សកម្មជនអ៊ីរ៉ង់អំពាវនាវឲ្យមានបាតុកម្មទ្រង់ទ្រាយធំជាថ្មីម្តងទៀតបន្ទាប់ពីអាមេរិកបញ្ចេញសំឡេងគាំទ្រ
ប្រធានាធិបតីសហរដ្ឋអាមេរិក លោក Joe Biden បានសម្តែងការគាំទ្រចំពោះក្រុមបាតុករថាជា "ស្ត្រីដ៏ក្លាហានរបស់អ៊ីរ៉ង់" ខណៈដែល ការតវ៉ាខឹងសម្បារចំពោះទង្វើរបស់ប៉ូលីសសីលធម៌ បានឈានចូលដល់សប្តាហ៍ទីប្រាំ។ សកម្មជនអ៊ីរ៉ង់បានអំពាវនាវឱ្យមាន បាតុកម្មទ្រង់ទ្រាយធំទូទាំងប្រទេសជាថ្មីម្តងទៀត អំពីការស្លាប់របស់ស្រ្តីវ័យក្មេង Mahsa Amini បន្ទាប់ពីបានចាប់ខ្លួនពី បទការស្លៀកពាក់មិនសមរម្យ ទៅតាមច្បាប់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:១៨
បាតុករតាមដងផ្លូវ ពោរពេញទៅដោយស្ត្រីវ័យក្មេង ក្លាហានឈរតវ៉ានៅជួរមុខ ស្រែកអំពាវនាវដោយប្រើពាក្យស្លោកប្រឆាំងនិងរដ្ឋាភិបាល។ ស្រ្តីបាតុករមួយចំនួនបានដោះគ្រវែងក្រណាត់ទទូរក្បាលរបស់ពួកគេ ហើយប្រឈមមុខជាមួយកងកម្លាំងសន្តិសុខនៅតាមដងផ្លូវដោយមិនរ៉ារែក។ ការខឹងសម្បារនេះបានកើតមាន បន្ទាប់ពីអាជ្ញាធរប្រកាសថា ស្រ្តីវ័យ ២២ឆ្នាំ ម្នាក់បានស្លាប់កាលពីថ្ងៃទី ១៦ ខែកញ្ញា នៅក្នុងអំឡុងពេលឃាត់ខ្លួនរបស់ប៉ូលិសសីលធម៌។
រលកនៃការតវ៉ា ដែលមិនធ្លាប់មានពីមុនមកបានផ្ទុះឡើងនៅតាមដងផ្លូវ បង្កឲ្យមានអំពើហិង្សា និងភាពចលាចលក្នុងប្រទេសអ៊ីរ៉ង់។ ការស្លាប់របស់ Mahsa Amini បានបង្កឱ្យមានការជជែកវែកញែក អំពីសំលៀកបំពាក់ដែល គិតថាសមរម្យចំពោះស្រ្តី ហើយធ្វើឲ្យមានការបើកវេទិកាតាមប្រពន្ធអ៊ីនធឺណិតដោយសកម្មជន ក្នុងការប្រមូល ទាក់ទាញអ្នកគាំទ្រ ប្រឆាំងនិងទង្វើរបស់រដ្ឋាភិបាលនេះ។
ក្រុមបាតុករនេះក៏បានទាក់ទាញការគាំទ្រពីប្រធានាធិបតីសហរដ្ឋអាមេរិកផងដែរ។ លោក Biden បាននិយាយកាលពីថ្ងៃសុក្រនេះថា អាមេរិកនិងឈរជាមួយពលរដ្ឋ និង ស្ត្រីដ៏ក្លាហានរបស់អ៊ីរ៉ង់។ លោក បានសង្កត់ធ្ងន់ថា ស្ត្រីមានសិទ្ធិក្នុងការសៀកពាក់តាមចិត្តរបស់ពួកគេ ហើយប្រមានថា អ៊ីរ៉ង់ត្រូវតែបញ្ឆប់អំពើហិង្សាលើពលរដ្ឋរបស់ខ្លួន ខណៈដែលពួកគេកំពុងអនុវត្តសិទ្ធិជាមូលដ្ឋានរបស់ពួកគេតែប៉ុនោះ។
អង្គការសិទ្ធិមនុស្សអ៊ីរ៉ង់ ដែលមានមូលដ្ឋាននៅទីក្រុងអូស្លូ បាននិយាយថា មនុស្សយ៉ាងហោចណាស់ ១០៨នាក់ ត្រូវបានស្លាប់នៅក្នុងការបង្ក្រាប ដ៏ឃោរឃៅ ឥតឈប់ឈរ។ ក្នុងនោះមានអនីតិជន ២៣ នាក់បានស្លាប់ដោយវាយប្រហារបង្ក្រាបមិនរើសមុខនេះ ។ ការបង្រ្កាបដោយបង្ហូរឈាមនេះបានទាក់ទាញការថ្កោលទោស ពីចក្រភពអង់គ្លេស កាណាដា និងសហរដ្ឋអាមេរិក។
យ៉ាងណាមិញមេដឹកនាំកំពូលរបស់អ៊ីរ៉ង់ បានចោទប្រកាន់ ដាក់កំហុសលើប្រទេសលោកខាងលិច ថាបានញុះញង់ឱ្យមានការតវ៉ានេះទៅវិញ។ អ៊ីរ៉ង់ ក៏បានថ្កោលទោសប្រធានាធិបតីបារាំងផងដែរ ដោយចោទប្រកាន់ថា សុន្ទរកថារបស់លោក Macron បង្ហាញពីភាពសាមគ្គី លើកទឹកចិត្តដល់អ្នកបំពានច្បាប់។
ឆ្លើយតបទៅនឹងការអំពាវនាវឱ្យមានបាតុកម្មជាថ្មីនេះ ក្រុមប្រឹក្សាសម្របសម្រួលអភិវឌ្ឍន៍អ៊ីស្លាម បានជំរុញឱ្យប្រជាជនចូលរួមគាំទ្ររដ្ឋាភិបាលវិញ។ អាជ្ញាធរអ៊ីរ៉ង់បានរៀបចំការប្រមូលផ្តុំដោយ មានការចូលរួម ពីស្ត្រីស្លៀកឈុតពណ៌ខ្មៅ គ្របពីក្បាល ដល់ចុងជើង ដើម្បីទាញយកការគាំទ្រនេះ។
កងកម្លាំងសន្តិសុខក៏បានធ្វើយុទ្ធនាការចាប់ខ្លួនមនុស្សយ៉ាងច្រើន រួមមានសកម្មជនវ័យក្មេង អ្នកកាសែត និង សិស្សានុសិស្ស ។ សិស្សសាលាខ្លះត្រូវបានចាប់ខ្លួននៅក្នុងថ្នាក់រៀន បញ្ជូនទៅមជ្ឈមណ្ឌលផ្លូវចិត្ត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ