លោក ចូ បៃដិន៖ អាស៊ានជាបេះដូងនៃយុទ្ធសាស្ត្រឥណ្ឌូប៉ាស៊ីហ្វិករបស់រដ្ឋបាលវ៉ាស៊ីនតោន
នៅថ្ងៃសៅរ៍ ប្រធានាធិបតីសហរដ្ឋអាមេរិក បានជួបប្រជុំជាមួយប្រមុខរដ្ឋាភិបាលនិងថ្នាក់ដឹកនាំអាស៊ាន។ ពីរាជធានីភ្នំពេញ ប្រមុខរដ្ឋអាមេរិក បានគូសបញ្ជាក់ថា អាស៊ានជាស្នូលបេះដូងនៃយុទ្ធសាស្ត្រឥណ្ឌូប៉ាស៊ីហ្វិករបស់រដ្ឋបាលលោក ចូ បៃដិន។ ដូច្នេះហើយ ប្រធានាធិបតីសហរដ្ឋអាមេរិក រំពឹងសង្ឃឹមថានឹងបានចុះហត្ថលេខាលើកតិកាសញ្ញាភាពជាដៃគូ អាមេរិក- អាស៊ាន ទៅលើសំណុំរឿងបញ្ហាធំៗមួយចំនួនដែលពិភពលោកកំពុងប្រឈម និងសំណុំរឿងអាកាសធាតុ ព្រមទាំងបញ្ហាសុខាភិបាល ជាដើម។ ជាមួយគ្នានេះ សេតវិមានអាមេរិក បានប្រកាសជំនួយ ៨៦០ លានដុល្លារអាមេរិក ដើម្បីជួយគាំទ្រអាស៊ានក្នុងវិស័យផ្សេងៗជាច្រើន។
ចុះផ្សាយនៅថ្ងៃ៖
ស្តាប់ - ០២:៤៦
លោក ចូ បៃដិន ប្រកាសជាចំហថា អាស៊ានជាស្នូលយុទ្ធសាស្ត្រឥណ្ឌូប៉ាស៊ីហ្វិក សម្រាប់រដ្ឋបាលរបស់លោកនិងអនុប្រធានាធិបតីអ្នកស្រី កាំមីឡា ហារីស។ ប្រធានាធិបតីសហរដ្ឋអាមេរិក មានប្រសាសន៍បញ្ជាក់ទៀតថា «យើងកសាងតំបន់ឥណ្ឌូប៉ាស៊ីហ្វិកមួយ ដែល សេរីនិងបើកចំហ, មានស្ថិរភាពនិងវិបុលភាព, មានភាពធន់រឹងមាំ និងសុវត្ថិភាពសុខសាន្តត្រាណ។» ទន្ទឹមនឹងនេះ សេតវិមានអាមេរិក បានប្រកាសផ្តល់ជំនួយ ៨៦០ លានដុល្លារដើម្បីជួយគាំទ្រអាស៊ានជាច្រើនវិស័យ ដែលផ្តល់តាមរយៈគម្រោងជំនួយ USAID និងតាមក្រសួងជំនាញនីមួយៗរបស់អាមេរិក។
វិមានប្រធានាធិបតីអាមេរិក ក៏បានរៀបរាប់លម្អិតពីកិច្ចការក្នុងគម្រោងជំនួយនីមួយៗ និងរាប់ឈ្មោះប្រទេសដែលត្រូវជួយទៅតាមគម្រោងផ្សេងៗគ្នា។ ជាអាទិ៍ កម្មវិធីហេដ្ឋារចនាសម្ព័ន្ធនិងវិនិយោគ គឺដាក់មូលដ្ឋាន នៅហ្សាការតា ប្រទេសឥណ្ឌូណេស៊ី។ កម្មវិធីប្រែប្រួលអាកាសធាតុ គឺអាមេរិកត្រូវបង្កើតមជ្ឈមណ្ឌល១ដាក់មូលដ្ឋាននៅប្រុយណេ ហើយអាមេរិកនឹងផ្តល់អ្នកជំនាញឲ្យជួយបណ្តុះបណ្តាលបច្ចេកទេស។
នៅឆ្នាំ២០២៣ អាមេរិកត្រូវចូលរួមប្រជុំជាមួយរដ្ឋមន្ត្រីបរិស្ថានអាស៊ាន ហើយទន្ទឹមនឹងនេះ ត្រូវបង្កើតការវិនិយោគនៅអាស៊ានក្នុងផ្នែករថយន្តដើរដោយអគ្គិសនី។ នៅក្នុងខែវិច្ឆិកានេះ រដ្ឋមន្ត្រីការពារអាមេរិក ក៏នឹងមកប្រជុំក្របខណ្ឌរដ្ឋមន្ត្រីការពារជាតិអាស៊ាន នៅកម្ពុជា។ មិនតែប៉ុណ្ណោះ នៅមានគម្រោងផ្សេងទៀតជាច្រើន ដូចជាការផ្តល់ចំណីអាហារ ដល់កូនសិស្សខ្មែរ ជាង១០ម៉ឺននាក់ រយៈពេល៥ឆ្នាំ ទៅមុខ, ផ្តល់ទឹកស្អាតដល់ឥណ្ឌា និងហ្វីលីពីន, គម្រោងពង្រឹងសិទ្ធិអំណាចស្ត្រីនៅអាស៊ាន ហើយនិងកម្មវិធីសហគ្រិន នៅថៃ និងវៀតណាម ជាដើម។ល។
កាលពីឧសភា រដ្ឋបាលទីក្រុងវ៉ាស៊ីនតោន បានអញ្ជើញថ្នាក់ដឹកនាំអាស៊ានទៅជួបសំណេះសំណាល នៅសហរដ្ឋអាមេរិក។ នោះគឺជាការផ្តល់កិត្តិយសនិងការយកចិត្តទុកដល់អាស៊ាន ហើយនៅពេលនេះទៀត ប្រធានាធិបតី ចូ បៃដិន អញ្ជើញវត្តមានផ្ទាល់ នៅក្នុងកិច្ចប្រជុំកំពូលអាស៊ាន គឺជាការបញ្ជាក់យ៉ាងច្បាស់ឡើងថែមទៀត ពីឆន្ទៈចង់ពង្រឹងទំនាក់ទំនងនិងឥទ្ធិពលសហរដ្ឋអាមេរិកនៅក្នុងតំបន់អាស៊ាន ឬឥណ្ឌូប៉ាស៊ីហ្វិកទាំងមូល។ ជាក់ស្តែង ពេលចេញពីស្រុកខ្មែរ លោក បៃដិន អញ្ជើញទៅឥណ្ឌូណេស៊ី មុននឹងបន្តទៅ ថៃ ទៀត។ តំបន់ឥណ្ឌូប៉ាស៊ីហ្វិកនេះ ធ្លាប់ជួបពើបប្រទះនឹងភាពមិនប្រាកដប្រជា ក្នុងរជ្ជកាលរបស់អាណត្តិប្រធានាធិបតីចាស់ លោក ដូណាល់ ត្រាំ។ ការពង្រឹងដែនអានុភាពរបស់សហរដ្ឋអាមេរិកនេះ គឺទោះចង់មិនចង់ ច្បាស់ជាជល់ប្រឈមនឹងឥទ្ធិពលចិន។ មហាយក្សចិន ដែលបានប្រកាសរួចស្រេចទៅហើយ ការពង្រឹងចំណងទាក់ទងភាពជាដៃគូសហការយុទ្ធសាស្ត្រគ្រប់ជ្រុងជ្រោយ អាស៊ាន-ចិន កាលពីឆ្នាំទៅមិញ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ