ជប៉ុននិងអង់គ្លេស ចុះកិច្ចព្រមព្រៀងសហប្រតិបត្តិការកងទ័ព ដើម្បីរៀបយុទ្ធសាស្ត្រប្រឈមនឹងចិន
យោងតាមការបញ្ជាក់ ពីរដ្ឋាភិបាលអង់គ្លេស គឺលោកនាយករដ្ឋមន្ត្រីអង់គ្លេស និងចុះកិច្ចព្រមព្រមព្រៀងសហប្រតិបត្តិការកងទ័ព ជាមួយលោកនាយករដ្ឋមន្ត្រីជប៉ុន នៅទីក្រុងឡុងដ៍ នៅថ្ងៃពុធទី១១មករានេះ។ ជាកិច្ចព្រមព្រៀងសហប្រតិបត្តិការកងទ័ពដ៏សំខាន់បំផុត ដែលនឹងផ្សារភ្ជាប់តួនាទីរបស់អង់គ្លេស នៅក្នុងការការពារសន្តិសុខ ក្នុងតំបន់ឥណ្ឌូប៉ាស៊ីហ្វិក។ កត្តាសន្តិសុខដែលកាន់តែប្រឈមគ្រោះថ្នាក់ ដោយសារតែយុទ្ធសាស្ត្រវាតទីរបស់ចិន ហើយដែលធ្វើឲ្យជប៉ុនព្រួយបារម្ភខ្លាំង។
ចុះផ្សាយនៅថ្ងៃ៖
ស្តាប់ - ០៣:០៥
ឆ្លងកាត់ការចរចាគ្នា អស់រយៈពេលជាច្រើនឆ្នាំ ទីបំផុតអង់គ្លេសនិងជប៉ុន នឹងចុះហត្ថលេខារួមគ្នា លើកិច្ចព្រមព្រៀងសហប្រតិបត្តិការកងទ័ព ក្នុងឱកាសដែលលោកហ្វ៊ូមីអូ គីស៊ីដា មកទស្សនកិច្ចនៅទីក្រុងឡុងដ៍ ថ្ងៃពុធទី១១មករា២០២៣។ ជាកិច្ចព្រមព្រៀងការពារជាតិ ដ៏ធំនិងសំខាន់បំផុត សម្រាប់ប្រទេសទាំង២ ក្នុងរវាងមួយសតវត្សមកនេះ នៅក្រោយសន្ធិសញ្ញាសម្ព័ន្ធភាពអង់គ្លេស-ជប៉ុន ឆ្នាំ១៩០២ ដើម្បីទប់ទល់ជាមួយនឹងការឈ្លានពានរបស់រុស្ស៊ី។
តែសតវត្សទី២១នេះ បរិបទបានប្រែប្រួល មិនមែនរុស្ស៊ីទេ តែគឺចិនដែលកំពុងតែធ្វើឲ្យជប៉ុនមានការព្រួយបារម្ភ។ ជប៉ុនក្រោមការដឹកនាំរបស់រដ្ឋាភិបាលលោកហ្វ៊ូមីអូ គីស៊ីដា បានចាត់ទុកចិនជាគូរប្រជែងយុទ្ធសាស្ត្រដ៏ធំ និងគ្រោះថ្នាក់បំផុតសម្រាប់សន្តិសុខជប៉ុន។ ចំណែកលោកនាយករដ្ឋមន្ត្រីអង់គ្លេស រីស៊ី ស៊ូណាក់វិញ ធ្លាប់បានបង្ហាញជំហរយ៉ាងម៉ឺងម៉ាត់ ប្រឆាំងដាច់ខាត ចំពោះយុទ្ធសាស្ត្រវាតទីនិយមរបស់ចិន នៅក្នុងតំបន់ឥណ្ឌូប៉ាស៊ីហ្វិក។ គឺក្នុងបរិបទនេះហើយ ដែលបានទាញជប៉ុននិងអង់គ្លេស ឲ្យរួមកម្លាំងគ្នា សហការការពារសន្តិសុខនិងស្ថិរភាព។
យោងតាម Downing Street កិច្ចព្រមព្រៀងសហប្រតិបត្តិការកងទ័ពនេះ នឹងអនុញ្ញាតឲ្យកងទ័ពទាំង២ រៀបចំគម្រោងផែនការ ព្រមទាំងដាក់ចុះការអនុវត្តហ្វឹកហាត់សមយុទ្ធ និងពង្រាយកម្លាំងទ័ព ក្នុងទ្រង់ទ្រាយធំ។ បន្ថែមពីនេះទៀត អង់គ្លេស និងជប៉ុន និងរួមគ្នាសហការជាមួយអ៊ីតាលី ដើម្បីផលិតយន្តហោះចម្បាំងថ្មីទំនើបមួយប្រភេទ ពីនេះដល់ឆ្នាំ២០៣៥។
ប្រភពពីរដ្ឋាភិបាលអង់គ្លេសដែរ គឺលោករីស៊ី ស៊ូណាក់ មានគម្រោងនិយាយជាមួយលោក ហ្វ៊ូមីអូ គីស៊ីដា អំពីការរឹតចំណងសហការពាណិជ្ជកម្ម ដោយអង់គ្លេសមានបំណងចូលរួមនៅក្នុង កិច្ចព្រមព្រៀងពាណិជ្ជកម្មសេរីអន្តរប៉ាស៊ីហ្វិក CPTPP។ បន្ថែមពីនេះ ក្នុងនាមជប៉ុនជាប្រធានវិលជុំនៃក្រុមប្រទេស G7 អង់គ្លេសមានបំណងជំរុញឲ្យជជែកគ្នាអំពីផែនការផ្តល់ជំនួយដល់អ៊ុយក្រែន ប្រឈមនឹងការឈ្លានពានរបស់រុស្ស៊ី។
គួរបញ្ជាក់ថា លោកហ្វ៊ូមីអូ គីស៊ីដា កំពុងតែធ្វើទស្សនកិច្ច ជួបថ្នាក់ដឹកនាំនៅអឺរ៉ុប ដោយបានមកទីក្រុងប៉ារីស ទីក្រុងរ៉ូម និងឡុងដ៍។ នៅថ្ងៃព្រហស្បតិ៍ទី១២មករា លោកនឹងធ្វើដំណើរទៅក្រុងអូតាវ៉ា ជួបនាយករដ្ឋមន្ត្រីកាណាដា មុននឹងឆ្ពោះទៅកាន់វ៉ាស៊ីនតោន ជួបលោកចូ បៃដិន។ សូមរំលឹកដែរថា ចិន និងជប៉ុន គឺជាមហាអំណាចសេដ្ឋកិច្ចលំដាប់ទី២ និងទី៣ តែទំនាក់ទំនងការទូតរវាងមហាយក្សអាស៊ីទាំង២កាន់តែល្អក់កករ បន្ទាប់ពីចិនបានបង្កើនសកម្មភាពវាតទីក្នុងតំបន់អាស៊ីប៉ាស៊ីហ្វិក។ ជប៉ុនតែងតែរអ៊ូជារឿយៗ អំពីសកម្មភាពរបស់ចិននៅក្នុងសមុទ្រ ក្បែរកោះ Senkaku របស់ជប៉ុន ហើយដែលចិនអះអាងថាក៏ជារបស់ខ្លួនដែរ។ សំណុំរឿងតៃវ៉ាន់ ដែលចិនអាចលើកទ័ពច្បាមយកមកគ្រប់គ្រង ក៏ជាការព្រួយបារម្ភមួយទៀតដែររបស់ជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ