ឆ្នាំ២០២២ កំណើនសេដ្ឋកិច្ចវៀតណាម ឡើងខ្ពស់បំផុតក្នុងរវាង១០ឆ្នាំចុងក្រោយ
នៅក្នុងឆ្នាំ២០២២នេះ កំណើនសេដ្ឋកិច្ចវៀតណាម បានឈានឡើងខ្ពស់បំផុតក្នុងរវាង១០ឆ្នាំចុងក្រោយ ក្នុងកម្រិត៨%។ នេះបើផ្អែកតាមតួលេខផ្លូវការ ផ្សាយដោយរដ្ឋាភិបាលវៀតណាម នៅថ្ងៃទី២៩ធ្នូ។ ពពកអាប់នៃវិបត្តិកូវីដ១៩ រយៈពេលជិត៣ឆ្នាំមកនេះ បានរសាត់បាត់ហើយ បើទោះបីជានៅត្រីមាសចុងក្រោយ នៃឆ្នាំសេដ្ឋកិច្ចវៀតណាម បានដើរយឺតខ្លះ ដោយសារតែវិបត្តិអតិផរណាជុំវិញពិភពលោក។
ចុះផ្សាយនៅថ្ងៃ៖
ស្តាប់ - ០២:១៨
យោងតាមការិយាល័យស្ថិតិជាតិវៀតណាម ក្នុងឆ្នាំ២០២២ កំណើនសេដ្ឋកិច្ចវៀតណាម មានចំនួន ៨%។ ជាកំណើនដែលបានកើនខ្ពស់ លើសពីការរំពឹងទុករបស់រដ្ឋាភិបាលវៀតណាម ដែលបានព្យាករណ៍ថា អាចមានត្រឹម ៦ ទៅ ៦,៥%។ នេះគឺជាតួលេខកំណើនសេដ្ឋកិច្ចវិជ្ជមានដ៏ខ្ពស់បំផុត ក្នុងរវាង១០ឆ្នាំចុងក្រោយនេះ សម្រាប់វៀតណាម។
កាលពីឆ្នាំ២០១៩ វៀតណាមមានកំណើនសេដ្ឋកិច្ចប្រមាណ៧% ពោលគឺជាសន្ទុះដែលអ្នកវិភាគទូទៅ បានចាត់ទុកថាជាសន្ទុះដ៏ស្វាហាប់ជាងគេមួយ ក្នុងចំណោមប្រទេសនៅតំបន់អាស៊ី។ ក៏ប៉ុន្តែ ក្នុងរវាងឆ្នាំ២០២០ និង២០២១ សេដ្ឋកិច្ចវៀតណាម មិនខុសពីប្រទេសផ្សេងៗ បានជួបការលំបាកដោយសារតែវិបត្តិកូវីដ១៩ ដោយមានកំណើនចំនួនប្រមាណតែ៣%ប៉ុណ្ណោះ។
យោងតាមការិយាល័យស្ថិតិជាតិវៀតណាម គឺពេលនេះសេដ្ឋកិច្ចវៀតណាម បានងើបផុតពីវិបត្តិកូវីដ១៩ហើយ។ កម្លាំងសេដ្ឋកិច្ចដើរយ៉ាងល្អ ជាមួយនឹងសន្ទុះនៃការនាំចេញផលិតផល ព្រមទាំងការលក់រាយក្នុងស្រុកផងដែរ។ យ៉ាងណាក៏ដោយ នៅត្រីមាសទី៤ចុងឆ្នាំ២០២២ សន្ទុះសេដ្ឋកិច្ចវៀតណាម បានចុះថយបន្តិច ដែលមានត្រឹម៥,៩% ដោយសារតែវិបត្តិអតិផរណាពេញសកលលោក។ សង្គ្រាមអ៊ុយក្រែន អតិផរណា បានធ្វើឲ្យធ្លាក់ចុះដល់ការបញ្ជាទិញពីក្រៅ។
សូមបញ្ជាក់ថា កាលពីដើមខែធ្នូនេះ ធនាគារអភិវឌ្ឍន៍អាស៊ី បានព្យាករណ៍ថា សេដ្ឋកិច្ចវៀតណាមអាចមានកំណើនប្រមាណ៧,៥% ។ តែទន្ទឹមគ្នានេះ ធនាគារ ADB បានទាញចំណាប់អារម្មណ៍ផងដែរ អំពីការធ្លាក់ចុះក្នុងវិស័យនាំចេញទំនិញ។ នៅឆ្នាំ២០២៣ខាងមុខ កំណើនសេដ្ឋកិច្ចវៀតណាម អាចនឹងមានក្នុងកម្រិត ៦,៣%។ អតិផរណាឡើងខ្ពស់ ធ្វើឲ្យអំណាចទិញរបស់ប្រជាជននៅអឺរ៉ុប និងនៅសហរដ្ឋអាមេរិកជាដើម ត្រូវចុះខ្សោយ ដែលវានឹងជះផលអវិជ្ជមានដល់ការនាំចេញទំនិញរបស់វៀតណាម។
យ៉ាងណាមិញ យោងតាមសហព័ន្ធពលកម្មវៀតណាម គឺយ៉ាងហោចណាស់ មានពលករវៀតណាមជិតកន្លះលាននាក់ ដែលត្រូវបាននយោជកកាត់បន្ថយម៉ោងការងារ ក្នុងរវាង៤ខែចុងក្រោយនេះ។ ចំណែកពលករប្រមាណ៤ម៉ឺននាក់ ត្រូវគេបញ្ឈប់ពីការងារតែម្តង ដោយសារតែសង្វាក់ផលិតកម្មចុះខ្សោយ គ្មានការបញ្ជាទិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ