កូរ៉េខាងត្បូងនិងអាមេរិក បាញ់មីស៊ីលបាលីស្ទិកច្រើនគ្រាប់ ក្រោយកូរ៉េខាងជើងបាញ់មីស៊ីលហោះរំលងជប៉ុន
មួយថ្ងៃក្រោយកូរ៉េខាងជើង បានបាញ់មីស៊ីលបាលីស្ទីក ហោះរំលងពីលើជប៉ុន នៅថ្ងៃពុធនេះ កងទ័ពកូរ៉េខាងត្បូង និងអាមេរិក បានប្រកាសថាគេបានបាញ់មីស៊ីលចំនួន៤គ្រាប់ ឆ្ពោះទៅកាន់សមុទ្រជប៉ុន។ ជាការបាញ់ ដើម្បីបង្ហាញកម្លាំង ប្រាប់ទៅកូរ៉េខាងជើង ថាអាមេរិក និងកូរ៉េខាងត្បូង មានសមត្ថភាពគ្រប់គ្រាន់ ដើម្បីកម្ទេចចំគោលដៅណាមួយ យ៉ាងច្បាស់ប្រាកដបំផុត។
ចុះផ្សាយនៅថ្ងៃ៖
ស្តាប់ - ០២:២៤
អគ្គសេនាធិការកងទ័ពកូរ៉េខាងត្បូង បានចេញលិខិតប្រកាសថា នៅព្រឹកថ្ងៃពុធទី៥តុលា កងទ័ពកូរ៉េខាងត្បូង និងកងទ័ពអាមេរិក បានបាញ់មីស៊ីលម្នាក់ចំនួន២គ្រាប់។ ជាប្រភេទមីស៊ីលបាលីស្ទិក ចម្ងាយមធ្យម ATACMS សំដៅកម្ទេចគោលដៅ ដែលគេសន្មត់ដើម្បីសាកល្បង នៅក្នុងសមុទ្រជប៉ុន។ លិខិតរបស់កងទ័ពកូរ៉េខាងត្បូងនេះ សរសេរបញ្ជាក់ថា ការបាញ់ហាត់សមនេះ គឺជាការបង្ហាញប្រាប់ថា យើងមានសមត្ថភាពគ្រប់គ្រាន់ និងបានត្រៀមខ្លួនរួចរាល់ ដើម្បីកម្ទេចគោលដៅណាមួយ ដែលជាប្រភពបង្កបញ្ហា។
ជាមួយគ្នានេះ កងទ័ពកូរ៉េខាងត្បូង បានទទួលស្គាល់ថា ការបាញ់សាកល្បង មីស៊ីលបាលីស្ទីកចំងាយខ្លីរបស់ខ្លួន មួយទៀត ឈ្មោះ Hyunmoo-2 មិនបានជោគជ័យទេ កាលពីថ្ងៃពុធ ដោយមីស៊ីលបានធ្លាក់វិញភ្លាមក្រោយបាញ់ចេញបានបន្តិច។ ជាសំណាងល្អ មីស៊ីលមិនបានផ្ទុះ តែបានបង្កឲ្យមានអគ្គិភ័យនៅទីលានបាញ់បង្ហោះ និងបានធ្វើឲ្យប្រជាជនរស់នៅទីក្រុង Gangneung ភ័យជ្រួលច្របល់ផងដែរ។
គួរបញ្ជាក់ដែរថា កាលពីថ្ងៃអង្គារ យន្តហោះចម្បាំងរបស់កងទ័ពអាមេរិក និងកូរ៉េខាងត្បូង បានរួមគ្នាហាត់សម បើកការវាយប្រហារ លើគោលដៅកំណត់សាកល្បង ក្នុងសមុទ្រលឿង។ ឆ្លើយទៅអ្នកកាសែតទូរទស្សន៍ CNN លោក John Kirby អ្នកនាំពាក្យក្រុមប្រឹក្សាសន្តិសុខអាមេរិក បានលើកឡើងថា ការហាត់សមសាកល្បងទាំងនេះ គឺជាការឆ្លើយតប ចំពោះការគំរាមកំញើញពីសំណាក់របបផ្តាច់ការព្យុងយ៉ាង និងដើម្បីប្រាប់ទៅរបបនេះថា យើងមានសមត្ថភាពកម្លាំងគ្រប់គ្រាន់អាចវាយបកវិញ។ តែលោកបានបញ្ជាក់ តែយ៉ាងណាភាគីអាមេរិក មិនចង់ឲ្យមានរឿងនោះកើតឡើងទេ ហើយអាមេរិកបានប្រាប់ទៅកូរ៉េខាងជើងយ៉ាងច្បាស់ ច្រើនដងហើយ ថាអាមេរិកត្រៀមចូលតុចរចា ដោយគ្មានលក្ខខណ្ឌអ្វីទាំងអស់។
គួររំលឹកថា របបផ្តាច់ការកូរ៉េខាងជើង បានអនុម័តទ្រឹស្តីគោលនយោបាយថ្មី ដោយចាត់ទុកកម្មវិធីអាវុធនុយក្លេអ៊ែររបស់ខ្លួន មិនអាចត្រូវបានដកថយវិញបានជាដាច់ខាត។ ប្រមាណ១០ថ្ងៃចុងក្រោយនេះ កូរ៉េខាងជើងបានបាញ់សាកល្បងមីស៊ីលចំនួន៥ដង ដោយកាលពីថ្ងៃអង្គារទី៤តុលា កូរ៉េខាងជើងបានបាញ់មីស៊ីលបាលីស្ទីកចំងាយឆ្ងាយ ហោះរំលងពីលើជប៉ុន។ យោងតាមអ្នកជំនាញ មីស៊ីលដែលកូរ៉េខាងជើងបានបាញ់កាលពីថ្ងៃអង្គារ រត់បានចំងាយ ៤៦០០គីឡូម៉ែត្រ អាចជាប្រភេទ Hwasong-12 IRBM អាចមានសមត្ថភាពនាំក្បាលគ្រាប់នុយក្លេអ៊ែរ ហើយអាចហោះទៅដល់មូលដ្ឋានទ័ពអាមេរិក នៅលើកោះGuam៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ