ឥណ្ឌូប៉ាស៊ីហ្វិក៖ លោកម៉ាក្រុងអំពាវនាវឲ្យបិទបញ្ចប់ “ការប្រឈមមុខដាក់គ្នា” ហើយងាកមកសហការដើម្បីស្ថិរភាព
នៅទីក្រុងបាងកក ក្នុងឱកាសជំនួបកំពូលប្រចាំឆ្នាំ នៃក្រុមប្រទេសសហប្រតិបត្តិការអាស៊ីប៉ាស៊ីហ្វិក ហៅកាត់ថា APEC លោកម៉ាក្រុងប្រធានាធិបតីបារាំង បានថ្លែងអំពាវនាវ ថាត្រូវតែបិទបញ្ចប់នូវស្ថានការ “ប្រឈមមុខដាក់គ្នា” រវាងមហាអំណាចទាំង២ គឺចិន និងសហរដ្ឋអាមេរិក ដែលលោកម៉ាក្រុងបានហៅថា ជាដំរីជល់គ្នា។ ការប្រឈមមុខដាក់គ្នា ដែលបានបង្ខំឲ្យប្រទេសតូចតាចផ្សេងៗទៀតក្នុងតំបន់ ត្រូវជ្រើសរើសយកម្ខាងៗ យ៉ាងទើសទ័លបំផុត។
ចុះផ្សាយនៅថ្ងៃ៖
លោកម៉ាក្រុង បានអំពាវនាវឲ្យប្រទេសអាស៊ីប៉ាស៊ីហ្វិកទាំងអស់ ត្រូវងាកមកចាប់ដៃសហការគ្នា ដើម្បីការរីកចម្រើន និងស្ថិរភាព ជាជាងការបែងចែកបក្សពួកប្រជែងគ្នា។ ក្នុងនាមបារាំង ដែលមានដែនដីនៅក្នុងតំបន់ប៉ាស៊ីហ្វិក ហើយជាមហាអំណាចដែនសមុទ្រដ៏សំខាន់ និងធំជាងគេលំដាប់ទី២នោះ គឺបារាំងនឹងប្រឹងប្រែងដើរតួនាទី ជួយជាកម្លាំងចលករ ពង្រឹងស្ថិរភាព ការរីកចម្រើន និងគំនិតច្នៃប្រឌិតនានា ដល់តំបន់ដ៏ធំមួយនេះ។
សម្រង់ប្រសាសន៍របស់លោកម៉ាក្រុង ថ្លែងក្នុងឱកាសជួបជាមួយសហគមន៍ជនជាតិបារាំង នៅទីក្រុងបាងកក
“សម្រាប់បារាំង ពាក្យថា “តំបន់ឥណ្ឌូប៉ាស៊ីហ្វិក” មិនមែនគ្រាន់តែជាគំនិតមួយនោះទេ តែវាជាការពិតជាក់ស្តែង ជាក់ស្តែងសម្រាប់មនុស្ស តាំងតែពីអតិតកាល បច្ចុប្បន្នកាល និងអនាគតកាល។ នៅឥណ្ឌូប៉ាស៊ីហ្វិក យើងមានតំបន់៧ ក្នុងចំណោមតំបន់ឯនាយសមុទ្រទាំង១៣របស់បារាំង។ វាគឺជាតំបន់ស្ថិតក្រោមអំណាចរដ្ឋបាលរបស់បារាំង ដែលស្ថិតនៅរាយប៉ាយ រាប់ចាប់ពីមហាសមុទ្រឥណ្ឌា រហូតដល់មហាសមុទ្រប៉ាស៊ីហ្វិកខាងត្បូង ហើយដែលជាចំណែក៦០% នៃដែនសមុទ្រសេដ្ឋកិច្ចផ្តាច់មុខរបស់បារាំង។ គឺត្រង់នេះហើយ ដែលនាំឲ្យបារាំង មានទំនាក់ទំនងចូលភ្ជាប់ខ្លួន ជាមួយប្រទេសផ្សេងៗទៀត នៅក្នុងតំបន់ឥណ្ឌូប៉ាស៊ីហ្វិកនេះ។
បារាំងមាននាមជាមហាអំណាចដែនសមុទ្រធំជាង២បំផុត លំដាប់ទី២ ក៏ព្រោះតែបារាំង មានដែនដីនៅក្នុងតំបន់ឥណ្ឌូប៉ាស៊ីហ្វិកនេះហើយ។ ព្រោះថានៅក្នុងតំបន់នេះ មានប្រជាជនយើងរស់នៅជាច្រើនលាននាក់ មានទាំង មូលដ្ឋាន និងវត្តមានកងទ័ពបារាំង ដែលតែងតែរៀបចំធ្វើសមយុទ្ធ ហាត់សមជាមួយប្រទេសក្នុងតំបន់។
ដូច្នេះអ្នកទាំងអស់គ្នាដែលនៅទីនេះ ត្រូវតែចាំជានិច្ចថា យើងកំពុងស្ថិតនៅក្នុងប្រទេសដែលជាមិត្ត ដែលយើងចង់ចាប់ដៃដើរទៅមុខជាមួយ ហើយប្រទេសយើង ជាប្រទេសដែលមានអធិបតេយ្យភាព និងមានសិទ្ធិពេញលេញ នៅតំបន់នេះ៕”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ