ប្រមុខការទូតអាមេរិក ប្រាប់ទៅសមភាគីប៉ាគីស្ថានថា គួរទៅសុំចិនឲ្យបន្ធូរបន្ថយការប្រាក់
បន្ទាប់ពីបានចូលរួមមហាសន្និបាតអង្គការសហប្រជាជាតិ នៅទីក្រុងញូយ៉ក លោករដ្ឋមន្ត្រីការបរទេសប៉ាគីស្ថាន បានជួបគ្នាជាមួយលោកអង់តូនី ប្លីងកិន ប្រមុខការទូតអាមេរិក កាលពីថ្ងៃចន្ទម្សិលមិញ នៅក្រុងវ៉ាស៊ីនតោន។ នៅក្នុងជំនួបនោះ ភាគីប៉ាគីស្ថានបានស្នើសុំឲ្យសហរដ្ឋអាមេរិកជួយជំនួយហិរញ្ញវត្ថុ ដើម្បីឲ្យខ្លួនដោះស្រាយបញ្ហាទឹកជំនន់។ លោកអង់តូនី ប្លីងកិន បានប្រាប់ទៅវិញថា អាមេរិកនឹងជួយ តែអ្វីដែលចាំបាច់ គឺប៉ាគីស្ថានគួរទៅសុំចិន ឲ្យបន្ធូរបន្ថយការប្រាក់បំណុល ទើបជាដំណោះស្រាយល្អ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ក្នុងពេលជួបជាមួយលោកអង់តូនី ប្លីងកិន លោក Bilawal Bhutto Zardari រដ្ឋមន្ត្រីការបរទេសប៉ាគីស្ថាន បានលើកឡើងថា ប៉ាគីស្ថានជាប្រទេសរងគ្រោះ ដោយវិបត្តិអាកាសធាតុ ដែលបង្កឡើងដោយប្រទេសឧស្សាហកម្មជឿនលឿន។ មានប្រជាជនច្រើនជាងគេលំដាប់ទី៥នៃពិភពលោកមែន តែប៉ាគីស្ថានបញ្ចេញឧស្ម័នផ្ទះកញ្ចក់ ត្រឹមតែ០,៨%ប៉ុណ្ណោះ។ រដ្ឋមន្ត្រីការបរទេសប៉ាគីស្ថានបានអំពាវនាវទៅកាន់លោកចូ បៃដិនថា ត្រូវតែប៉ះប៉ូវផ្តល់យុត្តិធម៌ផ្នែកអាកាសធាតុឲ្យបានច្រើន ដល់ប្រទេសរងគ្រោះ។
លោកអង់តូនី ប្លីងកិន ប្រមុខការទូតអាមេរិក បានថ្លែងប្រាប់ទៅលោករដ្ឋមន្ត្រីការបរទេសប៉ាគីស្ថានវិញថា អាមេរិកនឹងមានវត្តមានជួយប៉ាគីស្ថាន ដូចកាលពីលើកមុនៗ ដែលប៉ាគីស្ថានបានរងគ្រោះដោយគ្រោះធម្មជាតិ។ អាមេរិកមានគម្រោងជួយប៉ាគីស្ថាន ក្នុងការកសាងប្រទេសឡើងវិញ បន្ទាប់ពីគ្រោះទឹកជំនន់ធ្ងន់ធ្ងរបំផុតថ្មីៗនេះ។ តែទន្ទឹមគ្នានេះ លោកអង់តូនី ប្លីងកិន បានបញ្ជាក់ថា លោកបានប្រាប់ទៅភាគីប៉ាគីស្ថានថា ប៉ាគីស្ថានគួរតែទៅនិយាយចរចាជាមួយចិន ដើម្បីបន្ធូរបន្ថយការប្រាក់ ដែលប៉ាគីស្ថានជាប់បំណុលចិន។ ប្រការនេះ គឺវាអាចជួយដល់ប៉ាគីស្ថាន ក្នុងការបង្វែរថវិកាមកដោះស្រាយបញ្ហាបន្ទាន់ចំពោះមុខ ដែលបណ្តាលមកពីគ្រោះទឹកជំនន់។
សូមរំលឹកថា សម្ព័ន្ធភាពរវាងប៉ាគីស្ថាន ជាមួយអាមេរិក គឺជាកេរតំណែលតាំងតែពីសម័យសង្គ្រាមត្រជាក់។ អាមេរិក ធ្លាប់បានក្រើនរំឭកប៉ាគីស្ថាន អំពីគ្រោះថ្នាក់បំណុលចិនវ័នក។ យោងតាមរបាយការណ៍មូលនិធិរូបិយវត្ថុអន្តរជាតិ ៣០%នៃបំណុលក្រៅស្រុករបស់ប៉ាគីស្ថាន គឺជាប្រាក់កម្ចីរបស់ចិន។ ប៉ាគីស្ថានបានចុះកិច្ចព្រមព្រៀងជាមួយចិន សាងសង់គម្រោង ហេដ្ឋារចនាសម្ព័ន្ធដ៏ច្រើនមហិមា ក្នុងទឹកប្រាក់សរុប ចំនួន៥ម៉ឺន៤ពាន់លានដុល្លារ។ បំណុលដ៏សន្ធឹកនេះ ធ្វើឲ្យគេបារម្ភថា ប៉ាគីស្ថាន អាចនឹងក្លាយជាស្រីលង្ការទី២។
គួរបញ្ជាក់ដែរថា ថ្មីៗនេះ គ្រោះទឹកជំនន់បានជន់លិច ១ភាគ៣នៃផ្ទៃដីប៉ាគីស្ថាន បណ្តាលឲ្យស្លាប់មនុស្សប្រមាណ១៦០០នាក់ និងប្រជាជន៧លាននាក់ ត្រូវភៀសខ្លួន។ ជាមួយនឹងបញ្ហាសេដ្ឋកិច្ចកាន់តែធ្ងន់ធ្ងរ ប៉ាគីស្ថានកំពុងតែដង្ហើយហៅរកជំនួយហិរញ្ញវត្ថុ ពីសហគមន៍អន្តរជាតិ។ សហរដ្ឋអាមេរិក បានសន្យាផ្តល់ជំនួយមនុស្សធម៌ ចំនួន ៥៦លានដុល្លារ ព្រមទាំងបានបញ្ជូនស្បៀងនិងសម្ភារៈចាំបាច់ ចំនួន១៧យន្តហោះ ទៅជួយប្រជាជនប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ