លោកស្រីកាម៉ាឡា ហារីសទៅកូរ៉េខាងត្បូង ខណៈមានការបារម្ភថាកូរ៉េខាងជើងគ្រោងសាកគ្រាប់បែកបរមាណូ
បន្ទាប់ពីបានទៅចូលរួមពិធីបុណ្យសពរបស់លោកស៊ីនហ្សូ អាបេ នៅទីក្រុងតូក្យូ លោកស្រីកាម៉ាឡា ហារីស អនុប្រធានាធិបតីអាមេរិក បានទៅដល់កូរ៉េខាងត្បូង នៅថ្ងៃព្រហស្បតិ៍នេះ។ ក្រៅពីជួបប្រជុំជាមួយលោកប្រធានាធិបតីកូរ៉េខាងត្បូង លោកស្រីបានធ្វើដំណើរទៅកាន់តំបន់ព្រំដែន ពុំចែកកូរ៉េទាំង២ផងដែរ។ ទស្សនកិច្ចរបស់លោកស្រីអនុរដ្ឋមន្ត្រីអាមេរិកនាពេលនេះ គឺត្រូវបានធ្វើឡើង ២ថ្ងៃបន្ទាប់ពីកូរ៉េខាងជើងបានសាកល្បងមីស៊ីលបាលីស្ទីក ហើយយោងតាមការសង្ស័យកូរ៉េខាងជើង គ្រោងនឹងបាញ់សាកល្បងគ្រាប់បែបបរមាណូថ្មី ក្នុងពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ដំណើរទៅដល់របស់លោកស្រី កាម៉ាឡា ហារីស នៅតំបន់ស ព្រំដែនពុះចែករវាងបងប្អូនកូរ៉េទាំង២ នៅថ្ងៃព្រហស្បតិ៍ទី២៩កញ្ញានេះ អាចនឹងក្លាយជាកម្មវត្ថុនៃសំដីវាយប្រហារ របស់របបផ្តាច់ការព្យុងយ៉ាង។ កាលពីពេលលោកស្រី ណាន់ស៊ី ប៉េឡូស៊ី ទៅទស្សនកិច្ចនៅទីនោះ កាលពីដើមខែសីហា កូរ៉េខាងជើងបានហៅលោកស្រីថា គឺជា “មេបំផ្លាញសន្តិភាពអន្តរជាតិ ខ្លាំងដៃជាងគេ”។
មុននឹងចេញពីជប៉ុន លោកស្រីកាម៉ាឡា ហារីស បានថ្លែងសុន្ទរកថា ពីលើនាវាចម្បាំងអាមេរិក ដោយបានចោទរបបផ្តាច់ការកូរ៉េខាងជើង ថាជាអ្នកគំរាមស្ថិរភាពតំបន់ តាមរយៈការបាញ់សាកល្បងមីស៊ីល ព្រមទាំងកម្មវិធីផលិតសព្វាវុធដែលខុសច្បាប់។
សូមបញ្ជាក់ថា ទៅដល់ក្រុងសេអ៊ូលនៅព្រឹកថ្ងៃព្រហស្បតិ៍ លោកស្រីកាម៉ាឡា ហារីស បានទៅជួបប្រជុំជាមួយលោក យូន ស៊ុកយោល ប្រធានាធិបតីថ្មីកូរ៉េខាងត្បូង ដែលទើបបានចូលកាន់តំណែង កាលពីខែឧសភា។ មេដឹកនាំទាំង២ បាននិយាយអំពីទំនាក់ទំនងសេដ្ឋកិច្ច ពាណិជ្ជកម្ម បច្ចេកវិទ្យាទំនើប ដោយភាគីកូរ៉េខាងត្បូង បានថ្លែងការបារម្ភ ទាក់ទិននឹងច្បាប់ថ្មីរបស់អាមេរិក ដែលបានលុបចោលនូវជំនួយថវិកា សម្រាប់ការទិញរថយន្តអគ្គិសនី ដែលមិនមែនផលិតនៅសហរដ្ឋអាមេរិក។ ច្បាប់ថ្មីនេះ អាចនឹងប៉ះពាល់ដល់ទីផ្សារលក់រថយន្តរ បស់ក្រុមហ៊ុនរថយន្តកូរ៉េខាងត្បូង។
សំណុំរឿងសន្តិសុខ ទាក់ទិននឹងការគំរាមរបស់កូរ៉េខាងជើង គឺជាសំណុំរឿងធំផងដែរ នៅក្នុងការជជែកគ្នា។ យោងបណ្តាញចារកិច្ចកូរ៉េខាងត្បូង អះអាងថា គឺកូរ៉េខាងជើង មានគម្រោងបាញ់សាកល្បងគ្រាប់បែកបរមាណូថ្មីមួយ នៅរវាងខែតុលាខាងមុខនេះ ព្រោះថ្ងៃទី១៦តុលា គឺជាថ្ងៃបើកមហាសន្និបាតបក្សកុម្មុយនីស្តចិន ហើយថ្ងៃ៧វិច្ឆិកា គឺជាថ្ងៃបោះឆ្នោតពាក់កណ្តាលអាណត្តិនៅសហរដ្ឋអាមេរិក។ ជានិច្ចជាកាល កូរ៉េខាងជើងតែងតែឆក់ឱកាសល្អៗ ដើម្បីធ្វើឲ្យការបាញ់សាកល្បងសព្វាវុធរបស់ខ្លួន មានគេចាប់អារម្ភច្រើន។
គួរបញ្ជាក់ដែរថា ក្នុងសប្តាហ៍នេះ កងទ័ពកូរ៉េខាងត្បូងនិងអាមេរិក កំពុងធ្វើសមយុទ្ធយោធារួមគ្នា។ ព្រឹកថ្ងៃព្រហស្បតិ៍នេះដែរ កងទ័ពកូរ៉េខាងត្បូង បានប្រកាសពីការរៀបចំធ្វើសមយុទ្ធរួមគ្នា ត្រីភាគី អាមេរិក-ជប៉ុន-កូរ៉េខាងត្បូង ដោយប្រើនាវាមុជទឹកបាតសមុទ្រ។ សមយុទ្ធនេះ ធ្វើឡើងបន្ទាប់ពីអ្នកជំនាញកងទ័ពបានសង្កេតឃើញថា កូរ៉េខាងខាងជើង កំពុងតែត្រៀមបាញ់សាកល្បងមីស៊ីលបាលីស្ទីក ចេញពីនាវាមុជទឹកបាតសមុទ្ររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ