ចិន ៖ ចរន្តធ្វើដំណើរទៅចូលឆ្នាំថ្មីនៅស្រុកកំណើត ចាប់ផ្តើម ទន្ទឹមនឹងកូវីដឡើងខ្លាំង
បន្ទាប់ពីជាប់បម្រាមកូវីដអស់ពេលជិតបីឆ្នាំ ចិនអាចប្រារព្វពិធីបុណ្យចូលឆ្នាំថ្មី ឆ្នាំចិន ដែលនឹងប្រព្រឹត្តទៅនៅថ្ងៃ ទី ២១មករា ២០២៣ ខាងមុខ ជាលើកទីមួយ ដោយគ្មានការហាមឃាត់អ្វីទាំងអស់។ តាមទម្លាប់ចិន ការអបអរពិធីបុណ្យឆ្នាំថ្មី មានរយៈពេល៤០ថ្ងៃ ដោយចាប់ផ្តើមពីថ្ងៃសៅរ៍ទី ៧មករានេះទៅ ជាមួយនឹងការផ្តើមធ្វើចលនាបំលាស់ទីទៅស្រុកកំណើតយ៉ាងសន្ធឹកសន្ធាប់បំផុត។ ប៉ុន្តែដំណើររីករាយជួបជុំគ្នាឆ្នាំថ្មី ក៏ជាការសម្រួលឱ្យមានរលកចម្លងកូវីដកាន់តែធំដែរ។
ចុះផ្សាយនៅថ្ងៃ៖
ស្តាប់ - ០២:៣៤
អាក់ខានអស់ពីរឆ្នាំ នេះជាលើកទីមួយ ដែលពលរដ្ឋចិនអាចមានសេរីភាពប្រារព្វពិធីបុណ្យចូលឆ្នាំថ្មី ដោយសេរី ព្រោះលែងមានហើយនយោបាយសូន្យកូវីដ និងគ្មានទេការបិទខ្ទប់ ការធ្វើចត្តាឡីស័ក ឬការធ្វើតេស្ត។ អ្នកវិនិយោគសង្ឃឹមថា ការបើកប្រទេសឡើងវិញ នឹងអាចផ្តល់ភាពស្រស់បំព្រងឡើងវិញដល់សេដ្ឋកិច្ចជាតិ ដែលចុះអាប់អួរយ៉ាងខ្លាំងបំផុតមិនធ្លាប់ជួបប្រទះសោះក្នុងរយៈពេលជិតកន្លះសតវត្សរ៍កន្លងមកនេះ។ រថភ្លើង យន្តហោះ នឹងត្រូវមានជិះពេញណែនឡើងវិញដែរ បើទោះបីជាអាជ្ញាធរគិតថា ចំនួនអ្នកដំណើរអាចនៅទាបជាងកំរិតមុនសម័យកូវីដក៏ដោយ។
បើតាមការព្យាកររបស់ក្រសួងដឹកជញ្ជូន សកម្មភាពធ្វើដំណើរនឹងកើនឡើងដល់២ពាន់លាន ក្នុងរយៈពេល៤០ថ្ងៃនៃវេលាអបអរពិធីបុណ្យចូលឆ្នាំថ្មី ដែលចាប់ផ្តើមពីថ្ងៃទី៧មករានេះទៅ។ ជាការកើនឡើងប្រមាណ៩០,៥% ឬត្រូវជា៧០,៣%បើប្រៀបទៅចំនួនធ្វើដំណើរកាលពីឆ្នាំ២០១៩ មុនផ្ទុះជំងឺរាតត្បាតកូវីដ១៩។
ប៉ុន្តែទន្ទឹមនឹងភាពរីករាយបានសេរីភាពទៅចូលឆ្នាំជាមួយគ្រួសារ ចរន្តធ្វើដំណើរត្រលប់ទៅលេងស្រុកក្នុងឱកាសចូលឆ្នាំថ្មីដ៏សន្ធឹកសន្ធាប់នេះ ក៏ជាឱកាសបង្កឱ្យមានការរីករាលដាលចម្លងកូវីដដល់កំពូល ទៅកាន់ក្រុងតូចៗ និងតំបន់ដាច់ស្រយាល ដែលមានប្រព័ន្ធសុខាភិបាល និងសម្ភារៈព្យាបាលទន់ខ្សោយ។ អាជ្ញាធរបានប្រកាសពង្រឹងសេវា បើកគ្លីនិក និងចាត់វិធានការការពារអ្នកជំងឺងាយរងគ្រោះហើយ តែតំបន់ជនបទចិនធំទូលាយខ្លាំងណាស់ ប្រជាជនក៏ច្រើន ឯធនធានថ្នាំក៏មិនគ្រប់គ្រាន់បើគិតជាមធ្យមភាគសម្រាប់ប្រជាពលរដ្ឋម្នាក់ៗទៅ។ នេះបើតាមសេចក្តីប្រកាសរបស់អ្នកនាំពាក្យគណៈកម្មការសុខាភិបាលជាតិ លោក មី ហ្វេង Mi Feng។
ហេតុដូច្នេះហើយបានជា ពលរដ្ឋចិនខ្លះបានសម្តែងការអបអរចង់ជួបជុំគ្រួសារឆ្នាំថ្មី តែខ្លះទៀតព្រួយបារម្ភខ្លាចមានការចម្លងកូវីដទៅឪពុកម្តាយចាស់ៗ។
សូមរំលឹកថា គ្រាន់តែរដ្ឋាភិបាលក្រលាស់នយោបាយ បោះបង់វិធានការសូន្យកូវីដភ្លាម ករណីវិជ្ជមានបានផ្ទុះឡើងយ៉ាងខ្លាំង មន្ទីរពេទ្យចាល់ណែន អស់ថ្នាំសង្កូវ និងការបន្តកន្ទុយរង់ចាំបញ្ចុះសព។ ចាប់ពីថ្ងៃអាទិត្យទី ៨មករាទៅ ចិនបើកព្រំប្រទល់ជាមួយហុងកុង និងបញ្ចប់កាតព្វកិច្ចធ្វើចត្តាឡីស័កសម្រាប់អ្នកដំណើរត្រលប់ចូលស្រុក។ ប្រជាជនចិនក៏អាចធ្វើដំណើរទៅបរទេសបានវិញ តែមានប្រទេសជាង១០នៅលើពិភពលោក បានទាមទារឱ្យអ្នកដំណើរមកចិនត្រូវបង្ហាញតេស្តអវិជ្ជមានវិញម្តងទើបឱ្យចូលក្នុងប្រទេសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ