមអាជ្ញាធរប៉ាគីស្ថាន គ្រោះទឹកជំនន់លើកនេះ មានភាពធ្ងន់ធ្ងរ ប្រហាក់ប្រហែលនឹងឆ្នាំ២០១០ ដែលកាលនោះ ១ភាគ៥ នៃផ្ទៃដីប៉ាគីស្ថានទាំងមូល ត្រូវទឹកជន់លិច ហើយមនុស្សយ៉ាងហោចណាស់២០០០នាក់បានស្លាប់។ កាលពីថ្ងៃសុក្រ រដ្ឋាភិបាលប៉ាគីស្ថាន បានប្រកាសអាសន្នជាតិកម្រិតធ្ងន់បំផុត ព្រមទាំងបានបញ្ចេញកម្លាំងទ័ព ដើម្បីជួយសង្គ្រោះប្រជាពលរដ្ឋ។ ក្រៅពីបញ្ហាគ្មានស្បៀងអាហារបរិភោគ អាជ្ញាធរកំពុងតែព្រួយបារម្ភអំពីបញ្ហាអនាម័យសុខភាព ដែលអាចបណ្តាលមកជំងឺឆ្លងនានា ដូចជាជំងឺអាសន្នរោគជាដើម។
គួរបញ្ជាក់ថា យោងតាមអង្គការ Germanwatch ប៉ាគីស្ថានជាប្រទេសស្ថិតនៅលេខរៀងទី៨ ក្នុងចំណោមប្រទេស ដែលងាយរងគ្រោះបំផុត ដោយហន្តរាយឧតុនិយមធ្ងន់ធ្ងរ ដោយសារតែកត្តាបម្រែបម្រួលអាកាសធាតុ។ ក្រៅពីហេតុផលអាកាសធាតុសកល នៅមានហេតុផលមួយចំនួនទៀតដែលធ្វើឲ្យប្រទេសនេះ ជាប្រទេសងាយរងគ្រោះបំផុត តួយ៉ាងដូចជា អំពើពុករលួយ គ្មានអភិបាលកិច្ច ភាពអសកម្មរបស់មន្ត្រីរដ្ឋាភិបាល ព្រមទាំងកង្វះផែនការជាក់ច្បាស់ ក្នុងការរៀបចំសំណង់ផ្ទះសំបែង និងហេដ្ឋារចនាសម្ព័ន្ធជាតិឲ្យបានរឹងមាំ ដើម្បីទប់ទល់នឹងគ្រោះធម្មជាតិ។ គ្រោះទឹកជំនន់នាពេលនេះ គឺវាជួនចំពេលដែលប៉ាគីស្ថាន កំពុងតែឆ្លងកាត់ស្ថានភាពលំបាកខ្លាំងណាស់ទៅហើយ ដោយសារតែអតិផរណា សេដ្ឋកិច្ចដួលរំលំ រួមជាមួយនឹងវិបត្តិនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ