របបសឹកភូមាព្រមានពីផលវិបាកអវិជ្ជមានប្រសិនបើអាស៊ាននៅតែបន្តដាក់សម្ពាធ
«ការដាក់សម្ពាធបន្ថែមទៀត គឺនាំឲ្យមានផលវិបាកអវិជ្ជមាន ច្រើនជាងវិជ្ជមាន» នេះគឺជាសេចក្តីបញ្ជាក់របស់ ក្រសួងការបរទេសភូមា ក្នុងសេចក្តីថ្លែងការណ៍មួយ ផ្សាយនៅល្ងាចថ្ងៃព្រហស្បតិ៍ ទី២៧ ខែតុលា។ ការបញ្ជាក់របស់រដ្ឋបាលក្រុងណៃពិដោរនេះ គឺដំណាលគ្នាដែលរដ្ឋមន្ត្រីការបរទេសអាស៊ានជួបប្រជុំគ្នាជាបន្ទាន់នៅទីក្រុងហ្សាការតា និងដែលមិនបានអញ្ជើញភូមា។
ចុះផ្សាយនៅថ្ងៃ៖
ស្តាប់ - ០២:១០
ក្នុងកិច្ចប្រជុំបន្ទាន់ នៅទីក្រុងហ្សាការតា ប្រេសិតពិសេសអាស៊ាន លោករដ្ឋមន្ត្រីខ្មែរ ប្រាក់ សុខុន បានប្រកាសថ្លែងក្នុងន័យថា «ប្រមុខការទូតអាស៊ាន សុទ្ធតែមានឆន្ទៈជួយភូមាដើម្បីរកដំណោះស្រាយដោយសន្តិវិធី។»។ ក៏ប៉ុន្តែ ភូមា បានចោទប្រកាន់ថា អាស៊ាន«រើសអើងខ្លួន» ដោយមិនបានអញ្ជើញភូមាឲ្យចូលរួមប្រជុំនៅក្រុងហ្សាការតា ពីថ្ងៃព្រហស្បតិ៍។
កិច្ចប្រជុំនៅឥណ្ឌូនេស៊ីនេះ គឺធ្វើឡើងតែពីរថ្ងៃបន្ទាប់ពី អ្នករាយការណ៍ពិសេសស្តីពីសិទ្ធិមនុស្សនៅភូមា លោក Thomas H. Andrews ធ្វើសន្និសីទកាសែតនៅស្នាក់ការអង្គការសហប្រជាជាតិ ក្រុងញ៉ូវយ៉ក ដោយសម្តែងក្តីសោកស្តាយថា សហគមអន្តរជាតិ ហាក់បានទុកប្រជាជនភូមាចោល ឲ្យរស់នៅក្នុងភាពភ័យខ្លាចនិងអំពើឃោរឃៅរបស់របបសឹក។ ដើម្បីចូលរួមជួយដោះស្រាយ អ្នករាយការណ៍ពិសេសស្តីពីសិទ្ធិមនុស្សប្រចាំភូមា អំពាវនាវឲ្យសហគមអន្តរជាតិ ដាក់ទណ្ឌកម្មឲ្យធ្ងន់លើរបបសឹក ជាសម្ពាធធ្វើឲ្យ ភូមា កែប្រែចរិត។
ចំពោះ ភូមា គម្រោងការដើរចេញពីវិបត្តិនយោបាយ គឺ«ត្រូវការពេលវេលា»។ ទោះជាថ្លែងយ៉ាងនេះក្តី តែ របបសឹកក្រុងណៃពិដោរ ពុំបានលើកឡើងសោះឡើយថា ដំណើរចេញពីវិបត្តិនយោបាយនេះ គឺត្រូវមានការចរចាសម្រុះសម្រួលនិងពិភាក្សាគ្នាជាមួយក្រុមបក្សប្រឆាំងនោះទេ។
សំណុំរឿងភូមា ជាវិញ្ញាសាដ៏លំបាកមួយក្នុងកិច្ចប្រជុំកំពូលអាស៊ាន ដែលនឹងប្រព្រឹត្តធ្វើឡើងនៅរាជធានីភ្នំពេញ ថ្ងៃទី១០ដល់១៣ វិច្ឆិកា ខាងមុខនេះ។ ក្នុងនាមជាប្រធានផ្លាស់វេនអាស៊ាន កម្ពុជា បានស្នើឲ្យ ភូមា បញ្ជូនអ្នកតំណាងដែលមិនមែនជាអ្នកដឹកនាំនយោបាយ មកប្រជុំកំពូល តែ របបសឹក បានបញ្ជាក់បដិសេធ។ ក្នុងសប្តាហ៍នេះ កាសែតប្រឆាំងភូមា បានសរសេរផ្សាយថា កម្ពុជាបរាជ័យក្នុងការដោះស្រាយបញ្ហានៅភូមា។
តាមរបាយការណ៍របស់អង្គការការពារសិទ្ធិមនុស្សនៅក្នុងស្រុកភូមា គឺ តាំងពីរបបសឹកឡើងក្តោបអំណាចដោយរដ្ឋប្រហារមក គឺ កម្លាំងយោធាភូមា បានសម្លាប់ជនស៊ីវិល ប្រមាណជាង ២ ៣០០ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ