សមាជិកសភានិងមហាសេដ្ឋីរុស្ស៊ី២នាក់ទៀត ត្រូវគេប្រទះឃើញស្លាប់ ក្នុងលក្ខខណ្ឌគួរឲ្យសង្ស័យបំផុត
យោងតាមប្រភពពីសមត្ថកិច្ចឥណ្ឌា មានសមាជិកសភាជនជាតិរុស្ស៊ី និងជាមហាសេដ្ឋីម្នាក់ ឈ្មោះ Pavel Antov បានស្លាប់នៅសណ្ឋាគារមួយ នៅថ្ងៃទី២៧ធ្នូ។ ករណីស្លាប់នេះ បានកើតឡើង បន្ទាប់ពីអ្នករួមដំណើរម្នាក់របស់សមាជិកសភាជនជាតិរុស្ស៊ីរូបនេះ ដែលជាជនជាតិរុស្ស៊ីដែរនោះ បានស្លាប់កាលពី២ថ្ងៃមុន នៅទីតាំងសណ្ឋាគារដដែលនេះ។ សមត្ថកិច្ចឥណ្ឌាកំពុងតែបើកការស៊ើបអង្កេត ទាក់ទិននឹងករណីស្លាប់ផ្ទួនៗដ៏គួរឲ្យសង្ស័យនេះ។ សូមបញ្ជាក់ថា គិតចាប់ពីសង្គ្រាមអ៊ុយក្រែនបានផ្ទុះឡើងមក មានមហាសេដ្ឋី និងអ្នកមានអំណាចរុស្ស៊ី សរុបជាង១០នាក់ហើយ ដែលបានស្លាប់បន្តបន្ទាប់គ្នា ក្នុងលក្ខខណ្ឌគួរឲ្យសង្ស័យ ដែលអ្នកស្លាប់ខ្លះត្រូវគេដឹងថា បានសម្តែងមតិរិះគន់ ប្រឆាំងនឹងការដែលរុស្ស៊ីធ្វើសង្គ្រាមឈ្លានពាននៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៤១
សមត្ថកិច្ចនគរបាលរដ្ឋOdysha របស់ឥណ្ឌា បានឲ្យដឹងថា ជនជាតិរុស្ស៊ី ឈ្មោះ Pavel Antov អាយុ៦៥ឆ្នាំ ត្រូវបានគេប្រទះឃើញស្លាប់នៅក្នុងថ្លុកឈាម នៅខាងមុខសណ្ឋាគារប្រណិតមួយកន្លែង ក្នុងក្រុង Rayagada។ សមត្ថកិច្ចឥណ្ឌា អះអាងថា ជនរងគ្រោះ ទំនងជាបានធ្លាក់ពីបង្កាន់ដៃរានហាលជាន់ទី៣ របស់បន្ទប់សណ្ឋគារ ដែលជននេះស្នាក់នៅ។
គួរកត់សំគាល់ថា ករណីស្លាប់របស់ លោកPavel Antov នេះ បានកើតឡើង ២ថ្ងៃក្រោយករណីស្លាប់ជនជាតិរុស្ស៊ីម្នាក់ទៀត នៅសណ្ឋាគារនេះដែរ។ អ្នកស្លាប់នោះ ឈ្មោះ Vlaidimir Bidenov គឺជាអ្នករួមដំណើរម្នាក់ ក្នុងចំណោម៤នាក់ របស់ Pavel Antov។ Vlaidimir Bidenov ត្រូវគេប្រទះឃើញស្លាប់ក្នុងបន្ទប់សណ្ឋាគារ ដោយសង្ស័យថាដោយសារបរិភោគគ្រឿងស្រវឹងច្រើនជ្រុល និងអាចមានលាយឡំនឹងគ្រឿងញៀនផង។ យ៉ាងណាក៏ដោយ លោក Rajesh Pandit នាយនគរបាលឥណ្ឌាប្រចាំតំបន់ បានអះអាងប្រាប់អ្នកកាសែតថា សមត្ថកិច្ចនឹងបើកការស៊ើបអង្កេតស៊ីជំរៅបន្ថែមទៀត ទៅលើករណីស្លាប់ជនជាតិរុស្ស៊ីទាំង២នាក់នេះ។
សូមបញ្ជាក់ថា លោក Pavel Antov ត្រូវគេស្គាល់ថា គឺជាសមាជិកសភារុស្ស៊ីម្នាក់ មកពីគណបក្សរបស់លោកពូទីន។ លោកត្រូវគេស្គាល់ផងដែរ ថាជាសមាជិកសភាដែលមានទ្រព្យស្តុកស្តម្ភជាងគេបំផុត ដោយលោកមានមុខជំនួញកសិចំណីអាហារ។ កាលពីខែមិថុនាកន្លងទៅ លោកPavel Antov ត្រូវបានគេអះអាងថាបានសរសេរសារ លើWhatsApp ដោយបានចាត់ទុកការទំលាក់គ្រាប់បាញ់ប្លោងនៅអ៊ុយក្រែន ថាជាសោកនាដកម្ម បង្កឡើងដោយកងទ័ពរុស្ស៊ី។ តែក្រោយមក លោក Pavel Antov បានអះអាងថាលោកមិនបានសរសេរសារនេះទេ ហើយបានប្រកាសថាខ្លួន គាំទ្រពេញទំហឹងចំពោះ “ប្រតិបត្តិការពិសេសនៃកងទ័ពរុស្ស៊ីនៅអ៊ុយក្រែន”។
យ៉ាងណាក៏ដោយ ករណីស្លាប់របស់លោក Pavel Antov នៅឥណ្ឌានេះ បានបង្កឲ្យមានការសង្ស័យបំផុត ថាអាចជាប្រតិបត្តិការសម្លាប់បំបិទមាត់មនុស្ស ដែលប្រឆាំងនឹងសង្គ្រាមនៅអ៊ុយក្រែន។ ប្រតិបត្តិការសម្លាប់ ដែលក្រុមចារកិច្ចរុស្ស៊ី តែងតែមានបទពិសោធន៍ធ្វើជាញឹកញាប់ មិនថានៅក្នុងស្រុក ឬក្រៅស្រុក។
គិតចាប់ពីពេលដែលសង្គ្រាមនៅអ៊ុយក្រែន បានផ្ទុះឡើងមក មានអ្នកមានអំណាច និងមហាសេដ្ឋីរុស្ស៊ី ជាង១០នាក់ហើយ ដែលបានស្លាប់បន្តបន្ទាប់គ្នា នៅក្នុងលក្ខខណ្ឌអាថ៌កំបាំង និងគួរឲ្យសង្ស័យបំផុត។ ខ្លះស្លាប់ដោយជំពប់ជើងធ្លាក់ពីលើជណ្តើរ ខ្លះស្លាប់ដោយការធ្វើអត្តឃាត ឬស្លាប់ដោយពុលនឹងពិសគីង្គក់ជាដើម។ ករណីស្លាប់ខ្លះទៀត គឺស្លាប់ទាំងគ្រួសារតែម្តង ដែលសមត្ថកិច្ចរុស្ស៊ីអះអាងថាជនរងគ្រោះ បានស្លាប់ប្រពន្ធកូនទាំងអស់ មុនធ្វើអត្តឃាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ