ចិនចេញលក់យន្តហោះដឹកអ្នកដំណើរ Made in China ជាផ្លូវការ លើកដំបូង
នៅថ្ងៃសុក្រទី ៩ធ្នូ ២០២២នេះ ចិនបានប្រកាសប្រគល់យន្តហោះដឹកអ្នកដំណើរ C៩១៩ មួយគ្រឿងដំបូងទៅឱ្យក្រុមហ៊ុនអាកាសចរណ៍ចិន China Eastern។ ការហោះហើរដឹកអ្នកដំណើរនឹងចាប់ផ្តើមជាលើកទីមួយនៅដើមឆ្នាំ២០២៣។ ផលិតដោយស្នាដៃចិន យន្តហោះធុន C៩១៩ នឹងចូលមកប្រជែងជាមួយនឹងយន្តហោះដឹកអ្នកដំណើររបស់ក្រុមហ៊ុនអ៊ែរប៊ូស A៣២០ និងប៊ូអ៊ីង ៧៣៧Max។
ចុះផ្សាយនៅថ្ងៃ៖
ស្តាប់ - ០២:០៩
មានម៉ាស៊ីនរ៉េអាក់ទ័រពីរ មានគ្រឿងបន្លាស់ភាគច្រើននាំមកពីបរទេស យន្តហោះធុន C៩១៩ដែលជាស្នាដៃដំបូងរបស់ក្រុមហ៊ុនរដ្ឋចិន កូម៉ាក Comac និងដែលអាចដឹកអ្នកដំណើរបាន១៦៤នាក់ បានប្រគល់ជាផ្លូវការឱ្យក្រុមហ៊ុនអាកាសចរណ៍ចិន China Eastern នៅថ្ងៃសុក្រនេះ នៅព្រលានយន្តហោះក្រុងសៀងហៃ។ នេះបើតាមរូបភាពផ្សព្វផ្សាយក្នុងទូរទស្សន៍ជាតិចិន CCTV។
ជាក្រុមហ៊ុនដឹកជញ្ជូនអ្នកដំណើរផ្លូវអាកាសធំលំដាប់ទីពីររបស់ចិន China Eastern នឹងទទួលបានយន្តហោះ C៩១៩ បួនគ្រឿងទៀត ពីពេលនេះដល់ដំណាច់ឆ្នាំ។ ឯដំណើរការសេវាដឹកជញ្ជូនអ្នកដំណើរនឹងអាចចាប់ផ្តើមនៅដើមត្រីមាសទីមួយឆ្នាំ២០២៣នេះហើយ។
ព្រឹត្តិការណ៍លក់យន្តហោះដំបូងនេះត្រូវបានចិនចាត់ទុកជារបត់ថ្មីមួយដ៏សំខាន់នៃឧស្សាហកម្មយន្តហោះស៊ីវិលចិន។ ក្រុមហ៊ុនអ្នកផលិតយន្តហោះ Comac បានប្រកាស កាលពីខែវិច្ឆិកា ទទួលការបញ្ជាទិញ C៩១៩ ចំនួន៣០០គ្រឿង ប៉ុន្តែក្រុមហ៊ុនមិនបានបង្ហើបឱ្យដឹងអំពីតម្លៃកិច្ចសន្យាទិញនិងកាលបរិច្ឆេទនៃប្រគល់ទំនិញដ៏ធំនេះទេ។
នាយករងផ្នែកពាណិជ្ជកម្មរបស់កូមាក់ ធ្លាប់បានអះអាងកាលពីឆ្នាំ២០១៨ ថា តម្លៃរបស់ C៩១៩ មានភាពប្រកួតប្រជែងខ្លាំងណាស់បើប្រៀបទៅនឹងយន្តហោះប្រភេទប្រហាក់ប្រហែលគ្នារបស់ក្រុមហ៊ុនប៊ូអ៊ីង ៧៣៧Max ឬយន្តហោះរបស់ក្រុមហ៊ុនអ៊ែរប៊ូសA៣២០។ ប៉ុន្តែក្នុងចំណោមការបញ្ជាទិញ ភាគច្រើនជាក្រុមហ៊ុនក្នុងស្រុក។ ក្រុមហ៊ុនអាកាសចរណ៍បរទេស (ថៃ អាល្លឺម៉ង់) មានបញ្ជាទិញតែប្រមាណ៣៤គ្រឿងប៉ុណ្ណោះ។
ការអភិវឌ្ឍយន្តហោះ C៩១៩ មិនបានរារាំងចិនមិនឱ្យស្វែងរកយន្តហោះបរទេសទេ។ កាលពីដើមឆ្នាំ ចិនបានចុះកិច្ចសន្យាជាមួយក្រុមហ៊ុនAirbus តម្លៃ១៧ពាន់លានដុល្លារ។ ក្រុមហ៊ុនអឺរ៉ុបបានចាប់ផ្តើមដំណើរការផលិតយន្តហោះA៣២១ នៅផ្ទាល់មូលដ្ឋានប្រទេសចិន តាំងពីដើមខែវិច្ឆិកមក។ ចំណែកជាមួយក្រុមហ៊ុនប៊ូអ៊ីងវិញ ភាពតានតឹងពាណិជ្ជកម្មចិន-អាមេរិក បានមកពន្យឺតស្ថានការណ៍យ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ