កូរ៉េខាងត្បូង លុបវិធានការចុងក្រោយប្រឆាំងកូវីដ ដោយលែងតម្រូវឱ្យពាក់ម៉ាស់ក្នុងទីបិទជិត
តាំងពីផ្ទុះកូវីដ១៩ នៅឆ្នាំ២០២០ភ្លាមមក កូរ៉េខាងត្បូងបានដាក់ចេញនូវវិធានការជាច្រើន។ ការពាក់ម៉ាស់ជាវិធានការដែលមានអាយុវែងជាងគេ។ ប៉ុន្តែវិធានការប្រឆាំងកូវីដចុងក្រោយគេនេះ ក៏នឹងលុបចោលដែរ។ ចាប់ពីថ្ងៃ៣០មករា២០២៣តទៅ ប្រជាពលរដ្ឋកូរ៉េខាងត្បូង លែងមានកាតព្វកិច្ចត្រូវពាក់ម៉ាស់នៅក្នុងទីបិទជិតទៀតហើយ លើកលែងតែមន្ទីរពេទ្យនិងក្នុងពេលជិះមធ្យោបាយដឹកជញ្ជូនសាធារណៈ។
ចុះផ្សាយនៅថ្ងៃ៖
ស្តាប់ - ០១:៥៦
ក្រោយបញ្ចប់វិស្សមកាលចូលឆ្នាំថ្មីរួច ពោលគឺចាប់ពីថ្ងៃទី ៣០មករាទៅ កូរ៉េខាងត្បូងលែងតម្រូវឱ្យពលរដ្ឋពាក់ម៉ាស់នៅតាមទីកន្លែងបិទជិតទៀតហើយ លើកលែងតែនៅក្នុងមន្ទីរព្យាបាលសុខភាព និងក្នុងមធ្យោបាយដឹកជញ្ជូនសាធារណៈ។ នេះបើតាមការគូសបញ្ជាក់របស់អ្នកទទួលខុសត្រូវនៃទីភ្នាក់ងារត្រួតពិនិត្យនិងការពារជំងឺកូរ៉េខាងត្បូង។
ពាក់ម៉ាសក្នុងបិទជិតលែងជាកាតព្វកិច្ចមែន ប៉ុន្តែអាជ្ញាធរបន្តផ្តល់អនុសាសសន៍ណែនាំឱ្យពលរដ្ឋបន្តពាក់ម៉ាស់ទៀត។ នេះបើតាមប្រសាសន៍របស់លោកនាយករដ្ឋមន្ត្រីកូរ៉េខាងត្បូង នៅក្នុងជំនួបប្រជុំរដ្ឋាភិបាលស្តីពីយុទ្ធសាស្ត្រប្រយុទ្ធប្រឆាំងនឹងកូវីដ។
សម្រាប់អាជ្ញាធរ កូរ៉េខាងត្បូងអាចលើកវិធានការចុងក្រោយមួយនេះបាន ដោយសារតែសំឡឹងឃើញថាប្រព័ន្ធសុខាភិបាលរបស់ប្រទេសមានសមត្ថភាពរឹងមាំប្រសើរឡើង ហើយចំនួនករណីអ្នកមានជំងឺកូវីដធ្ងន់ធ្ងរ និងស្លាប់ក៏បានធ្លាក់ចុះ និន្នាការចម្លងថ្មីក៏ចាប់ថយដែរ។ កត្តាហានិភ័យមកពីខាងក្រៅ ដែលចង់សំដៅលើចំណាត់ការទប់ទល់នឹងការផ្ទុះកូវីដខ្លាំងនៅចិន ក៏អាជ្ញាធរកូរ៉េខាងត្បូងគ្រប់គ្រងបានដែរ។ ប៉ុន្តែអ្នកមានតេស្តវិជ្ជមានកូវីដ ត្រូវជាប់ភារកិច្ចដាក់ខ្លួននៅដាច់ពីគេឯងរយៈពេល៧ថ្ងៃ។
ចូលជាធរមាន តាំងពីខែតុលាឆ្នាំ២០២០មក កាតព្វកិច្ចពាក់ម៉ាស់ ជាវិធានការមួយនៃវិធានការចុងក្រោយដែលកូរ៉េខាងត្បូងបន្តអនុវត្តរហូតមក។ បម្រាមគោចរ និងវិធានការរក្សាគម្លាម ត្រូវបានលុបចោលតាំងពីយូរយារមកហើយ។ បើតាមតួលេខផ្លូវការ មានពលរដ្ឋកូរ៉េខាងត្បូងជិត៣០លាននាក់បានឆ្លងកូវីដ១៩ កនិងជាង៣៣០០០នាក់បានស្លាប់។ យុទ្ធសាស្ត្រប្រឆាំងកូវីដ ដោយធ្វើតេស្តទ្រង់ទ្រាយធំ តែមិនខ្ទប់ប្រទេសឬខេត្តក្រុង បានទទួលការស្វាគមន៍ តាំងពីផ្ទុះវិបត្តិភ្លាម និងបានក្លាយជាគំរូក្នុងការប្រយុទ្ធប្រឆាំងនឹងកូវីដ១៩ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ