អ.ស.ប. ៖ ផ្តល់ជំនួយដ៏លើសលុប និងបន្ធូរបំណុល ជាក្បួនស្ថាបនាប៉ាគីស្ថានឡើងវិញ
លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ បានស្នើសុំនៅថ្ងៃចន្ទនេះឱ្យសហគមន៍អន្តរជាតិផ្តល់ការគាំទ្រដ៏លើសលុបដល់ប៉ាគីស្ថាន តាមរយៈជំនួយឱ្យគ្រប់ជាង៨ពាន់លានដុល្លារ សម្រាប់យ៉ាងស្តារប្រទេសឡើងវិញពីគ្រោះមហន្តរាយទឹកជំនន់ កាលពីឆ្នាំទៅ។ មហន្តរាយដែលប្រទេសមួយចំនួនធំផ្សេងទៀតមិនអាចចៀសរួចដោយហេតុអាកាសធាតប្រែប្រួល។
ចុះផ្សាយនៅថ្ងៃ៖
ស្តាប់ - ០២:១៩
គ្មានប្រទេសណាសមនឹងរងគ្រោះដូចអ្វីដែលប៉ាគីស្ថានបានទទួលទេ ដូច្នេះយើងចាំបាច់ត្រូវតែជួយស្ថាបនាប្រទេសនេះឡើងវិញដើម្បីអាចស៊ូនឹងការប្រែប្រួលអាកាសធាតុបាន។ នេះជាប្រសាសន៍របស់លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ ពេលបើកសន្និសីទអន្តរជាតិ នៅទីក្រុងហ្សឺណែវដែលមានជាង៤០ប្រទេសចូលរួម។
ដើម្បីស្ថិរភាពសេដ្ឋកិច្ចប៉ាគីស្ថាន លោកអគ្គលេខាធិការអ.ស.ប. បានទាមទារការផ្តល់ជំនួយវិនិយោគដ៏លើសលុប និងធ្វើកំណែទម្រង់ប្រព័ន្ធហិរញ្ញវត្ថុអន្តរជាតិ ដោយបន្ធូរបន្ថយបំណុល ឬផ្តល់កញ្ចប់ហិរញ្ញវត្ថុថ្មី។ លោកហ្គូទែរស៍បានចំអកថា ស្ថិរភាពសេដ្ឋកិច្ចសំខាន់ខ្លាំងណាស់ តែមិនមែនទាល់ស្លាប់អស់ទើបសេដ្ឋកិច្ចមានស្ថិរភាពល្អឥតខ្ចោះឡើយ។ សម្រាប់លោកហ្គូទែរស៍ ប្រព័ន្ធហិរញ្ញវត្ថុអន្តរជាតិមិនបានផ្តល់ជំនួយគ្រប់គ្រាន់ដល់ប្រទេសមានចំណូលមធ្យមដែលត្រូវការធ្វើវិនិយោគទប់ទល់នឹងគ្រោះមហន្តរាយធម្មជាតិទេ។
មានប្រជាជនច្រើនជាងគេទី៥នៅលើពិភពលោក ប៉ាគីស្ថានបញ្ចេញឧស្ម័នកាបូនិកទាបជាង១%នៃឧស្ម័នផ្ទះកញ្ចក់ពិភពលោក តែជាប្រទេសរងគ្រោះខ្លាំងជាងគេបំផុតមួយ ពីការប្រែប្រួលអាកាសធាតុ។ ទឹកជំនន់ដ៏កំណាចកាលពីខែកញ្ញាបានផ្តាច់ជីវិតមនុស្សអស់ជាង១៧០០នាក់ និងជាង៣៣លាននាក់រងគ្រោះ។ គម្រោងស្ថាបនាប្រទេសឡើងវិញត្រូវចំណាយ ១៦៣០០០លានដុល្លារ ដែលប៉ាគីស្ថានខ្លួនឯងអាចធានាបានពាក់កណ្តាល តែត្រូវការជាង៨ពាន់លានទៀតពីសហគមន៍អន្តរជាតិ។ ហេតុដូច្នេះហើយបានជានាយករដ្ឋមន្ត្រីប៉ាគីស្ថាន បានប្រកាសថា ប្រទេសកំពុងប្រឈមនឹងសេចក្តីត្រូវការធំធេងណាស់ និងបានស្នើសុំឱ្យមូលនិធិរូបិយវត្ថុអន្តរជាតិបន្ថយសម្ពាធដែលដាក់លើប៉ាគីស្ថាន។
ជាមួយនឹងការជំរុញឱ្យប៉ាគីស្ថានរក្សាចំណាយសាធារណៈត្រឹមល្មមដែលអាចទ្រទ្រង់រួច និងធ្វើកំណែទម្រង់ថវិកា ដោយត្រូវតម្រង់ជំនួយសង្គមឱ្យចំទិសដៅ បន្ថយចំណាយ និងប្រកាន់យកប្រព័ន្ធពន្ធដារទូលំទូលាយ ធនាគារពិភពលោកបានសន្យាផ្តល់ជំនួយស្ថាបនាចំនួន ២ពាន់លាន។ ធនាគារអភិវឌ្ឍន៍អ៊ីស្លាម ៤២០០លាន។ ធនាគារអភិវឌ្ឍន៍អាស៊ី ១៥០០លាន និងជាង១ពាន់លានទៀតបានមកពី សហភាពអឺរ៉ុប ចិន និងអារ៉ាប៊ីសាអូឌីត សហរដ្ឋអាមេរិក និងបារាំង។ ដូចកម្មវត្ថុ គិតត្រឹមរសៀលថ្ងៃចន្ទទី ៩មករា សន្និសីទអន្តរជាតិបានទទួលពាក្យសន្យាឱ្យជំនួយជាង៨៥៧០លានសម្រាប់ស្ថាបនាប៉ាគីស្ថានឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ