គីម ជុងអ៊ុន បង្ហាញមុខកូនស្រីជាលើកទី១ និងប្រកាសថានឹងប្រើអាវុធនុយក្លេអ៊ែរតបវិញ ប្រសិនបើរងការគំរាមនុយក្លេអែរ
មេដឹកនាំកូរ៉េខាងជើង គីម ជុងអ៊ុន បានប្រកាសថា នឹងប្រើអាវុធនុយក្លេអ៊ែរឆ្លើយតបវិញ ដោយមិនញញើតទេ ប្រសិនកូរ៉េខាងជើងរងការគំរាមវាយប្រហារ ដោយអាវុធនុយក្លេអ៊ែរ។ សំដីនេះ ត្រូវបានទីភ្នាក់ងារព័ត៌មានផ្លូវការកូរ៉េខាងជើងផ្សព្វផ្សាយ ក្នុងឱកាសដែលមេដឹកនាំកូរ៉េខាងជើងរូបនេះ បានទៅត្រួតពិនិត្យការបាញ់បង្ហោះមីស៊ីលបាលីស្ទីកអន្តរទ្វីប កាលពីថ្ងៃសុក្រ ដោយមានវត្តមានភរិយានិងកូនស្រីម្នាក់ចូលរួមដែរ។ មីស៊ីលអន្តរទ្វីបដែលអាចបំពាក់ក្បាលគ្រាប់នុយក្លេអ៊ែរ និងអាចហោះទៅដល់ដែនដីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
កូរ៉េខាងជើងបានបាញ់សាកល្បងប្រកបដោយជោគជ័យ នូវមីស៊ីលបាលីស្ទីកអន្តរទ្វីបថ្មីមួយទៀត កាលពីថ្ងៃសុក្រ ទី១៨វិច្ឆិកា។ ទីភ្នាក់ងារព័ត៌មានផ្លូវការកូរ៉េខាងជើង KCNA បានផ្សព្វផ្សាយនៅថ្ងៃនេះថា មីស៊ីលថ្មី ឈ្មោះ Hwasong-17បានហោះឡើងទៅលើ បានរយៈកំពស់ ៦០៤០,៩គីឡូម៉ែត្រ និងបានរត់ទៅក្នុងចំងាយ៩៩៩,២គីឡូម៉ែត្រ មុននឹងធ្លាក់ទៅក្នុងសមុទ្រខាងកើត។
យោងតាមប្រភពដដែលនេះ គឺមេដឹកនាំកូរ៉េខាងជើង គីម ជុងអ៊ុន បានចូលរួមតាមដានការបាញ់បង្ហោះមីស៊ីលដោយផ្ទាល់តែម្តង ជាមួយនឹងវត្តមានចូលរួម របស់ភរិយានិងកូនស្រីម្នាក់ របស់លោកគីម ជុងអ៊ុនផងដែរ។ ក្នុងឱកាសនោះ គីម ជុងអ៊ុន បានប្រកាសថា ក្នុងករណីដែលកូរ៉េខាងជើង ត្រូវគេគំរាមវាយប្រហារដោយអាវុធនុយក្លេអ៊ែរ នោះកូរ៉េខាងជើងនឹងមិនញញើតសូម្បីតែមួយវិនាទី ក្នុងការឆ្លើយតបវិញ ដោយអាវុធនុយក្លេអ៊ែរ ដ៏មហាអស្ចារ្យរបស់ខ្លួន។
សូមបញ្ជាក់ថា មួយថ្ងៃក្រោយកូរ៉េខាងជើងបាញ់សាកដោយជោគជ័យ នូវមីស៊ីលបាលីស្ទីកអន្តរទ្វីប នៅព្រឹកថ្ងៃសៅរ៍នេះ កងទ័ពអាមេរិកបានបញ្ជូនយន្តហោះទំលាក់គ្រាប់បែក ប្រភេទ B-1B ឲ្យហោះនៅលើឧបទ្វីបកូរ៉េ ក្នុងក្របខណ្ឌហាត់សមជាមួយកងទ័ពកូរ៉េខាងត្បូង។ ក្រៅពីនេះ យន្តហោះចម្បាំងអាមេរិកប្រភេទ F-35 ជាច្រើនគ្រឿងក៏បានចូលរួមដែរ។
គួរកត់សំគាល់ថា គិតចាប់ពីដើមខែវិច្ឆិកានេះមក គឺកូរ៉េខាងជើង បានបាញ់សាកល្បងមីស៊ីលយ៉ាងសន្ធឹកសន្ធាប់ ទាំងចម្ងាយមធ្យម និងចម្ងាយឆ្ងាយ។ គ្រាន់តែក្នុងថ្ងៃទី២វិច្ឆិកាមួយថ្ងៃ របបផ្តាច់ការនេះ បានបាញ់មីស៊ីលចំនួន២៣គ្រាប់។ ជាការសំញ៉ែញកម្លាំង ពើងទ្រូងប្រាប់ទៅសហរដ្ឋអាមេរិក ក៏ដូចជាកូរ៉េខាងត្បូង ថាអំណេះតទៅកូរ៉េខាងជើង គឺជាមហាអំណាចសព្វាវុធ ដែលត្រូវតែចរចាជាមួយដោយស្មើភាព។
លោកស្រី Soo Kim អតីតអ្នកវិភាគរបស់CIA បានលើកឡើងថា ការបាញ់មីស៊ីលបាលីស្ទីកអន្តរទ្វីប កាលពីថ្ងៃសុក្រ គឺវាជាសញ្ញាបញ្ជាក់យ៉ាងច្បាស់ អំពីភាពអចិន្ត្រៃយ៍ដើរទៅមុខជាលំដាប់ នៃកម្មវិធីសព្វាវុធរបស់របបផ្តាច់ការព្យុងយ៉ាង។ ជាកម្មវិធីសព្វាវុធ ដែលរបបនេះប្តេជ្ញាពង្រឹង យកជាមធ្យោបាយដើម្បីការពារខ្លួន និងបន្តឲ្យត្រកូលគីម គ្រប់គ្រងកូរ៉េខាងជើងតទៅទៀត។ យ៉ាងណាមិញ ការបង្ហាញរូបកូនស្រីម្នាក់របស់គីម ជុងអ៊ុន ជាលើកទី១ កាលពីថ្ងៃសុក្រម្សិលមិញ វាគឺសារបញ្ជាក់ថា អំណាចនយោបាយវង្សត្រកូលគីម នឹងនៅស្ថិតស្ថេរជាដរាប ដោយមានអាវុធនុយក្លេអ៊ែរជារនាំងការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ