វិបត្តិកូវីដ៖ ចិនផ្អាកការផ្តល់ទិដ្ឋាការទេសចរណ៍ដើម្បីសងសឹកនឹងការរឹតបន្តឹងរបស់កូរ៉េខាងត្បូង
សងសឹកនឹងចំណាត់ការការរឹតបន្តឹងលើអ្នកដំណើរជនជាតិចិនចូលទឹកដីកូរ៉េខាងត្បូង អាជ្ញាធរចិន តាមរយៈស្ថានទូតចិននៅទីក្រុងសេអ៊ូល បានប្រកាសនៅថ្ងៃអង្គារនេះ ថា នឹងផ្អាកការផ្តល់ទិដ្ឋាការរយៈពេលខ្លីសម្រាប់ពលរដ្ឋកូរ៉េខាងត្បូង។ នៅចំពោះមុខនៃសន្ទុះកំណើនឆ្លងរាលដាលជំងឺកូវីដនៅប្រទេសចិន កូរ៉េខាងត្បូងដែលបានលើកឡើងពីហេតុផលវិទ្យាសាស្រ្ត បានកាត់បន្ថយការផ្តល់ទិដ្ឋាការទេសចរណ៍ និងធ្វើតេស្តរកមេរោគកូវីដលើអ្នកដំណើរមកពីប្រទេសចិន។
ចុះផ្សាយនៅថ្ងៃ៖
នៅក្នុងសេចក្តីប្រកាសនៅថ្ងៃអង្គារនេះ ស្ថានទូតចិននៅទីក្រុងសេអ៊ូល បានបញ្ជាក់ថា ការផ្អាកផ្តល់ទិដ្ឋាការទេសចរណ៍ដល់ពលរដ្ឋកូរ៉េខាងត្បូងជាការឆ្លើយតបរបស់ចិនទៅនឹងវិធានការរឹតបន្តឹងដ៏រើសអើងរបស់រដ្ឋាភិបាលកូរ៉េខាងត្បូង។
តាមស្ថានទូតចិននៅសេអ៊ូល ស្ថានទូត និងស្ថានកុងស៊ុលទាំងអស់របស់ចិននៅកូរ៉េខាងត្បូងនឹងផ្អាកការផ្តល់ទិដ្ឋាការរយៈពេលខ្លីដល់ពលរដ្ឋកូរ៉េខាងត្បូង។ ស្ថានទូតនឹងអាចផ្លាស់ប្តូរជំហររបស់ខ្លួនមកវិញ បើសិនកូរ៉េខាងត្បូងឈប់រឹតបន្តឹងលើអ្នកដំណើរមកពីប្រទេសចិន។
ចាប់តាំងពីមានការផ្ទុះជំងឺកូវីដនៅប្រទេសចិន នៅខែធ្នូ នៅក្រោយរដ្ឋាភិបាលចិនបោះបង់ចោលគោលនយោបាយកូវីដសូន្យ សេអ៊ូលបានបង្កើនវិធានការរឹតបន្តឹងលើអ្នកដំណើរមកពីប្រទេសចិន តាមរយៈ ការផ្អាក មិនផ្តល់ទិដ្ឋាការទេសចរណ៍ ការកាត់បន្ថយជើងហោះហើរមកពីចិន និងការទាមទារឲ្យអ្នកដំណើរមកពីចិនត្រូវតែមានលទ្ធផលតេស្តកូវីដអវិជ្ជមាន ៤៨ម៉ោង នៅមុនឡើងយន្តហោះ។
តាមអាជ្ញាធរកូរ៉េខាងត្បូង នៅពេលមកដល់ព្រលានយន្តហោះនៅកូរ៉េខាងត្បូង អ្នកដំណើរមកពីប្រទេសចិននឹងត្រូវគេធ្វើតេស្តម្តងទៀត និងត្រូវបញ្ជូនទៅធ្វើចត្តាឡីស័ក មួយសប្តាហ៍ ក្នុងករណីរកឃើញមានវិជ្ជមានមេរោគកូវីដ។ តាមតួលេខផ្លូវការរបស់កូរ៉េខាងត្បូង ចាប់តាំងពីថ្ងៃទី ២មករា នៅក្នុងចំណោមអ្នកទេសចរចិន២២២៤នាក់ ដែលបានធ្វើដំណើរមកដល់ទឹកដីកូរ៉េខាងត្បូង មាន១៧,៥%ត្រូវបានគេធ្វើតេស្តរកឃើញមានវិជ្ជមានមេរោគកូវីដ។
ដោយប្រកាសវិធានការរឹតបន្តឹងលើអ្នកដំណើរមកពីប្រទេសចិន នាយករដ្ឋមន្រ្តីកូរ៉េខាងត្បូង លោកHan Duck-Soo បានអះអាងថា កូរ៉េខាងត្បូងត្រូវបង្ខំចិត្តចាត់វិធានការរឹតបន្តឹងដើម្បីទប់ស្កាត់ការឆ្លងរាលដាលជំងឺកូវីដនៅក្នុងប្រទេស និងដោយសារមើលទៅលើស្ថានភាពធ្លាក់ចុះដុនដាបនៃជំងឺកូវីដនៅប្រទេសចិន។
នៅថ្ងៃចន្ទ រដ្ឋមន្រ្តីការបរទេសកូរ៉េខាងត្បូងបានបញ្ជាក់ទៅសមភាគីចិនថា វិធានការរបស់សេអ៊ូលធ្វើឡើងដោយយោងទៅលើការសិក្សាវិទ្យាសាស្រ្ត ដើម្បីការពារកូរ៉េខាងត្បូងពីការឆ្លងរាលដាលលឿនរហ័សរបស់ជំងឺកូវីដ។
នៅខែធ្នូ សេអ៊ូលបានប្រកាសរឹតបន្តឹងការផ្តល់ទិដ្ឋាការរយៈពេលខ្លី សម្រាប់ពលរដ្ឋចិន រហូតដល់ចុងខែមករា ប៉ុន្តែ នៅតែលើកលែង សម្រាប់មន្រ្តីរដ្ឋការចិន មន្រ្តីទូតនិងអ្នកធ្វើការមនុស្សធម៌ ឬអ្នកធ្វើជំនួញសំខាន់។
តាមក្រសួងវប្បធម៌កូរ៉េខាងត្បូង វិបត្តិកូវីដបានធ្វើឲ្យចំនួនអ្នកទេសចរចិននៅកូរ៉េខាងត្បូងធ្លាក់ថយចុះ ពី ជាង ៦លាននាក់ នៅឆ្នាំ ២០១៩ មកនៅជាង ២សែននាក់ នៅឆ្នាំ ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ