ថៃ បើកប្រតិបត្តិការស្វែងរកអ្នកបាត់ខ្លួនក្នុងហេតុការណ៍លិចនាវាយោធា
យោធាថៃបានបើកប្រតិបត្តិការសង្គ្រោះ ដើម្បីស្វែងរកអ្នកបាត់ខ្លួនចំនួន៣១នាក់ ក្នុងគ្រោះថ្នាក់លិចនាវាកងទ័ព កាលពីយប់ថ្ងៃ អាទិត្យឆ្លងមកថ្ងៃចន្ទ នៅក្នុងឈូងសមុទ្ទថៃ។ ក្នុងចំណោមកងនាវិកទាំងអស់ ១០៦នាក់ ជាង៧០នាក់បានរួចជីវិតនិងកំពុងទទួលការសង្គ្រោះ។
ចុះផ្សាយនៅថ្ងៃ៖
ស្តាប់ - ០១:៥២
ដោយហេតុតែខ្យល់ជំនោរខ្លាំងពេក ប្រព័ន្ធអគ្គីសនីរបស់នាវាល្បាត បានដាច់ ហើយម៉ាស៊ីនក៏គាំងលែងដំណើរការ។ ក្រុមនាវិកលែងអាចគ្រប់គ្រងនាវា ដែលចាប់ផ្អៀងលិច នៅពាក់កណ្តាលអាធ្រាត្រយប់ថ្ងៃអាទិត្យ ចម្ងាយប្រមាណ៣៧គីឡូម៉ែត្រពីឆ្នេរបាងសាផាន ខេត្តប្រាជួបឃីរីខាន។ នេះបើតាមការរៀបរាប់របស់អ្នកនាំពាក្យកងទ័ពជើងទឹកថៃ។
ក្នុងរូបភាពផ្សព្វផ្សាយដោយស្ថាប័នកងទ័ពជើងទឹក គេឃើញនាវាផ្អៀងលិចអស់ពាក់កណ្តាល។ នាវិកខ្លះលោតចុះទៅក្នុងទូកពោងសង្គ្រោះ។ ជាសរុបនាវិក៧៥នាក់ បានសង្គ្រោះ និងស្រង់ពីសមុទ្ទ មកដល់ដីគោក ដើម្បីរង់ចាំការពិនិត្យព្យាបាលនិងបញ្ជូនទៅមន្ទីរពេទ្យ។ ក្នុងនោះមាន៥នាក់ជារបួសធ្ងន់។ នេះបើតាមប្រសាសន៍របស់លោកប្រាយុទ្ធចាន់អូចា នាយករដ្ឋមន្ត្រីថៃ និងជាអតីតអគ្គមេបញ្ជាការកងទ័ពជើងគោក ដែលមានតួនាទីជារដ្ឋមន្ត្រីក្រសួងការពារជាតិផង។
ប្រតិបត្តិការសង្គ្រោះបានការចូលរួមពីឧទ្ធម្ភោគចក្រយោធាពីរគ្រឿង នាវាយោធាពីរគ្រឿង និងនាវាមុជទឹកមួយគ្រឿង។ នេះបើតាមសេចក្តីថ្លែងការណ៍របស់កងទ័ពជើងទឹកថៃដដែល។ យោធាជើងអាកាសក៏បានប្រកាសចូលរួមចំណែកក្នុងប្រតិបត្តិការសង្គ្រោះនេះដែរ។
សូមបញ្ជាក់ថា នាវាល្បាតថៃដែលរងគ្រោះថ្នាក់លិចនេះ ជានាវាផលិតដោយអាមេរិក និងបានដាក់ឱ្យដំណើរការនៅឆ្នាំ១៩៨៧។ តាំងពីប៉ុន្មានថ្ងៃមកនេះ តំបន់ភាគខាងត្បូងប្រទេសថៃរងព្យុះភ្លៀងយ៉ាងខ្លាំង បណ្តាលឱ្យការដឹកជញ្ជូនសាឡាងផ្លូវទឹកឆ្លងទៅកោះរអាក់រអួលយ៉ាងខ្លាំង។ ឧតុនិយមថៃបានប្រកាសផ្អាកការឆ្លងទូកទៅកោះសាមុយនៅថ្ងៃអាទិត្យនិងចន្ទនេះ ហើយណែនាំមិនឱ្យទូកតូចៗចេញទៅសមុទ្ទ ទេ។ ក្នុងប្រវត្តិគ្រោះថ្នាក់លិចទូក ថៃធ្លាប់រងគ្រោះធ្ងន់ខ្លាំងស្លាប់ទេសចរជាង៤០នាក់ កាលពីខែកក្កដាឆ្នាំ២០១៨ នៅជិតភូកេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ