កូរ៉េខាងជើងអះអាងថាបានធ្វើសមយុទ្ធនុយក្លេអ៊ែរតាក់ទិក
កូរ៉េខាងជើងអះអាង នៅថ្ងៃចន្ទនេះថា ការសាកល្បងមីស៊ីលកាលពីពេលថ្មីៗចុងក្រោយនេះ គឺមានការហាត់សមវាយប្រហារដោយប្រើអាវុធនុយក្លេអ៊ែរតាក់ទិក ហើយថា ការសាកល្បងនេះ ដែលត្រូវបានធ្វើឡើងដោយមានការមើលខុសត្រូវដោយផ្ទាល់ពីសំណាក់លោកគីម ជុងអ៊ុន គឺជាការឆ្លើយតបទៅនឹងសមយុទ្ធរួមគ្នា រវាងអាមេរិក និងកូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមការផ្សាយរបស់បណ្តាញព័ត៌មានរដ្ឋកូរ៉េខាងជើង អង្គភាពទ័ពពិសេស ដែលទទួលបន្ទុកខាងប្រតិបត្តិការនុយក្លេអ៊ែរតាក់ទិក បានចូលរួមធ្វើសមយុទ្ធ ក្នុងចន្លោះពីថ្ងៃទី២៥កញ្ញា ដល់ថ្ងៃទី៩តុលា ដើម្បីវាយតម្លៃមើលអំពីសមត្ថភាពក្នុងការវាយបកលើសត្រូវ ដោយប្រើអាវុធនុយក្លេអ៊ែរតាក់ទិក។ កូរ៉េខាងជើងក៏បានឲ្យដឹងផងដែរថា មីស៊ីលដែលបាញ់សាកល្បង រំលងពីលើទឹកដីជប៉ុន កាលពីថ្ងៃទី៤តុលាកន្លងទៅនេះ គឺជាមីស៊ីលធុនទំនើបថ្មីចុងក្រោយ ដែលទើបនឹងផលិតបាន ហើយថា វាគឺប្រភេទមីស៊ីលបាលីស្ទិករយៈចម្ងាយមធ្យម។
គួររំឭកឡើងវិញថា នៅក្នុងអំឡុងសមាជបក្ស កាលពីខែមករា ឆ្នាំ២០២១កន្លងទៅ លោកគីម ជុងអ៊ុន បានយកការអភិវឌ្ឍសមត្ថភាពខាងនុយក្លេអ៊ែរតាក់ទិកជាគោលដៅអាទិភាពចម្បងមួយ ហើយក្រោយមកទៀត ប្រមុខដឹកនាំកូរ៉េខាងជើងក៏បានលើកឡើងផងដែរថា កម្មវិធីអភិវឌ្ឍសព្វាវុធនុយក្លេអ៊ែររបស់កូរ៉េខាងជើងនឹងបន្តទៅមុខ ដោយគ្មានថ្ងៃត្រឡប់ក្រោយវិញនោះទេ ដែលនេះ គឺមានន័យស្មើនឹងការបិទបញ្ចប់ទាំងស្រុងនូវលទ្ធភាពក្នុងការចរចា ដែលធ្លាប់ធ្វើកាលពីពេលកន្លងទៅ ក្នុងគោលដៅលុបបំបាត់អាវុធនុយក្លេអ៊ែរនៅឧបទ្វីបកូរ៉េ។
បន្ថែមពីលើនេះទៅទៀត កាលពីខែកញ្ញាកន្លងទៅថ្មីៗនេះ កូរ៉េខាងជើងថែមទាំងបានកែប្រែច្បាប់របស់ខ្លួនផងដែរ ដោយបានដាក់ចេញនូវយុទ្ធសាស្រ្តនុយក្លេអ៊ែរថ្មី គឺអនុញ្ញាតឲ្យប្រើអាវុធនុយក្លេអ៊ែរ ដើម្បីវាយប្រហារមុនទៅលើគូសត្រូវ។
ចាប់តាំងពីពេលនោះមក ភាពតានតឹងនៅឧបទ្វីបកូរ៉េបានកើនឡើងជាប់ជាលំដាប់ពីមួយថ្ងៃទៅមួយថ្ងៃ ដោយកូរ៉េខាងត្បូង និងអាមេរិក ក៏បានធ្វើសមយុទ្ធ និងចាត់វិធានការយោធាផ្សេងទៀត ដោយលើកឡើងថា ជាការឆ្លើយតបនឹងទង្វើរបស់កូរ៉េខាងជើង។ ចំណែកកូរ៉េខាងជើងវិញ ក៏បានបង្កើនការសាកល្បងមីស៊ីល ដោយអះអាងថា ជាការឆ្លើយតបទៅនឹងទង្វើរបស់អាមេរិក និងកូរ៉េខាងត្បូង។
អ្វីដែលគេកំពុងតែបារម្ភ គឺកូរ៉េខាងជើងអាចឈានទៅធ្វើតេស្តអាវុធនុយក្លេអ៊ែរឡើងវិញ ដែលអាចនឹងរុញវិបត្តិឲ្យកាន់តែធ្លាក់ចុះដុនដាប់កាន់តែខ្លាំង ហើយនៅក្នុងពេលដែលហានិភ័យនៃការប្រឈមមុខដាក់គ្នាដោយអាវុធនុយក្លេអ៊ែរ កំពុងតែមានខ្ពស់ស្រាប់ នៅក្នុងសង្គ្រាមអ៊ុយក្រែន ពិភពលោកអាចនឹងត្រូវប្រឈមនឹងហានិភ័យនៃការប្រឈមមុខដាក់គ្នាដោយអាវុធនុយក្លេអ៊ែរមួយទៀត ចេញពីឧបទ្វីបកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ