ក្នុងឯកសារការពារជាតិ កូរ៉េខាងត្បូងចាត់ទុកកូរ៉េខាងជើងជា “សត្រូវ”
ឧបទ្វីបកូរ៉េបាននិងកំពុងស្គាល់ភាពតានតឹងខ្លាំងជាថ្មី។ នៅថ្ងៃព្រហស្បតិ៍ទី ១៦ កុម្ភៈ ២០២៣នេះ កូរ៉េខាងត្បូងបានពង្រឹងជំហរកាន់តែតឹងតែងខ្លាំងដាក់ក្រុងព្យុងយ៉ាង ដោយបានហៅកូរ៉េខាងជើងជាថ្មី ថា “សត្រូវ”។ នេះជាលើកទីមួយហើយគិតចាប់តាំងពី៦ឆ្នាំមកដែល ពាក្យ “សត្រូវ” បានព្រលយចេញជាថ្មីពីខាងសេអ៊ូល។
ចុះផ្សាយនៅថ្ងៃ៖
ស្តាប់ - ០២:១២
នៅក្នុងសៀវភៅស ស្តីពីផែនការការពារជាតិ ដែលចេញផ្សាយជាសាធារណៈនៅថ្ងៃព្រហស្បតិ៍ទី១៦កុម្ភៈនេះ កូរ៉េខាងត្បូងបានអះអាងថា កាលពីខែធ្នូ២០២២ កូរ៉េខាងជើងបានចាត់ទុកកូរ៉េខាងត្បូង ជាសត្រូវពិតៗរបស់គេ ដូច្នេះរបបព្យុងយ៉ាងនិងយោធារបស់កូរ៉េខាងជើង ក៏ជា “សត្រូវ” របស់យើងដែរ។
ការចែងពាក្យ “សត្រូវ” ក្នុងសៀវភៅសកូរ៉េខាងត្បូង នាពេលនេះ ជាការបានឆ្លុះឱ្យឃើញអំពីស្ថានភាពដុនដាបនៃទំនាក់ទំនងបែបតតាំងគ្នា រវាងកូរ៉េខាងទាំងពីរ ដែលបើតាមបច្ចេកទេស កំពុងបន្តធ្វើសង្គ្រាមនឹងគ្នា នៅឡើយព្រោះសង្គ្រាមកូរ៉េពីឆ្នាំ ១៩៥០-៥៣ បានបិទបញ្ចប់ទៅដោយការព្រមព្រៀងឈប់បាញ់ មិនមែនដោយការចុះសន្ធិសញ្ញាសន្តិភាពទេ។
បើតាមសាស្ត្រាចារ្យនៅសកលវិទ្យាល័យសិក្សាកូរ៉េខាងជើងនៅក្រុងសេអ៊ូល ឧបទ្វីបកូរ៉េមានសភាពដូចសម័សង្គ្រាមត្រជាក់ ៖ នៅខាងជើង ប្រមុខគីមជុងអ៊ុន ប្រឹងអភិវឌ្ឍវិស័យយោធាទ្វេឡើង ហើយប្រកាសកាលពីឆ្នាំទៅតាំងខ្លួនជាប្រទេសមហាអំណាចយោធាដោយគ្មានអ្វីអាចប្តូរផ្លាស់បានឡើយ និងអនុម័តច្បាប់វាយប្រហារនុយក្លេអ៊ែរជាកិច្ចការពារខ្លួនទៀត។ ជាមួយគ្នានោះ របបព្យុងយ៉ាងបានធ្វើការសាកល្បងនុយក្លេអ៊ែរយ៉ាងទៀងទាត់ ទោះបីមានទណ្ឌកម្មអន្តរជាតិធ្ងន់យ៉ាងណាក៏ដោយ។ ចំណែកខាងត្បូងវិញ រដ្ឋាភិបាលអភិរក្សថ្មីបានតបតវិញដោយបង្កើនលំហាត់សឹកជាមួយសហរដ្ឋអាមេរិក ព្រោះយល់ថានៅស្ងៀមមិនមែនជាចម្លើយដ៏សក្តិសមឡើយ។
សូមបញ្ជាក់ថា សៀវភៅសដែលចេញផ្សាយជារៀងរាល់៦ខែម្តង ធ្លាប់ចែងចាត់ទុកកូរ៉េខាងជើងជា “សត្រូវ” ជាលើកដំបូងបង្អស់នៅឆ្នាំ១៩៩៤ និងរហូតដល់ឆ្នាំ២០០០ ក្រោយពីអ្នកទទួលខុសត្រូវរបបព្យុងយ៉ាងបានគំរាមធ្វើព្យុះភ្លើងលើកូរ៉េខាងត្បូង។ បន្ទាប់ពីរលុបបាត់អស់ជិតមួយទសវត្សរ៍ កូរ៉េខាងត្បូងបានត្រលប់មកប្រើពាក្យ “សត្រូវ” ម្តងទៀត នៅឆ្នាំ២០១០ នៅពេលកូរ៉េខាងជើងជាប់ចោទថាបានបាញ់នាវាមុជទឹកកូរ៉េខាងត្បូងស្លាប់នាវិកអស់៤៦នាក់។ កូរ៉េខាងត្បូងបានបោះបង់ចោលពាក្យ “សត្រូវ”ទៅវិញ ក្រោមអាណត្តិលោកមូន ចែអ៊ីន តែប្រធានាធិបតីកូរ៉េខាងត្បូងបច្ចុប្បន្ន ដែលទើបឡើងបន្តតំណែងកាលពីខែឧសភា២០២២ មានជំហរតឹងតែងខ្លាំង បានប្រកាសចាត់ទុកកូរ៉េខាងជើងជា “សត្រូវ” ឡើងវិញ នៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ